Deuteronomio 21 - Q'eqchi Bible

Chirix naab'aleb' li chaq'rab'

¹ “Wi sa' li ch'och' li tixk'e aawe li Qaawa' laaYos taatawmanq junaq winq kamenaq, jiljooq sa' pim, chi ink'a' taanawmanq ani xkamsink re,

² te'chalq laatiixil winq ut eb' laj nawonel chaq'rab' wankeb' sa' eeyanq ut te'xb'is xyanq li kamenaq rik'ineb' li tenamit wankeb' sa' xsutam.

³ Toja' naq eb' li cheekel winq re li tenamit li jwal nach' wank rik'in li kamenaq, te'xchap junaq ral li wakax li toj maji' xyalom k'anjelak chi moko ak k'eeb'il b'itche' chirix xkux.

⁴ Li xcheekelal li tenamit te'xkub'si li saaj wakax sa' jun roqha' li ink'a' nachaqik, b'arwi' maajun wa uxb'il b'ekok ch'och' chi moko awk, ut aran sa' li roqha' te'xtoq xkux li saaj wakax.

⁵ “Chirix chik a'an te'chalq eb' laj tij, eb' li ralal xk'ajol laj Leví, xb'aan naq a'aneb' li sik'b'ileb' ru xb'aan li Qaawa' laaYos chi k'anjelak chiru ut chi osob'tesink sa' xk'ab'a' li Qaawa', ut a'aneb' yaaleb' re chi xk'uub'ankil ru chixjunil li ch'a'ajkilal ut chixjunil li sak'ok ib'.

⁶ Toja' naq chixjunileb' li cheekel winq li wankeb' sa' li tenamit nach' wank rik'in li winq kamenaq, te'xch'aj ruq'eb' sa' li roqha', sa' xb'een li saaj wakax toqb'il xkux,

⁷ ut te'xye eb' li aatin a'in: «Maawa' laa'o xookamsink re li winq a'in chi moko xqil ani xb'aanunk re.

⁸ At Qaawa', chakuy xmaakeb' laatenamit Israel li xakoleb' rix, ut maak'e taxaq sa' qab'een li xkamik li winq a'in li maak'a' xmaak», cha'qeb'. Chi jo'kan te'kanaaq chi kolb'ileb' rix chiru li kik' a'an,

⁹ ut laa'at taab'aanu li us chiru li Qaawa' ut taawisi sa' eeyanq li maak a'an.

¹⁰ “Naq tatxik chi yalok rik'ineb' li xik' neke'ilok aawe ut li Qaawa' laaYos tixq'axtesiheb' chi preexil sa' laawuq',

¹¹ wi taawil aran junaq ch'ina'usil ixq ut taaxik aach'ool chirix ut taawaj xk'amb'al cho'q aawixaqil,

¹² naru taak'am sa' laawochoch. Ab'anan xb'enwa li ixq a'an tixk'e chi b'ese'k li rismal xjolom, tixset li rixi'jil li ruq',

¹³ taarisi li xtiqb'al wanq chirix naq xchape'k ut taakanaaq sa' laawochoch chi yaab'ak jun pohaq chirixeb' li xna' xyuwa'. Toja' naq tatjiloq chi xk'atq, ut laa'ataq li xb'eelom ut a'anaq laawixaqil.

¹⁴ Wi moqon taaweek'a naq ink'a' chik twulaq chawu, taakanab' chi xik chi ach'ab'anb'il ut moko truuq ta taak'ayi chi tuminal, chi moko taak'e cho'q aamun ixq, xb'aan naq ak xamux ru.

¹⁵ “Mare junaq winq wank wiib' rixaqil, jun reheb' li ixq a'an raaro ut li jun chik ink'a', ut chi xkab'ichaleb' (li raaro ut li ink'a' raaro) xk'ehomeb' ralal xk'ajol li winq. Wi li xb'een alalb'ej, a'an xyum li ixq ink'a' raaro,

¹⁶ sa' xkutankil naq tixjek'i li k'aru wank re sa' xyanqeb' li ralal xk'ajol, moko taaruuq ta tixxaqab' cho'q xb'een alalb'ej li ralal li ixq jwal naxra, re xsachb'al xwankil li xyum li ixq ink'a' naxra, a' li tz'aqal xb'een alalb'ej.

¹⁷ Tento b'an tixk'e sa' xnaq' ru naq li xyum li ixq li ink'a' naxra, a'an li xb'een alalb'ej. Tento tixk'e re li xka' k'ihal chixjunil li k'aru wank re, xb'aan naq li alalb'ej a'in, xb'een ru li xwinqilal, wank xk'ulub' cho'q xb'een alalb'ejil.

¹⁸ “Mare junaq winq wank junaq ralal yib'ru xna'leb' ut q'etq'et, li ink'a' narab'i xyaab' xkux li xna' xyuwa'. Us ta naq'use'k, ab'an ink'a' na'ab'ink chiru li xna' xyuwa'.

¹⁹ Toja' naq li xna' xyuwa' te'xchap ut te'xk'am wan wi' li rokeb'aal li tenamit, rik'ineb' li cheekel winq,

²⁰ ut te'xye reheb': «Li qalal qak'ajol a'in ink'a' napaab'ank ut ink'a' nokoorab'i; a'an aj sub'ul kutan ut aj kalajenaq», cha'qeb'.

²¹ Ut chixjunileb' li winq li wankeb' sa' tenamit te'xteni chi pek toj reetal taakamq. Chi kama'an taawisi li maa'usilal sa' eeyanq, ut naq chixjunileb' laj Israel te'xnaw a'in, te'ok xxiw.

²² “Wi wank junaq winq chapcho ut teneb'anb'il kamk sa' xb'een xb'aan naq xb'aanu li maak, taat'uyub' chiru jun toon chi che'.

²³ Ab'an maakanab' jun q'oqyinaq li xtib'el chiru li che'; taamuq b'an sa' ajwi' li kutan a'an, xb'aan naq junaq winq t'uyt'u, a'an majewanb'il xb'aan li Qaawa'. Chi jo'kan ink'a' taamux ru li ch'och' li tixk'e chaweechani li Qaawa' laaYos.