Eclesiastés 8 - Q'eqchi Bible

¹ Maajun truuq tixjuntaq'eeta rib' rik'in li wank xna'leb'. Ani naxnaw xch'olob'ankil xyaalalil chixjunil li k'a'aq re ru? Li wank xna'leb' junelik se'se' ru na'ilok.

Tento xpaab'ankil li awab'ej

² Paab' li xchaq'rab' li awab'ej, xb'aan naq jo'kan xaye sa' jurament chiru li Yos.

^3-4 Loq' li raatin li awab'ej, ut maa'ani taayehoq re: “K'a' naq yookat chi xb'aanunkil a'an?”. Jo'kan naq maaseeb'a aawib' chi elk chiru, chi moko taak'e aach'ool chi xb'aanunkil li ink'a' us, xb'aan naq li awab'ej naru tixb'aanu aawe li k'aru x'alaak sa' xch'ool xb'aanunkil.

⁵ Li naxpaab' li xtaqlahom, maak'a' li ink'a' us tixk'ul; ut li wank xna'leb' naxnaw jo'q'e ut chanru tixpaab' li chaq'rab'inb'il wi'.

⁶ Wank xhonalil xb'aanunkil chixjunil ut wank li na'leb' re xk'oxlankil chanru xb'aanunkil; ab'an li qach'a'ajkilal a'an a'in:

⁷ ink'a' naqanaw li k'aru chaalel, chi moko wank ta junaq taayehoq resil li k'aru taak'ulmanq.

⁸ Maa'ani junaq wank xwankil sa' xb'een li iq' re naq tixtz'ap, chi moko wank xwankil sa' xb'een xkutankil li kamk malaj sa' xb'een xq'ehil li yalok. Ut ink'a' naru naq taakole'q li ink'a' us xna'leb' xb'aan li maa'usilal xb'aanu.

Ch'a'aj xtawb'al ru xyaalalil li qayu'am

⁹ Xink'e inch'ool chi xtawb'al ru jo'ch'inal jo'nimal nak'ulmank sa' ruuchich'och'. K'a'ut naq wankeb' winq k'eeb'ileb' xwankil chi xrahob'tesinkil eb' li ras riitz'in?

¹⁰ Wilom ajwi' naq li ink'a' useb' xna'leb' neke'k'ehe'k xloq'al naq neke'muqe'k; a'ut eb' li neke'xik rajlal sa' rochoch li Yos, chi moko sa' li xtenamiteb' najultikamank li xk'ab'a'eb'. Ut a'in ajwi' maak'a' xyaalal!

¹¹ Naq ink'a' naraqmank aatin sa' junpaat sa' xb'een li yib'ru xna'leb', eb' li tenamit neke'xik wi' chik xch'ooleb' chi xb'aanunkil li maa'usilal.

^12-13 Mare wankeb' aj maak li neke'b'aanunk maa'usilal k'iila sut, ut yo'yooqeb' chiru naab'al chihab'. Ab'an laa'in ninnaw naq ink'a' us te'elq, chi moko najtaq roq li xyu'ameb'; kama'aq li mu li xyu'ameb', xb'aan naq ink'a' neke'roxloq'i li Yos. A'ut ch'olch'o naq eb' laj paab'anel li neke'rahok re li Yos, us te'elq.

¹⁴ Sa' li ruuchich'och' a'in wank jun chik li maak'a' rajb'al: wankeb' li chaab'ileb' xch'ool neke'xk'ul li xk'ulub'eb' raj laj maak, ut wankeb' laj maak neke'xk'ul li xk'ulub'eb' li tiikeb' xch'ool. Ut laa'in ninye naq a'in ajwi' maak'a' xyaalal!

¹⁵ Jo'kan naq ninye: “Chooninq'ehiq!”. Li k'aru jwal us cho'q qe, a'in naq toowa'aq too'uk'aq ut tooninq'ehiq jo' najtil roq li qayu'am tixk'e qe li Qaawa'. A'in li tento xb'aanunkil naq yooko chi xtawasinkil qib' rajlal kutan.

¹⁶ Naq xinq'axtesi wib' chi xnawb'al ut xk'eeb'al reetal li nak'ulmank sa' ruuchich'och' ut xinyal inq'e chi xtawb'al ru b'ar wank li choxahil na'leb', chi q'eq ut chi kutan ink'a' nachalk linwara.

¹⁷ Xink'e reetal naq ink'a' naru tqataw ru li k'aru naxb'aanu li Yos chi moko li nak'ulmank sa' ruuchich'och'. Us ta tqayal qaq'e chi xsik'b'al, ink'a' tqataw. Mare li wank xna'leb' tixye naq naxnaw xsumenkil li patz'om a'in, ab'anan li xyaalalil, naq maajoq'e tixtaw ru.