Eclesiastés 12 - Q'eqchi Bible

Chijultiko'q aawe laj Yoob'tesihom aawe

¹ Chijultiko'q aawe laj Yoob'tesihom aawe anaqwan naq toj saajat ut maji' neke'chalk li ink'a' usil kutan. Chalk re li kutan taaye wi': “Maak'a' xsahil linyu'am”, cha'qat.

² Chijultiko'q aawe laj Yoob'tesihom aawe anaqwan, naq toj nak'utunk li saq'e, li po ut eb' li chahim, ut toj wankeb' li choql, us ta ak xk'e li hab'.

³ Taawulaq xq'ehil naq siksootqeb' laj k'aak'alenel, te'chalq xxiweb' li kaweb' rib', te'xkanab' li xk'anjeleb' laj ke'nel xb'aan naq moko k'iheb' ta chik, ut eb' li neke'ilok sa' b'entaan ink'a' chik te'ruhanq chi ilok.

⁴ Naq taachalq li kutan a'an, te'tz'aponq li okeb'aal wankeb' sa' li b'e, taakotzq xyaab' li ke'leb'; eb' li poyanam te'wakliiq sa' xyaab' li xik'anel xul, ab'anan te'ch'anaaq chixjunileb' li b'ich.

⁵ Ut laa'at tatxiwaq chi wank sa' jun li na'ajej najt xteram, ut yooq aaxiw naq tatb'eeq. Naq taachalq li kutan a'an, taa'atz'umaq li almeendr, laj saak tixkelo rib' xb'aan xcheekal, ut maak'a' chik xk'anjel li sahil q'een. Xb'aan naq yookat chi xik sa' li na'ajej tatkanaaq wi' chi junelik. K'e reetal, sa' li b'e ak yo chi ab'iik xyaab'eb' li neke'huyhutk chi yaab'ak xb'aan laakamik.

⁶ Chijultiko'q aawe laj Yoob'tesihom aawe anaqwan naq toj maji' nat'upe'k li plaatil noq' chi moko najore'k li sek' oor; maji' naxxuji rib' li xaar chire li yo'leb'aal ha' chi moko nat'ane'k li suriil sa' li kumb'.

⁷ Naq taachalq li kutan a'an, pojtz' tatsutq'iiq wi', xb'aan naq pojtz' okenaqat; ut laamusiq' taasutq'iiq wi' chik rik'in li Yos xb'aan naq A'an kik'ehok aawe.

⁸ Laa'in laj Ch'olob'anel ninye wi' chik a'in: Maak'a' rajb'al chixjunil li wank sa' ruuchich'och', tik maak'a' rajb'al!

Xraqik li Hu

⁹ Laj Ch'olob'anel a'an jun li winq kiwank xna'leb' ut kixtzoleb' chi us li tenamit. Kixk'e xch'ool chi xtz'ilinkil rix ut xtawb'al xyaalal chixjunil. Kixtz'iib'a ajwi' naab'al li tustuukil na'leb'.

¹⁰ Junelik kixyal xq'e chi xch'olob'ankil chixjunil chi chaab'il jo'wi' xtz'iib'ankil chi tz'aqal re ru.

¹¹ Li raatineb' li wankeb' xna'leb', chanchaneb' li topleb'; ut naq tustuukeb' chi chaab'il sa' hu, chanchaneb' li che' lapb'ileb' xb'aan laj k'aak'alenel sa' xna'ajeb' li xketomq.

¹² At walal, k'e reetal: maajoq'e taaraqe'q xtz'iib'ankil naab'aleb' li hu, ut li numtzolok nalub'tesink.

¹³ Tz'aqalaq li aatin. Ak xinye chixjunil. Chawoxloq'i li Yos ut paab' li xchaq'rab', xb'aan naq a'in naxk'ul wi' rib' chixjunil laatzolb'al.

¹⁴ Sa' junaq kutan li Yos taaraqoq aatin chirix chixjunil li qab'aanuhom, us ta chi muqmu xqab'aanu. Taaraqoq aatin sa' qab'een, a' yaal ma us malaj ink'a' us xqab'aanu.