Eclesiastés 4 - Q'eqchi Bible

Wank naab'al li ch'a'ajkilal arin sa' ruuchich'och'

¹ Chirix chik a'an xink'e reetal naq naab'aleb' neke'rahob'tesiik sa' ruuchich'och', ut eb' laj rahob'tesinel a'aneb' li wankeb' xwankil. Eb' li rahob'tesinb'ileb' yookeb' chi yaab'ak, ab'an maajun nak'ojob'ank xch'ooleb'.

² Toja' naq xinye: “Us xaq reheb' li ak kamenaqeb'! Toq'ob'eb' ru li toj yo'yookeb'!”, chankin.

³ Ab'anan q'axal wi' chik us cho'q reheb' li maji' neke'yo'laak, xb'aan naq maji' rilomeb' li maa'usilal na'uxk sa' li ruuchich'och' a'in.

⁴ Xwil ajwi' naq li ani nak'anjelak chi chaab'il ut chi kaw, a'an nakaqaliik. Ut a'in maak'a' ajwi' rajb'al ut chanchan li chapok iq'.

⁵ Li maak'a' xna'leb' naxmoq'ob' li ruq', ut nachalk li xkamik xb'aan xtz'okajik.

⁶ Ab'anan q'axal us li hilank junpaataq chiru li kawil k'anjelak, xb'aan naq a'in chanchan li chapok iq'.

⁷ Xink'e ajwi' reetal naq wan wi' chik k'a'aq re ru li maak'a' na'ok wi' sa' ruuchich'och'.

⁸ Qayehaq: li junaatal winq, li maak'a'eb' ramiiw, li maak'a' xkok'al chi moko ras riitz'in, ut ink'a' nahilank chi k'anjelak chi moko nak'ojlaak xch'ool rik'in li xnimal xb'ihomal. Li winq a'an maajun sut naxpatz' sa' xch'ool: “Ani aj e li nintawasi wi' wib'? K'a'ut naq ink'a' ninyal xsahil li k'aru nink'anjela?”. A'in ajwi' maak'a' rajb'al ut ink'a' us.

Li junajil nak'ehok kawilal

⁹ Q'axal us naq te'k'anjelaq wiib' poyanam chiru naq taak'anjelaq junaq xjunes, xb'aan naq q'axal us wi' chik taa'elq li k'anjel chiruheb'.

¹⁰ Ut wi li jun taat'ane'q, li jun chik tixwaklesi li rochb'een. Ab'anan toq'ob' ru li wank xjunes, xb'aan naq wi taat'ane'q, maa'ani taatenq'anq re chi wakliik.

¹¹ Jo'kan ajwi', wi wiib' te'ok chi wark sa' jun chi ch'aat, te'xq'ixna rib'. Ab'an li taawarq xjunes, chanru naq tixq'ixna rib'?

¹² Naq junaq poyanam wank xjunes, moko ch'a'aj ta numtaak sa' xb'een. Ab'anan wi wiib'eb', naru te'xkuy xsumenkil sa' li yalok. Jo'kan ajwi' li k'aam li oxib' ru moko junpaat ta nat'upe'k.

Li saaj al ut li ak xtixk

¹³ Q'axal us junaq al neb'a' ut wank xna'leb', chiru jun li awab'ej mama' ut maak'a' xna'leb', li ink'a' naraj nak'ehe'k xna'leb'.

^14-16 Xb'aan naq li awab'ej a'an taakamq ut jalan chik taa'ok sa' xna'aj, q'axal saajaq chik chiru li xkamk. Ut us ta li ak' awab'ej xyo'laak sa' neb'a'il malaj xwank sa' tz'alam, eb' li tenamit te'okenq chirix sa' xtiklajik. Ab'anan timil timil taak'ulmanq a'in: naab'aleb' ink'a' chik sahaqeb' xch'ool rik'in. Ut a'an ajwi' maak'a' xyaalal ut maak'a' rajb'al: chanchan li chapok iq'.