Esdras 4 - Q'eqchi Bible

Eb' laj Samaria ke'raj naq taakanab'aaq xkab'lankil li rochoch li Yos

¹ Naq eb' li xik' neke'ilok reheb' laj Judá ut eb' laj Benjamín ke'xnaw naq eb' li ke'sutq'iik wi' chik Jerusalén yookeb' xkab'lankil jun rochoch li Qaawa', xYos laj Israel,

² ke'wulak rik'in laj Sorobabel, laj Josué ut rik'ineb' li xjolomileb' junkab'al, ut ke'xye reheb': “Texqatenq'a chi kab'lak, xb'aan naq laa'o ajwi' naqasik' leeYos ut nokoomayejak chiru, jo' nekeb'aanu laa'ex, chalen sa'eb' li kutan naq kiwank cho'q awab'ej re Asiria laj Asaradón, li kik'amok chaq qe arin”.

³ Ab'an laj Sorobabel, laj Josué ut li xjolomileb' junkab'al re Israel ke'xsumeheb': “Ink'a' tooruuq chi kab'lak sa' junajil laa'o ut laa'ex re xyiib'ankil jun rochoch li qaYos. Laa'o qajunes tqayiib' rochoch li Qaawa', xYos laj Israel, jo' kixye qe laj Siro, awab'ej re Persia”.

⁴ Toja' naq li tenamit li wankeb' sa' li na'ajej a'an ke'xyoob' xch'inankil xch'ooleb' laj Judá ut ke'roksi xxiweb' re naq te'xkanab' kab'lak.

⁵ Ke'xtumina ruheb' laj taqlanel re naq taapo'q ru li xk'anjeleb' laj Judá, ut relik chi yaal ke'xrameb' chalen sa'eb' li kutan naq kiwank laj Siro cho'q awab'ej re Persia toj sa' li x'awab'ejihom laj Darío, awab'ej re Persia.

⁶ Sa' xtiklajik li x'awab'ejihom laj Jerjes ke'xtz'iib'a jun li hu re xjitb'aleb' laj Judá ut eb' laj Jerusalén.

⁷ Chiru xyu'amil laj Artajerjes, awab'ej re Persia, laj Bislam, laj Mitrídates, laj Tabel ut eb' li rochb'een ke'xtz'iib'a xhu laj Artajerjes. Ke'xtz'iib'a li hu sa' aatinob'aal arameo, jo' neke'aatinak eb' a'an.

⁸ Laj Rejún aj jolominel ut laj Sinsay aj tz'iib' ke'xtz'iib'a xhu li awab'ej Artajerjes re xjitb'aleb' laj Jerusalén.

⁹ A'an a'in li hu kixtaqla laj Rejún aj jolominel, jo'wi' laj Sinsay aj tz'iib' ut eb' li rochb'een, a'eb' laj raqol aatin, eb' laj jolominel ut eb' li ninqeb' xwankil sa' xteepal Persia, Erek, Babilonia ut Susa, aj Elameb',

¹⁰ ut a'atqeb' chik li tenamit li ke'k'ame'k chi preexil xb'aan laj Asurbanipal li nim xwankil ut ke'na'ajunk sa'eb' li tenamit re Samaria jo' ajwi' junpak'al li nima' Éwfrates. Naxye chi jo'ka'in:

¹¹ “At awab'ej Artajerjes, laa'o aj k'anjel chawu li wanko arin junpak'al li nima' Éwfrates naqataqla xsahil aach'ool.

¹² “Naqak'e chanaw naq eb' laj Judiiy taqlanb'ileb' chaq aab'aan sa' li na'ajej wanko wi' ke'wulak Jerusalén ut yookeb' chi xwaklesinkil wi' chik li tenamit a'an yib'ru xna'leb' ut aj q'etol aatin. Ak xe'xk'e li rub'elankil ut yookeb' chi xwaklesinkil li xsuttz'akil.

¹³ At awab'ej, chanawaq a'in: wi te'xyiib' wi' chik li tenamit a'an ut te'xwaklesi li xsuttz'akil, ink'a' chik te'xk'e li toj, li kub'siil chi moko li xtoj li b'e, ut chi jo'kan naab'al li tumin taasachq.

¹⁴ Laa'o aj k'anjelo chawu, at awab'ej, ut ink'a' naxk'ul qu naq taasache'q aaloq'al chi kama' a'an. Naqaye resil aawe li k'aru yo chi k'ulmank,

¹⁵ re naq taatz'il rix sa' xhuheb' laaxe'toon ut aran taak'e reetal ut taataw ru naq li tenamit Jerusalén a'an jun tenamit aj q'etol aatin, li nayoob'ank xch'a'ajkilal eb' li awab'ej ut chixjunileb' li na'ajej, ut junelik yo chi po'ok ch'oolej chalen chaq junxil. Xb'aan a'an kisache'k li tenamit a'an.

¹⁶ At awab'ej, laa'o naqak'e chanaw a'in: wi te'xyiib' wi' chik li tenamit a'an ut te'xwaklesi li xsuttz'akil, chi seeb' maak'a'aq chik aach'och' arin junpak'al li nima' Éwfrates”.

¹⁷ Toja' naq li awab'ej Artajerjes kixtz'iib'a reeqaj li xhuheb' ut kixye reheb' chi jo'ka'in: “Nintaqla xsahil xch'ool laj Rejún aj jolominel, laj Sinsay aj tz'iib' ut chixjunileb' li rochb'eeneb' li wankeb' Samaria ut sa' chixjunil li na'ajej sa' xjayal rokeb'l saq'e re li nima' Éwfrates.

¹⁸ Li hu xetaqla chaq ak xyaab'asimank xsa' chiwu laa'in.

¹⁹ Xintaqla xtz'ilinkil rix ut xtawmank naq relik chi yaal li tenamit a'an chalen chaq junxil naxq'etq'eti rib' chiruheb' li awab'ej ut naxyoob' poqoqij ib' ut mululij ib'.

²⁰ Aran Jerusalén wanjenaqeb' awab'ej q'axal ninqeb' xwankil: ke'taqlank sa'eb' li na'ajej junpak'al li nima' Éwfrates ut ki'uxk li tojok chiruheb', li kub'siil ut li xtojb'al li b'e.

²¹ Jo'kan utan, cheye reheb' li winq a'an naq te'xkanab' k'anjelak ut ink'a' te'xwaklesi li tenamit a'an, toj tyeemanq jo'q'e taa'uxmanq.

²² Yalomaq eeq'e chi k'anjelak chi us. Mare anchal taanumtaaq li ink'a' us sa' qab'een laa'o li awab'ej”.

²³ Naq ke'ril xsa' li hu tz'iib'anb'il xb'aan laj Artajerjes li awab'ej, laj Rejún, laj Sinsay aj tz'iib' ut eb' li rochb'eeneb' ke'elk chi junpaat re xik Jerusalén ut ke'xmin ruheb' laj Judiiy chi xkanab'ankil li k'anjel li ke'xtikib' xb'aanunkil.

²⁴ Jo'kan naq kikanab'aak xkab'lankil li rochoch li Yos aran Jerusalén, ut kixaqliik li k'anjel toj sa' li xkab' chihab' rokik laj Darío cho'q awab'ej re Persia.