Eclesiastés 10 - Q'eqchi Bible1 Jun kamenaq utz' naxk'e chi tz'eqe'k jun sek'aq chi sununkil b'an. Jo'kan ajwi' kach'in li memil na'leb' q'axal chik nak'eemank reetal chiru li na'leb' jwal loq'. 2 Li ani wank xna'leb', junelik naxik xch'ool chirix li us, ab'an li maak'a' xna'leb' naxik xch'ool chirix li ink'a' us. 3 Sa' chixjunil li naxb'aanu li jip, nak'utunk li xmajelal xna'leb', us ta naxye naq eb' li junch'ol chik maak'a'eb' xna'leb'. 4 Wi taajosq'o'q sa' aab'een li wank xwankil, mich'inank aach'ool. Relik chi yaal wi wank aakuyum, naru taak'uub' ru li xninqal ch'a'ajkilal. 5 Jun chik li ch'a'ajkilal xwil laa'in sa' ruuchich'och', ut nachalk rik'ineb' li wankeb' sa' li chaq'rab': 6 xink'e reetal naq eb' li maak'a' neke'xnaw wankeb' xninqal ru k'anjel, ut eb' li wankeb' xk'a'uxl ink'a' chaab'il li k'anjel neke'k'ehe'k reheb'. 7 Xwileb' aj mun chi xik chirix kawaay, ut eb' li xninqal ru winq yookeb' chi xik chi roqeb' chanchaneb' laj mun. 8 Li nab'ekok jul, taat'ane'q chisa'. Li ani tixjor li tz'ak, taatiwe'q xb'aan li k'anti'. 9 Li natuqub'ank ru pek, mare tixtiq' rib' chiru. Li natz'irok si', mare tixyok' rib'. 10 Wi naxereto'k li ch'iich' ut ink'a' nak'eemank xq'esnal, tento naq kaw chik tatyok'oq chiru. Q'axal us xb'aanunkil chixjunil sa' xyaalal ut rik'in chaab'il na'leb'. 11 Maak'a' rajb'al naq wank li nanahualink, wi li k'anti' natiwok naq maji' nahualinb'il. 12 Naq na'aatinak li wank xna'leb', sa neke'rab'i chixjunileb'. Ab'an li jip naxsach rib' rik'in li naxye. 13 Naxtikib' aatinak rik'in memil aatin, ut naraqe'k rik'in xyeeb'al li maak'a'il na'leb'. 14 Li jip k'ajo' nawulak chiru aatinak, ab'an maajun naru tixye k'aru taak'ulmanq wulaj kab'ej. K'aru chalk re sa' qab'een? Maa'ani nanawok re. 15 Maak'a' rajb'al naq li jip tixtawasi rib' chi k'anjelak, xb'aan naq chi moko naxnaw li b'e naxik sa' li tenamit. 16 Toq'ob' ru li tenamit wank x'awab'ej toj saaj, jo'wi' junes ninq'ehik neke'xk'oxla li wankeb' xwankil aran. 17 Ab'anan us xaq re li tenamit li wank x'awab'ej chaab'il xch'ool, ut eb' li wankeb' xwankil neke'wa'ak sa' xhonalil re xtawb'al wi' chik xkawilal roq ruq'eb', ut ink'a' yal re kalaak. 18 Wi aj q'emat, taat'ane'q li xb'een laawochoch; ut wi ink'a' nakawaj k'anjelak, chixjunil li ochoch taat'ane'q sa' aab'een. 19 Li wa'ak ut li uk'ak neke'k'ehok sahil ch'oolej; ut li tumin naxk'uub' chixjunil. 20 Maaye yib' aj aatin chirix li awab'ej, us ta aajunes; mat-aatinak chirix li b'ihom chi moko sa' laawarib'aal, xb'aan naq eb' li aatin chanchaneb' li xul neke'rupupik: sa' junpaat taanawmanq chixjunil. |
Q'eqchi DC Bible © Bible Society in Guatemala, 2005.
Bible Society in Guatemala