Esdras 8 - Q'eqchi Bible

Li xk'ab'a'eb' li ke'sutq'iik wi' chik Jerusalén rochb'een laj Esdras

¹ A'aneb' a'in li xjolomileb' junqkab'al, a' yaal chanru li xyo'lajikeb', li ke'sutq'iik wi' chik Jerusalén wochb'eeneb' naq wank chi awab'ejil laj Artajerjes.

² Sa' xyanqeb' li ralal laj Pinjás: laj Kersón; sa' xyanqeb' li ralal laj Itamar: laj Daniel; sa' xyanqeb' li ralal laj David: laj Jatús,

³ ralal laj Sekanías; sa' xyanqeb' li ralal laj Parós: laj Sakarías, li kitz'iib'aak xk'ab'a' rochb'een lajeeb' xwaqxaqk'aal (150) chi winq;

⁴ sa' xyanqeb' li ralal laj Pajat-Mohab: laj Eljohenay, ralal laj Serajías, ut lajeek'aal (200) chi winq rochb'een;

⁵ sa' xyanqeb' li ralal laj Satú: laj Sekanías, ralal laj Jahasiel, ut o'lajuk'aal (300) chi winq rochb'een;

⁶ sa' xyanqeb' li ralal laj Adín: laj Ebed, ralal laj Jonatán, ut lajeeb' roxk'aal (50) chi winq rochb'een;

⁷ sa' xyanqeb' li ralal laj Elam: laj Isaías, ralal laj Atalías, ut lajeeb' xkaak'aal (70) chi winq rochb'een;

⁸ sa' xyanqeb' li ralal laj Sefatías: laj Sebadías, ralal laj Mikael, ut kaak'aal (80) chi winq rochb'een;

⁹ sa' xyanqeb' li ralal laj Johab: laj Abdías, ralal laj Jehiel, ut waqxaqlaju xjunlajuk'aal (218) chi winq rochb'een;

¹⁰ sa' xyanqeb' li ralal laj Baní: laj Selomit, ralal laj Josipías, ut waqxaqk'aal (160) chi winq rochb'een;

¹¹ sa' xyanqeb' li ralal laj Bebay: laj Sakarías, ralal laj Bebay, ut waqxaqib' xka'k'aal (28) chi winq rochb'een;

¹² sa' xyanqeb' li ralal laj Askad: laj Johanán, ralal laj Hakadán, ut lajeeb' xwaqk'aal (110) chi winq rochb'een;

¹³ sa' xyanqeb' li ralal laj Adonikán, a'eb' li moqon chik ke'sutq'iik chaq: laj Elifélet, laj Jehiel ut laj Semaías, ut oxk'aal (60) chi winq rochb'eeneb';

¹⁴ ut sa' xyanqeb' li ralal laj Bikbay: laj Utay ut laj Sabud, ut lajeeb' xkaak'aal (70) chi winq rochb'een.

Eb' laj k'anjel sa' rochoch li Yos

¹⁵ Laa'in laj Esdras kinch'utub'eb' chixjunil a'in chire li nima' li naxik Ahabá. Oxib' kutan koohilank aran. Ut naq kiwajla eb' li poyanam ut eb' laj tij, kink'e reetal naq maajun aj Leví wank sa' xyanqeb'.

¹⁶ Toja' naq kinb'oq laj Elieser, laj Ariel, laj Semaías, laj Elnatán, laj Jarib, laj Elnatán, laj Natán, laj Sakarías ut laj Mesulán, li ninqeb' xwankil,

¹⁷ ut kintaqlaheb' rik'in laj Idó, li nataqlank sa' li na'ajej Kasifías xk'ab'a'. Kinye reheb' chixjunil li tento te'xnumsi re laj Idó ut reheb' li wankeb' rochb'een chi k'anjelak sa' li tijob'aal re Kasifías, re naq te'xtaqla chaq qe aj k'anjeleb' sa' rochoch li qaYos.

¹⁸ B'anyox re li Yos, xb'aan xnimal xrahom li Qaawa' ke'xk'am chaq qe jun li winq chaab'il xna'leb', aj Serebías xk'ab'a', ralal laj Majlí, ralal laj Leví, ralal laj Israel. Ke'chalk rochb'een eb' li ralal ut eb' li ras riitz'in: waqxaqlajuheb' chi winq.

¹⁹ Ke'xtaqla ajwi' chaq laj Jasabías rochb'een laj Isaías li riitz'in, xkomoneb' laj Merarí, jo' ajwi' eb' li ralal xk'ajol: junmay chi winq chixjunileb'.

²⁰ Ke'chalk ajwi' junlajuk'aal (220) chi k'anjelak sa' rochoch li Yos, a'eb' li ke'xaqab'aak junxil xb'aan laj David ut eb' laj jolominel chi xtenq'ankileb' laj Leví. Chixjunileb' a'an b'oqb'ileb' rik'in li xk'ab'a'eb'.

²¹ Aran chire li nima' Ahabá kinxaqab' jun li ayuun re xkub'sinkil qib' chiru li qaYos jo' ajwi' re xpatz'b'al naq maak'a' tqak'ul sa' li qab'eenik laa'o, eb' li qalal qak'ajol ut li k'aru wank qe.

²² Xb'aan naq kinxutaanak xpatz'b'aleb' aj puub' re li awab'ej, xkomoneb' li neke'xik chi oqej malaj chirix kawaay, re qakolb'al chiruheb' li xik' neke'ilok qe sa' li qab'eenik, xb'aan naq ak qayehom re li awab'ej chi jo'ka'in: “Li qaYos wank rik'in chixjunileb' li neke'sik'ok re; ab'anan li xwankilal ut li xjosq'il wank sa' xb'eeneb' li neke'tz'eqtaanank re”, chanko.

²³ Koo'ayuunik ut kiqatz'aama qatenq'ankil chiru li qaYos, ut A'an koorab'i.

²⁴ Kinsik' ruheb' kab'laju xjolomileb' laj tij: a'aneb' laj Serebías ut laj Jasabías, rochb'eeneb' lajeeb' chik.

²⁵ Kinb'is ut kinq'axtesi reheb' li plaat ut li oor, ut eb' li k'anjelob'aal k'eeb'ileb' cho'q mayej re li rochoch li qaYos xb'aan li awab'ej, xb'aaneb' laj k'ehol xna'leb', eb' laj jolominel ut chixjunileb' laj Israel li wankeb' aran.

²⁶ Kinb'is ut kinq'axtesi reheb' jun xka'k'aal mil rik'in lajeeb' roxk'aal xkab' o'q'ob' (21,450) b'iis li plaat, o'k'aal (100) chi k'anjelob'aal yiib'anb'ileb' rik'in plaat, oxib' mil rik'in o'lajuk'aal (300) b'iis li oor,

²⁷ junmay li sek' yiib'anb'ileb' rik'in oor, waqlaju liib'r raalal, ut wiib' li k'anjelob'aal yiib'anb'ileb' rik'in chaab'il q'anch'iich', terto xtz'aq kama' li oor.

²⁸ Chirix chik a'an kinye reheb': “Laa'ex q'axtesinb'ilex re li Qaawa'; jo'kan ajwi' eb' li k'anjelob'aal a'in. Li plaat ut li oor, a'aneb' jun li loq'laj mayej cho'q re li Qaawa', xYos eb' li qana' qayuwa'.

²⁹ K'uulahomaq ut ilomaq chi us toj reetal toxeeb'is chiruheb' li xjolomileb' laj tij, eb' laj Leví, eb' li xjolomileb' xjunkab'al eb' laj Israel, aran Jerusalén, sa' rochoch li qaYos”.

³⁰ Toja' naq eb' laj tij ut eb' laj Leví ke'xk'ul li plaat ut li oor ak b'isb'il, jo'wi' eb' li k'anjelob'aal, ut ke'xk'am Jerusalén, sa' rochoch li qaYos.

³¹ Sa' li kab'laju xb'e li xb'een po koo'elk aran wan wi' li nima' Ahabá ut kooho Jerusalén. Li ruq' li qaYos wank sa' qab'een ut koxkol sa' li b'e chiruheb' laj elq' ut eb' li xik' neke'ilok qe.

³² Naq koowulak Jerusalén, koohilank aran oxib' kutan.

³³ Sa' xka li kutan, sa' rochoch li qaYos, kib'ismank li plaat ut li oor, jo'wi' chixjunileb' li k'anjelob'aal, ut kiq'axtesimank re laj Meremot laj tij, ralal laj Urías. Rochb'een a'an wank laj Elehasar, ralal laj Pinjás, jo'wi' eb' laj Leví: laj Josabad, ralal laj Josué, ut laj Nohadías, ralal laj Binuy.

³⁴ Ki'ajlamank ut kib'ismank chixjunil; ut kitz'iib'amank reetalil chixjunil li raalal.

³⁵ Moqon chik eb' li ke'sutq'iik wi' chik Jerusalén ke'xyeechi'i k'atb'il mayej re li xYos laj Israel: kab'laju chi saaj wakax sa' xk'ab'a' chixjunil Israel, waqlaju ro'k'aal (96) chi saaj wakax, wuqlaju xkaak'aal (77) chi karneer ut kab'laju chi kok' wakax re xpatz'b'al xkuyb'al xmaakeb'. Ut chixjunil a'an ke'xk'at chiru li Qaawa' cho'q xmayejeb'.

³⁶ Chirix chik a'an ke'xq'axtesi li xchaq'rab' li awab'ej reheb' laj tenq'anel re jo'wi' reheb' li neke'taqlank sa' xb'eeneb' li tenamit wankeb' junpak'al li nima' Éwfrates. Ut eb' a'in ke'xtenq'a li tenamit ut li rochoch li Yos.