Ester 4 - Q'eqchi Bible

Xrahil xch'ooleb' laj Judiiy

¹ Naq laj Mardokeo kixnaw chixjunil li kik'ulmank, kixq'ich li raq', reetalil li xrahil xch'ool, kixk'e q'es ruhil t'ikr chirix ut kixk'e cha sa' xjolom. Ut kixb'eeni chixjunil li tenamit chi japjo re xb'aan li rahilal xchalk sa' xb'eeneb';

² kiwulak toj chire rokeb'aal li rochoch li awab'ej, xb'aan naq maajun naru chi ok sa' li ochoch a'an wi tiqtooq rik'in q'es ruhil t'ikr.

³ Sa' chixjunileb' li tenamit yo wi' chi wulak li hu ut li esil a'an, k'ajo' tz'aqal li rahil ch'oolej sa' xyanqeb' laj Judiiy; k'ajo' li ayuunik, li yaab'ak ut q'oqonk, ut naab'aleb' ke'xk'e q'es ruhil t'ikr chirixeb', ut sa' xb'een chik li cha ke'xyokob' rib'eb'.

Laj Mardokeo kixtz'aama chiru lix Ester naq tixkoleb' li rech tenamitul

⁴ Eb' li ixq ut winq aj k'anjeleb' chiru lix Ester kole'xye re li k'aru yo chi k'ulmank. K'ajo' naq kiraho'k xch'ool li xna'eb' li tenamit, ut chi junpaat kixtaqla raq' laj Mardokeo re naq taarisi li q'es ruhil t'ikr li wank chirix ut tixtiqib' rib' chi chaab'il; ab'an a'an ink'a' kiraj.

⁵ Toja' lix Ester kixb'oq laj Hatak, jun xnimal ru aj k'anjel chiru li awab'ej, ut kixtaqla chi xpatz'b'al re laj Mardokeo k'aru yo xk'ulb'al ut k'aru xyaalal chixjunil li yo chi k'ulmank.

⁶ Ki'elk laj Hatak ut koho wan wi' laj Mardokeo, li wank chiru xneb'aalil li rochoch li awab'ej.

⁷ Laj Mardokeo kixseeraq'i re li xtaql lix Ester chixjunil li yo xk'ulb'al ut li k'iila tumin kixyeechi'i laj Amán re xk'eeb'al sa' xk'uuleb'aal xtumin li awab'ej, re xkamsinkileb' chixjunileb' laj Judiiy.

⁸ Kixk'e ajwi' jun reetalil li hu xpuktesimank sa' li tenamit Susa, b'arwi' naxye naq che'sache'q ruheb' laj Judiiy; kixq'axtesi re ut kixye naq tixq'axtesi sa' ruq' lix Ester re tixnaw chixjunil. Ut kixtz'aama usilal re lix Ester naq chiwulaq rik'in li awab'ej re aatinak chirix li xtenamit ut xsik'aq li rusilal.

⁹ Naq kisutq'iik laj Hatak wan wi' lix Ester, koxseeraq'i re li kixye laj Mardokeo.

¹⁰ Toja' naq kichaq'ok lix Ester ut kixye re: “Ayu wi' chik rik'in laj Mardokeo ut ye re:

¹¹ «Chixjunileb' laj k'anjel chiru li awab'ej jo'wi' eb' li tenamit neke'xnaw chi us naq chixjunileb' li winq malaj eb' li ixq li te'raj wulak rik'in li awab'ej chiru li neb'aal chi ink'a' b'oqb'ileb', ch'olch'ooq naq te'kamsiiq. Ka'ajwi' te'kole'q wi li awab'ej tixtaqsi li xxuq' oor sa' xb'een xjolomeb'; ut laa'in ak wank chik jun po chi toj maji' ninb'oqe'k rik'in li awab'ej»”.

¹² Laj Hatak kixk'am li raatin lix Ester re laj Mardokeo,

¹³ ut a'an kixsume chaq chi jo'ka'in: “At Ester, maak'oxla naq yal xb'aan ta naq wankat sa' rochoch li awab'ej tatkole'q ta aajunes sa' xyanqeb' chixjunileb' laj Judiiy.

¹⁴ Wi maak'a' taaye anaqwan, li xtenq'ankileb' ut xkolb'aleb' laj Judiiy taachalq rik'in jalan chik; a'ut laa'at ut eb' laawech'alal tex'oso'q. Mare wachik xatwulak cho'q xna'eb' li tenamit anaqwan re qatenq'ankil sa' li rahilal a'in!”.

¹⁵ Toja' naq lix Ester kixtaqla wi' chik laj Hatak rik'in laj Mardokeo re xyeeb'al re chi jo'ka'in:

¹⁶ “Ayu ut ch'utub'eb' chixjunileb' laj Judiiy li wankeb' sa' li tenamit Susa ut ayuuninqex chiwix. Ink'a' texwa'aq chi moko tex'uk'aq chiru oxib' kutan ut oxib' q'oqyink. Jo'kan ajwi' tinb'aanu laa'in wochb'eeneb' li ixq aj k'anjeleb' chiwu. Chirix chik a'an, us ta ink'a' naxye sa' li chaq'rab', laa'in tinwulaq rik'in li awab'ej. Ut wi tine'xkamsi, kamqin”.

¹⁷ Toja' naq koho laj Mardokeo ut kixb'aanu chixjunil li kiyehe'k re xb'aan lix Ester.