Ester 5 - Q'eqchi Bible

Lix Ester kiwulak rik'in li awab'ej

¹ Oxib' kutan chik chirix a'an, lix Ester kixtiqib' wi' chik rib' rik'in raq'ul li xwankilal. Koxnume'q sa' chixjunileb' li okeb'aal, toj reetal kiwulak wan wi' li awab'ej. K'ojk'o li awab'ej sa' li xk'ojarib'aal

² ut naq kiril lix Ester sa' li neb'aal, kisaho'k sa' xch'ool, kixchap li xuq' yiib'anb'il rik'in oor ut kixk'e chi xkux lix Ester.

³ Toja' naq li awab'ej kixpatz' re: “K'aru xk'ulmank, a Ester? K'aru taawaj? Us ta li xyiijachil lin'awab'ejihom taapatz' we, taak'eemanq aawe”, chan.

⁴ Kixye lix Ester: “Wi tixk'ul aach'ool, at awab'ej, nintz'aama chawu naq tatk'ulunq chi tzekank hoon sa' li ninq'e xink'uub' cho'q aawe, aawochb'eenaq laj Amán”.

⁵ Kichaq'ok li awab'ej: “Yeemaq re laj Amán chi junpaat re xpaab'ankil li raatin lix Ester”, chan. Li awab'ej ut laj Amán ke'wulak xkab'ichaleb' chi tzekank sa' li ninq'e kixkawresi lix Ester,

⁶ ut naq yookeb' chi tzekank, li awab'ej kixye re lix Ester: “Li k'aru taapatz', a Ester, taak'eemanq aawe. K'aru taawaj? Us ta li xyiijachil lin'awab'ejihom taapatz' we, laa'in tink'e aawe”.

⁷ Lix Ester kixye: “Li k'aru twaj ut tinpatz' aawe a'an a'in:

⁸ Wi usilal xintaw chawu, at awab'ej, wi tixk'ul aach'ool xnawb'al li k'aru nawaj ut xb'aanunkil li wajom, tatk'ulunq wi' chik wulaj chi tzekank sa' li ninq'e xinkawresi cho'q aawe, aawochb'eenaq laj Amán. Ut aran tinb'aanu li taapatz' we”.

Laj Amán kixtaqla xyiib'ankil li kamsib'aal cho'q re laj Mardokeo

⁹ Sa' li kutan a'an laj Amán ki'elk chi jwal sa sa' xch'ool. Ab'an naq kiril laj Mardokeo chire li okeb'aal, chi ink'a' ki'eek'ank sa' xna'aj naq kinume'k, k'ajo' naq kichalk xjosq'il.

¹⁰ Laj Amán ink'a' kixk'ut li xjosq'il, yal kixkuy, ut naq kiwulak sa' rochoch, kixch'utub'eb' li ramiiw ut lix Seres li rixaqil;

¹¹ kixseeraq'i reheb' li xloq'al ut li xb'ihomal, li xk'ihaleb' li ralal xk'ajol ut chanru naq kik'ehe'k xwankil sa' xb'eeneb' li xjolomileb' li tenamit jo'wi' eb' laj k'anjel chiru li awab'ej.

¹² Kixye ajwi': “Jun chik: lix Ester, li xna'eb' li tenamit, ka'ajin wi' xinxb'oq chi tzekank sa' jun li ninq'e, wochb'een li awab'ej. Ut b'oqb'ilin wi' chik wulaj xb'aan lix Ester, wochb'een li awab'ej.

¹³ Ab'anan chixjunil a'in maak'a' na'ok wi', naq toj k'ojk'ooq xaq laj Mardokeo laj Judiiy chire rokeb'aal li rochoch li awab'ej”, chan.

¹⁴ Toja' naq lix Seres li rixaqil ut chixjunileb' li ramiiw ke'xye re: “K'e chi yiib'aak jun li t'uyleb'aal poyanam, aj oxlaju moqoj xteram, ut aran taat'uyub' laj Mardokeo. Chi jo'kan sahaq sa' aach'ool naq tatxik chi tzekank aawochb'een li awab'ej”, chankeb'. Laj Amán kixk'ul xch'ool li na'leb' a'an ut kixtaqla xyiib'ankil li kamsib'aal.