Efesios 5 - Q'eqchi Bible

¹ Chek'am eere rik'in li Yos jo'qex li ralal xk'ajol raarookex xb'aan,

² ut chexwanq sa' li rahok kama' naq kexra li Kriist ut kixq'axtesi rib' sa' qak'ab'a' jo' chaab'il mayej ut loq'laj yeechi'om, sununk xb'ook chiru li Yos.

³ Li ko'b'eetak yumb'eetak ut chixjunil li maa'usilal malaj xrahinkil ru li b'ihomal chi moko chi'ab'imanq sa' eeyanq, xb'aan naq moko xk'ulub'eb' ta chik eb' laj santil paab'anel.

⁴ Jo'kan ajwi' li tz'ajb'eetalil na'leb', li seeraq' maak'a' na'ok wi' ut li xiikil ch'uch'ib'k: eb' a k'a'aq re ru a'in moko us ta. Li tento xb'aanunkil, a'an li yoxink.

⁵ Chiwanq sa' eech'ool naq maajun aj ko'b'eet aj yumb'eet, aj muxul rib' malaj aj rahol ru b'ihomal (a'an juntaq'eet rik'in li jalan loq'onink) taatz'aqonq sa' li xnimajwal awab'ejihom li Kriist jo'wi' re li Yos.

⁶ Maa'ani chib'alaq'inq eere rik'ineb' li aatin maak'a'eb' xyaalalil, xb'aan naq a'in nachalk wi' xjosq'il li Yos sa' xb'eeneb' laj q'etol aatin.

⁷ Mex'okenk rik'ineb',

⁸ xb'aan naq junxil laa'ex chaq li aak'ab', a'ut anaqwan laa'ex chik li saqenk rik'in li Qaawa'. Chexwanq jo' ralal xk'ajol li saqenk.

⁹ Xb'aan naq li naruuchin li saqenk a'an chixjunil li chaab'ilal, tiikilal ut li yaal.

¹⁰ K'ehomaq reetal k'aru nawulak chiru li Qaawa',

¹¹ ut mex'okenk chi xb'aanunkil xk'anjel li aak'ab' li maak'a' na'ok wi', jwal us b'an naq teerisi chi kutankil re xjitb'al.

¹² Xutaanal ajwi' xyeeb'al li b'arwan neke'xb'aanu eb' a'an chi muqmu.

¹³ Ab'anan chixjunil a'an, naq nach'olob'aak xyaalal, na'elk chi kutankil,

¹⁴ xb'aan naq chixjunil li k'utk'u, sa' kutan saqenk chik wank. Jo'kan naq nayeemank: “Ajsi aawu laa'at li yookat chi wark, waklin sa' xyanqeb' li kamenaq ut sa' aab'een taakutano'q li Kriist”.

¹⁵ Jo'kan utan, k'ehomaq reetal chi us chanru leeyu'am: ink'a' jo'kaqex li maak'a'eb' xna'leb', jo'kaqex b'an li wankeb' xna'leb'.

¹⁶ Meekoleb' li kutan a'in xb'aan naq moko useb' ta li yookohatq chi rilb'al.

¹⁷ Jo'kan naq mexwank chi maak'a' eena'leb', chetawaq b'an ru li naraj li Qaawa'.

¹⁸ Mexkalaak rik'in b'iin xb'aan naq a'an nak'amok sa' li jo'maajo'il na'leb', nujob'resihomaq b'an eerib' rik'in li Musiq'ej.

¹⁹ Naq wanqex chi ch'utch'u, yehomaq saalm, himno ut loq'laj b'ich; chexb'ichanq ut chexwajb'aq chiru li Qaawa' chi anchal eech'ool.

²⁰ Sa' xk'ab'a' li Qaawa' Jesukriist chexyoxinq junelik chiru li Yos Yuwa'b'ej rik'in chixjunil.

Chepaab'aq eerib' cherib'il eerib' sa' leejunkab'al

²¹ Chepaab'aq eerib' cherib'il eerib' sa' xk'ab'a' roxloq'inkil li Kriist.

²² Eb' li ixq che'xpaab' li xb'eelom jo' naq neke'xpaab' li Qaawa',

²³ xb'aan naq li b'eelomej a'an xjolomil li ixaqilb'ej jo' li Kriist a'an xjolomil li Iklees, ut tz'aqal aj kolol re li xtz'ejwal.

²⁴ Jo' naq li Iklees naxpaab' li Kriist, jo'kanaqeb' ajwi' eb' li ixq: che'xpaab' li xb'eelom rik'in chixjunil.

²⁵ Ex b'eelomej, chera leerixaqil jo' naq li Kriist kixra li Iklees ut kixq'axtesi rib' sa' xk'ab'a' a'an

²⁶ re xsantob'resinkil: kixch'ajob'resi rik'in li ha' ut li raatin,

²⁷ re naq li Iklees taaxaqab'aaq chiru chi k'ajo' xloq'al, chi maak'a'aq xtz'ajnil, chi moko xyocholal malaj k'a'aq chik re ru, santaq b'an ut chi maak'a'aq xq'usb'al.

²⁸ Jo'kan ajwi' eb' li winq tento te'xra li rixaqil, kama' naq neke'xra li xtz'ejwaleb'. Ani naxra li rixaqil naxra ajwi' rib'.

²⁹ Maajun wa junaq xik' kiril li xtz'ejwal, naxch'oolani b'an ut naxra, jo' ajwi' naxb'aanu li Kriist re li Iklees.

³⁰ Xb'aan naq xcha'alo li xtz'ejwal.

³¹ Jo' naxye li Santil Hu: “Li winq tixkanab' xna' xyuwa', tixlaq'ab' rib' rik'in li rixaqil, ut junajaqeb' aj chik chi tz'ejwalej te'kanaaq chi xkab'ichaleb'”.

³² K'ajo' xchamal li na'leb' a'in: yookin chi xyeeb'al chirix li Kriist ut li Iklees.

³³ Jo'kan utan li junjunq sa' eeyanq chixra li rixaqil jo' naq naxra rib'; ut li ixaqilb'ej chiroxloq'i li xb'eelom.