Ester 7 - Q'eqchi Bible

Kiteneb'aak kamk sa' xb'een laj Amán

¹ Li awab'ej ut laj Amán koheb' chi tzekank sa' rochoch lix Ester.

² Ut naq yookeb' chi wa'ak uk'ak, li awab'ej kixpatz' wi' chik re lix Ester: “K'aru taawaj, a Ester, at insum'aatin? K'aru taapatz' we? Us ta li xyiijachil lin'awab'ejihom taapatz' we, taak'eemanq aawe”.

³ Kichaq'ok lix Ester, li xna'eb' li tenamit, ut kixye: “At awab'ej, wi xintaw usilal chawu ut wi nikinaara, chakol linyu'am ut li xyu'am lintenamit. A'an li nawaj ut linpatz'om.

⁴ Xb'aan naq laa'in ut eb' li wech tenamitul xook'ayiik re qatawasinkil, qakamsinkil ut qasachb'al chi junajwa. Wi yal ta xook'ayiik cho'q aj mun, maak'a' raj tinye aawe. Ink'a' raj xatinch'i'ch'i'i rik'in junaq k'a'aq re ru li moko nim ta ch'a'ajkilal tixk'am chaq sa' aab'een”.

⁵ Toja' naq li awab'ej kixpatz' re lix Ester, li xna'eb' li tenamit: “Ani ut b'ar wank li winq a'an li xk'uub' sa' xch'ool xb'aanunkil li maa'usilal a'an?”.

⁶ Kixye lix Ester: “Li xik' na'ilok qe ut yo xsik'b'al qakamsinkil, a'an laj Amán, li reemaaru aj winq!”. K'ajo' naq kichalk xxiw laj Amán chiru li awab'ej ut chiru lix Ester naq kirab'i a'an.

⁷ Tikto kiwakliik li awab'ej sa' li xk'ojarib'aal chi k'ajo' xjosq'il ut koho chiru li neb'aal. Laj Amán kikanaak aran chi xk'atq lix Ester re xtz'aamankil xkuyb'al chiru, xb'aan naq naxnaw naq taataqlaaq xkamsinkil xb'aan li awab'ej.

⁸ Naq laj Asuero ki'ok wi' chik sa' li ochoch, hupu laj Amán chiru xk'ojarib'aal lix Ester. Jo'kan naq li awab'ej kixye: “Ma taawaj ajwi' xmuxb'al li wixaqil sa' li wochoch?”. Toj yo ajwi' xyeeb'al a'an naq kitz'apmank li xnaq' ru laj Amán.

⁹ Toja' naq laj Jarboná, jun reheb' laj k'anjel chiru li awab'ej, kixye: “Laj Amán kixk'e chi yiib'aak sa' rochoch jun li t'uyleb'aal poyanam aj oxlaju moqoj xteram, re xkamsinkil laj Mardokeo, li winq li kiyehok aawe naq ke'raj aakamsinkil”. Kichaq'ok li awab'ej: “T'uyub'aq chaq aran!”, chan.

¹⁰ Ut ke'xt'uyub' laj Amán sa' li t'uyleb'aal kixyiib' re raj xkamsinkil laj Mardokeo. Chi jo'kan kich'anaak xjosq'il li awab'ej.