Deuteronomio 7 - Q'eqchi Bible

Eb' laj Israel ink'a' te'xloq'oni eb' li jalanil yos

¹ “Naq akaq xatroksi li Qaawa' laaYos sa' li ch'och' toxaaweechani, ut naq akaq xrisiheb' chawu eb' li k'iila tenamit (a'eb' laj Hit, laj Kirkás, laj Amor, laj Kanahán, laj Perés, laj Jib ut laj Jebús: wuqub'eb' chi tenamit jwal naab'aleb' ut q'axal kaweb' rib' chawu laa'at),

² naq li Qaawa' laaYos tixq'axtesiheb' sa' laawuq' ut taasach ruheb', tento chatz'eqtaanaheb' ut chamajewaheb' chi junajwa. Maajunaji aawib' rik'ineb' chi moko taatoq'ob'a ruheb'.

³ Mat-ech'alalink rik'ineb', ink'a' taak'e laarab'in reheb' li ralaleb' chi moko taak'am chaq li xrab'ineb' cho'q reheb' laawalal,

⁴ xb'aan naq te'xluktasi xch'ooleb' laawalal li tine'xkanab' ut a' chik eb' li jalanil yos te'xloq'oni. Rik'in a'an taachalq xjosq'il li Qaawa' sa' eeb'een ut texxsach chi junpaat.

⁵ A'an a'in li tento teeb'aanu: juk'umaq eb' li x'artal li wuqub' chi tenamit a'an, putz'ihomaq li xxaqab'anb'il pekeb', chetoqi eb' li xloq'laj toon che' ut teek'e xxamlel li xyoseb'.

⁶ Xb'aan naq laa'at jun tenamit q'axtesinb'il cho'q re li Qaawa' laaYos. A'an xsik'ok aawu sa' xyanqeb' chixjunil li tenamit li wankeb' sa' ruuchich'och' re naq laa'ataq tz'aqal li xtenamit.

Laj Israel sik'b'il ru xb'aan li Qaawa'

⁷ “Moko xb'aan ta naq numtajenaqex chiru chixjunileb' li tenamit naq koho ta xch'ool li Qaawa' cherix re xsik'b'al eeru (laa'ex jun ch'ina tenamit ink'a' k'ihex),

⁸ kixsik' b'an eeru xb'aan naq nekexra ut sa' xk'ab'a' li jurament kixxaqab' rik'ineb' leena' leeyuwa'. Jo'kan naq li Qaawa' kexrisi chaq rik'in xwankil li ruq' ut kexrach'ab' chaq sa' rochochil li munil, rub'el xwankil laj Parahón, awab'ej re Ejiipt.

⁹ K'e b'i' sa' xnaq' aawu naq li Qaawa' laaYos a'an tz'aqal Yos, a' li Yos tiik xch'ool li naxpaab' li xSumwank ut junelik wank li xrahom rik'ineb' li neke'rahok re ut neke'xpaab' li xchaq'rab'.

¹⁰ Ab'anan naxrahob'tesiheb' sa' li xjunxaqalileb' li xik' neke'ilok re, ut chi junpaat naxsacheb' ru. Maak'a' xkuyum rik'in li natz'eqtaanank re, ut naxk'e chi xtojb'al rix li xmaak.

¹¹ K'uula sa' laach'ool li chaq'rab', li aatin ut chixjunil li k'aru nakatintaqla xk'anjelankil ru sa' li kutan a'in.

Li rosob'tesihom li Yos wank sa' xb'eeneb' li neke'xpaab' li xchaq'rab'

¹² “Wi taak'e reetal eb' li chaq'rab' a'in, wi taapaab' ut taak'anjela ruheb', relik chi yaal naq li xSumwank li Qaawa' laaYos ut li xrahom twanq aawik'in, jo' kixyeechi'i reheb' laana' laayuwa'.

¹³ Tatxra, tatrosob'tesi, tatnaab'alob'resi, trosob'tesiheb' laawalal aak'ajol ut laawawimq: laawixim, laawuk'a', laa'aseeyt, eb' li ral laawakax, eb' li ral laakarneer, sa' li ch'och' kixyeechi'i reheb' laana' laayuwa' cho'q aawe laa'at.

¹⁴ Q'axal osob'tesinb'ilaqat chiru chixjunileb' li tenamit. Maak'a'aq aawik'in teelom ut ixq li ink'a' ta te'alanq, chi moko sa' xyanqeb' laaketomq.

¹⁵ Li Qaawa' trisi aawik'in chixjunil li yajel; maajun junaq reheb' li xninqal rahilal li ak aawilom ru aran Ejiipt taachalq sa' aab'een, taaxik b'an rik'ineb' chixjunil li xik' neke'ilok aawe.

¹⁶ Jo'kan utan, chasacheb' ru chixjunileb' li tenamit li tixk'e sa' laawuq' li Qaawa' laaYos; maak'e reetal xtoq'ob'aal ruheb' chi moko chaloq'oni ru li xyoseb', xb'aan naq a'anaq aara'lenkil.

¹⁷ “Mare anchal taaye sa' laach'ool: «Eb' li tenamit a'in q'axal naab'aleb' chik chiwu laa'in. Chanru naq twaanilasiheb'?», cha'qat.

¹⁸ Ab'an matxiwak chiruheb', jultiko'q aawe li kixb'aanu li Qaawa' laaYos rik'in laj Parahón ut chixjunil Ejiipt,

¹⁹ eb' li xiwajel rahilal li kawil rik'ineb' laawu, eb' li sachb'ach'oolej ut xninqal b'aanuhom: chanru naq li Qaawa' laaYos katrisi chaq rik'in xnimal xwankil. Jo'kan ajwi' tixb'aanu li Qaawa' laaYos reheb' chixjunil li tenamit nakaxiwaheb' ru.

²⁰ Li Qaawa' laaYos tixtaqla ajwi' eb' li ch'ub' chi xsachb'aleb' li te'kole'q ut te'xmuq rib' chawu.

²¹ Jo'kan b'i', maaxiwa ruheb' xb'aan naq wank aawik'in li Qaawa' laaYos, li Yos nim xwankil ut xiwajel.

²² Timil timil li Qaawa' laaYos trisiheb' chawu eb' li tenamit a'an. Moko tatruhanq ta xsachb'aleb' chi junpaat: mare anchal te'xtuub' rib' sa' aab'een chixjunileb' li josq' aj xul.

²³ Ab'an li Qaawa' laaYos tixq'axtesiheb' sa' laawuq' ut toxsacheb', toj reetal te'oso'q chi junajwa.

²⁴ Tixq'axtesiheb' li awab'ej sa' laawuq' ut laa'at taasach li xk'ab'a'eb' junsut junrub'el choxa: maajun reheb' te'kuyuq sa' aawuq', toj reetal taasacheb' ru.

²⁵ Taak'ateb' li xjalam u li xyoseb'. Maarahi ru li oor ut li plaat b'onb'ileb' wi', chi moko taaxok cho'q aawe; mext'ane'k sa' li aaleek a'an, xb'aan naq a'an yib'eetal chiru li Qaawa' laaYos.

²⁶ Maawoksi sa' laawochoch junaq k'a' re ru yib'eetal ru, re naq ink'a' majewanb'ilaqat jo'eb' a'an; tz'eqtaananb'ilaqeb' b'an chawu xb'aan naq teneb'anb'il li oso'k sa' xb'een chixjunil a'an.