Deuteronomio 14 - Q'eqchi Bible

¹ “Laa'ex ralal xk'ajol li Qaawa' leeYos. Ink'a' teelet'exi leetib'el chi moko teejo b'ayaq leepekem yal sa' xk'ab'a' junaq kamenaq.

² Xb'aan naq laa'at jun tenamit q'axtesinb'ilat re li Qaawa' laaYos, ut A'an xsik'ok aawu re naq laa'ataq li xtz'aqal tenamit sa' xyanqeb' chixjunil li tenamit li wankeb' sa' ruuchich'och'.

Eb' li tz'ajn aj xul ut eb' li ink'a'

³ “Maatzeka li k'aru tz'eqtaananb'il xb'aan li Qaawa'.

⁴ “A'aneb' a'in li xul naru xtzekankileb': li wakax, li karneer, li chib'aat,

⁵ li kej, li yuk, li xchib'aat k'iche', li wakax maak'a' xxukub', li kamuus.

⁶ Chixjunil li xul xalxo rixi'jil li roq, a'eb' li xul li ka'sut neke'xhab'le li xwaheb', naru teetzekaheb'.

⁷ “Ab'anan, sa' xyanqeb' li ka'sut neke'xtoq'ini li xwaheb' ut sa' xyanqeb' li xul xalxo li rixi'jil li roqeb', ink'a' naru teetzeka eb' a'in: li kameey, li xul chanchan li imul, li kaqkoj, xb'aan naq eb' a'in neke'xhab'le xka'sutil li xwaheb', ab'an moko xalxo ta rixi'jil li roqeb'. A'anaqeb' tz'ajn aj xul cho'q aawe.

⁸ Jo'kan ajwi' li aaq xalxo rixi'jil li roq, ab'anan ink'a' naxhab'le xka'sutil li xwa: a'anaq ajwi' tz'ajnil xul cho'q aawe. Moko teetzeka ta li xtib'el chi moko teech'e' naq ak kamenaq chik.

⁹ “A'an a'in li naru teetzeka sa' xyanqeb' li xul neke'wank sa' li ha': chixjunil li wankeb' xxik' ut xsol rixeb', a'aneb' naru teetiw.

¹⁰ Ab'an ink'a' teetiw li maak'a'eb' xxik' ut xsol rixeb': a'anaq tz'ajn aj xul cho'q eere.

¹¹ “Naru teetzeka chixjunileb' li xik'anel xul li maak'a' xtz'ajnileb'.

¹² Ab'an eb' a'in ink'a' naru teetzeka: li t'iw, li q'eqik'uch, li xk'uch nima',

¹³ li so'sol, li jalan jalanq chi k'uchil,

¹⁴ eb' li k'iila paay chi tz'oq,

¹⁵ laj tak' ru, li warom, li xjotzha', chixjunil xpaayil li k'uch,

¹⁶ li xyuwa'ileb' li warom, li ib'is nayeemank re, li jotz,

¹⁷ li tz'oq, li kalamón, li somormujo,

¹⁸ li nimla jotz, chixjunil xpaayil li jotz, li mo' ut laj tz'uum xik'.

¹⁹ “Chixjunil li kok' utz' li wankeb' xxik', tz'ajnaq cho'q eere ut ink'a' naru teetzeka.

²⁰ Ab'an chixjunil li kok' utz' neke'rupupik li ink'a' tz'ajneb' cho'q eere, naru teetzekaheb'.

²¹ “Maajun li xul li teetaw chi ak kamenaq naru teetzeka, taak'e b'an re laj ab'l tenamit li wank sa' eeyanq, re naq a'an taatzekanq re; wi ut ink'a', k'ayi re jalan chik. Xb'aan naq laa'at jun tenamit q'axtetesinb'ilat re li Qaawa' laaYos. “Maachiq li ch'ina chib'aat sa' li xya'al xtu' li xna'.

Li xlajeetqil ru chixjunil li awimq

²² “Rajlal chihab' taajek' li xlajeetqil ru chixjunil laawawimq cho'q re li Qaawa', a' li naruuchini li ch'och' rajlal chihab',

²³ ut taatzeka chiru li Qaawa' laaYos, sa' li na'ajej xaqab'anb'il xb'aan cho'q xna'aj li xk'ab'a': li xlajeetqil laatriiw, laamoost, laa'aseeyt, jo'wi' li xb'een ral laawakax ut laakarneer. Chi jo'kan taatzol roxloq'inkil li Qaawa' laaYos chiru chixjunil laayu'am.

²⁴ Ab'an wi li Qaawa' laaYos ak xatrosob'tesi ut jwal najt aawik'in li na'ajej sik'b'il ru xb'aan li Qaawa' cho'q re li xk'ab'a' ut ink'a' taakuy riiqankil laamayej aran,

²⁵ toja' naq taajal chi tuminil, taak'am li tumin sa' laawuq' ut tatxik sa' li na'ajej sik'b'il ru xb'aan li Qaawa' laaYos.

²⁶ Aran taawoksi li tumin rik'in xloq'b'al yalaq k'aru taawaj, a' yaal ma wakax malaj karneer, b'iin malaj k'ahil ha', chixjunil li k'aru taawulaq chawu. A'an truuq taatzeka aran, chiru li Qaawa' laaYos, ut taasaho'q sa' aach'ool laa'at aawochb'een laajunkab'lal.

²⁷ “Maakanab' xjunes laj Leví li wank sa'atqeb' laatenamit, xb'aan naq maak'a' wank re ut ink'a' xtz'aqk na'ajej aawik'in.

²⁸ “Rajlal ox ox chihab', taawisi xjunes li xlajeetqil ru chixjunil laawawimq re li chihab' a'an, ut taak'e chire laawochoch.

²⁹ Chi jo'kan taachalq laj Leví li maak'a' wank re chi moko xtz'aqk na'ajej aawik'in, te'chalq laj ab'l tenamit, li maak'a' xna' xyuwa', eb' li xmalka'an li wankatqeb' sa' laatenamit, te'wa'aq toj reetal te'k'ojlaaq xch'ool, re naq li Qaawa' laaYos tatrosob'tesi sa' chixjunil li k'anjel taatikib' xb'aanunkil.