Eclesiastés 5 - Q'eqchi Bible

B'aanu li k'aru xayeechi'i re li Yos

¹ Naq tatxik sa' rochoch li Yos, chak'e reetal li k'aru taab'aanu. Wankeb' maak'a'eb' xna'leb' li neke'xik aran chi mayejak, ab'anan ink'a' neke'xk'e reetal naq ink'a' us yookeb'. A'ut laa'at jilon chiru li Qaawa' chi kub'enaq aawankil ut sa' q'unil ch'oolej.

² Ma yal aaseeb'a aawib' chi aatinak malaj chi k'oxlak naq wankat chiru li Qaawa', xb'aan naq li Yos wank sa' choxa ut laa'at sa' ruuchich'och'. K'oxla chi us li k'aru ok aawe chi xyeeb'al.

³ Jultikaq aawe naq li ookel k'a'uxl naxk'am chaq naab'al li matk'ek, ut li ani na'aatinak chi numtajenaq, naab'al li memil na'leb' naxye.

⁴ Wi wank k'aru xayeechi'i re li Qaawa', matb'ayk chi xb'aanunkil, xb'aan naq li Yos ink'a' nawulak chiru eb' li jipeb' li ink'a' neke'xb'aanu li xe'xyeechi'i. A'ut laa'at jo'ch'inal jo'nimal xayeechi'i, b'aanu.

⁵ Jwal us naq maak'a' taayeechi'i, chiru naq taayeechi'i ut chirix chik a'an ink'a' taab'aanu.

⁶ Maakanab' naq laawe tatxk'e chi maakob'k. Mare anchal taaye moqon re laj k'anjel chiru li Yos naq xmaak'a'il aana'leb' xab'aanu wi'. K'a'ut naq taachiq' xjosq'il li Yos rik'in li k'aru xaye? Maak'e chi sache'k li ak xab'aanu.

⁷ Laa'at chaloq'oni ut chapaab' li Yos! Li matk'ek naxk'am chaq li k'iila aatin maak'a' na'ok wi'.

Li tumin

⁸ Wi sa' junaq tenamit taawil naq rahob'tesinb'ileb' li neb'a' ut ink'a' naraqmank aatin sa' tiikilal, misachk aach'ool xb'aan a'an. A'in nak'ulmank xb'aan naq li ani wank sa' xwankil, a'an taqlanb'il xb'aan li nim xwankil chiru; ut li nim xwankil, a'an taqlanb'il ajwi' xb'aan jalan chik q'axal nim wi' chik xwankil.

⁹ Chirix chik a'an taayeemanq ajwi' aawe: “Yooko xb'aanunkil a'in re rusilankil li qatenamit. Laa'o li xtaql li awab'ej yooko chi k'anjelak chiruheb' laj ralch'och'!”, cha'qeb'.

¹⁰ Ani naxra li tumin, ink'a' nak'ojlaak xch'ool rik'in a'an. Ut li wank naab'al xb'ihomal, toj naraj naab'al xtz'aqob'. Ut chixjunil a'in maak'a' rajb'al,

¹¹ xb'aan naq li wank naab'al li k'aru re, naab'al ajwi' li xtumin taasachmanq. Ut k'aru naxra naq wank xb'ihomal chi yo'oon? Maak'a', ka'ajwi' tixtaw b'ayaq xsahil xch'ool rik'in rilb'al li xb'ihomal!

¹² Sa nawark li ani nak'anjelak, us ta naab'al naxtzeka malaj b'a'b'ay ajwi'. Ab'anan li b'ihom ink'a' nawark chi xk'oxlankil li k'aru wank re.

¹³ Wank jun chik ch'a'ajkilal ak xwil arin sa' ruuchich'och': a'an li xxokb'al naab'al li b'ihomal yal re naq laj eechal re tixk'ul rahilal moqon.

¹⁴ Wi ink'a' naxnaw xk'anjelankil chi us li xtumin, sa' junpaat tixsach chixjunil ut maak'a' tixkanab' cho'q reheb' li ralal xk'ajol.

¹⁵ Jo' chanru naq xyo'laak li poyanam, jo'kan ajwi' taaq'ajq taasutq'iiq, ut maak'a' k'aru li xtawasi wi' rib' tixk'am chirix.

¹⁶ A'in q'axal ra ajwi' xk'ulb'al: jo' naq xk'ulunk sa' ruuchich'och', jo'kan ajwi' naq taakamq. Ut k'aru xra naq xtawasi rib'

¹⁷ ut xnumsi chixjunil li xyu'am chi ch'i'ch'i'il wank, jo'wi' sa' yajel, ch'a'ajkilal ut rahil ch'oolej?

¹⁸ Xink'e reetal naq li jwal us cho'q re li winq, a'an li wa'ak uk'ak, xyalb'al xsahil li xk'anjela ru jo' najtil roq li xyu'am xmaatani sa' ruq' li Yos, xb'aan naq a'in rajom li Qaawa'.

¹⁹ Jo'wi' anchal, yalaq ani nak'ehe'k xjunkab'lal ut xb'ihomal xb'aan li Yos, nakanab'aak ajwi' chi xyalb'al xsahil ut tz'aqonk chisa', xb'aan naq li xyalb'al xsahil li k'aru xk'anjela, a'an yal qamaatan li nachalk rik'in li Yos.

²⁰ Li Yos naxk'e xsahil qach'ool. Jo'kan naq ink'a' nokook'oxlak chirix li k'aru naqak'ul chiru li qayu'am arin sa' ruuchich'och'.