Deuteronomio 27 - Q'eqchi Bible

IV. XNINQ'EHINKIL LI SUMWANK (27-28) Eb' li loq'laj pek ut li artal sa' li tzuul Ebal

¹ Laj Moisés ut eb' li xcheekel winqilal aj Israel ke'xk'e li chaq'rab' a'in sa' xb'een li tenamit: “Chepaab'aq chixjunil li chaq'rab' li tinch'olob' cheru sa' li kutan a'in.

² Naq texnume'q junpak'al li nima' Jordán re ok sa' li ch'och' tixk'e eere li Qaawa' leeYos, teexaqab' ninqi pek, teesaqob'resiheb' rik'in chun

³ ut teetz'iib'a chiruheb', chixjunil li raatinul li chaq'rab' a'in. Teeb'aanu a'in naq toxex'okaq sa' li xq'emal ch'och' tixk'e eere li Qaawa' leeYos, kama' kixye eere li Qaawa', li xYos eb' leexe'toonil yuwa'.

⁴ Ut naq akaq xexnume'k junpak'al li nima' Jordán, teexaqab'eb' li pek a'in sa' li tzuul Ebal, kama' yookin chi xyeeb'al eere anaqwan, ut teesaqob'resiheb' rik'in chun.

⁵ Aran taayiib' jun li artal rik'in pek sa' xk'ab'a' li Qaawa' laaYos: ink'a' taatuqub' ru rik'in ch'iich'.

⁶ Taayiib' li x'artal li Qaawa' laaYos rik'in pek ink'a' q'unob'resinb'il ru, ut sa' xb'een li artal taayeechi'i k'atb'il mayej chiru li Qaawa' laaYos.

⁷ Aran ajwi' taayeechi'i laamayej re xk'amb'al aawib' sa' usilal rik'in li Yos; tatwa'aq ut taasaho'q aach'ool chiru li Qaawa' laaYos.

⁸ Ut taatz'iib'a chixjunil li raatinul li chaq'rab' a'in chiruheb' li pek a'an. Taatz'iib'a chi chaab'il”, chan laj Moisés.

⁹ Chirix chik a'an laj Moisés ut eb' laj tij aj Leví ke'aatinak reheb' chixjunil laj Israel chi jo'ka'in: “Mat-eek'ank ut ab'i, Israel. Sa' li kutan a'in laa'at chik li xtenamit li Qaawa' laaYos.

¹⁰ Taawab'i li xyaab' xkux li Qaawa' laaYos ut taak'anjela ru li chaq'rab' ut eb' li aatin yookin chi xjultikankil aawe sa' li kutan a'in”, chankeb'.

Kab'laju chi majewal

¹¹ Sa' ajwi' li kutan a'an laj Moisés kixchaq'rab'iheb' li tenamit chi jo'ka'in:

¹² “A'aneb' a'in li te'xaqliiq sa' li tzuul Karisín re rosob'tesinkil li tenamit, naq akaq xexnume'k junpak'al li nima' Jordán: laj Simehón, laj Leví, laj Judá, laj Isakar, laj José ut laj Benjamín.

¹³ Ut a'aneb' a'in li toxe'xk'e rib' sa' li tzuul Ebal re xmajewankil li tenamit: laj Rubén, laj Gad, laj Aser, laj Sabulón, laj Dan ut laj Neftalí.

¹⁴ Toja' naq eb' laj Leví te'ok chi aatinak ut te'xye reheb' chixjunil laj Israel chi kaw xyaab'eb' xkux:

¹⁵ «Tz'eqtaananb'ilaq li winq li taayiib'anq junaq jalam u rik'in che' malaj rik'in ha'lesinb'il ch'iich' re naq te'xloq'oni sa' muqmu. A'an ink'a' nawulak chiru li Qaawa': yal xyiib'ahom winq rik'in ruq'». Ut chixjunil li tenamit te'chaq'oq ut te'xye: «Jo'kan».

¹⁶ «Tz'eqtaananb'ilaq li ani tixtz'eqtaana li xna' xyuwa'». Ut chixjunil li tenamit te'xye: «Jo'kan».

¹⁷ «Tz'eqtaananb'ilaq li ani tixjilosi xnub'ajl li ras riitz'in». Ut chixjunil li tenamit te'xye: «Jo'kan».

¹⁸ «Tz'eqtaananb'ilaq li ani tixjal xb'e junaq mutz'». Ut chixjunil li tenamit te'xye: «Jo'kan».

¹⁹ «Tz'eqtaananb'ilaq li ani tixq'et li xk'ulub' laj ab'l tenamit, li neb'a'yox ut li xmalka'an». Ut chixjunil li tenamit te'xye: «Jo'kan».

²⁰ «Tz'eqtaananb'ilaq li ani taayoklaaq rik'in li rixaqil li xyuwa', xb'aan naq tixk'ut xxutaan li xyuwa'». Ut chixjunil li tenamit te'xye: «Jo'kan».

²¹ «Tz'eqtaananb'ilaq li ani taayoklaaq rik'in yalaq k'aru chi xulil». Ut chixjunil li tenamit te'xye: «Jo'kan».

²² «Tz'eqtaananb'ilaq li ani taayoklaaq rik'in li ranab', xrab'in li xyuwa' malaj xko' li xna'». Ut chixjunil li tenamit te'xye: «Jo'kan».

²³ «Tz'eqtaananb'ilaq li ani taayoklaaq rik'in li xna' li rixaqil». Ut chixjunil li tenamit te'xye: «Jo'kan».

²⁴ «Tz'eqtaananb'ilaq li ani tixkamsi li ras riitz'in sa' muqmu». Ut chixjunil li tenamit te'xye: «Jo'kan».

²⁵ «Tz'eqtaananb'ilaq li ani taak'uluq tumin re xkamsinkil junaq li maak'a' xmaak». Ut chixjunil li tenamit te'xye: «Jo'kan».

²⁶ «Tz'eqtaananb'ilaq li ani ink'a' tixpaab' li chaq'rab' a'in ut ink'a' tixk'anjela ru». Ut chixjunil li tenamit te'xye: «Jo'kan».