Deuteronomio 12 - Q'eqchi Bible

III. EB' LI CHAQ'RAB' K'EEB'ILEB' RE LI TENAMIT (12-26) Li jun chi na'ajej te'loq'oninq wi' eb' laj Israel

¹ “A'aneb' a'in li aatin ut li chaq'rab' li tento teek'anjela ru chixjunil li kutan re leeyu'am sa' li ch'och' tixk'e chereechani li Qaawa', xYos eb' leena' leeyuwa'.

² “Teesach chi junajwa chixjunileb' li na'ajej b'arwi' neke'xloq'oni li xyoseb' eb' li tenamit teereechani: teesach sa' xb'eeneb' li tzuul, sa' xb'eeneb' li b'ool ut rub'elatq chixjunil li xchaq'alil ru che'.

³ Juk'umaq li x'artaleb', puk'iiq li xxaqab'anb'il pekeb', k'atomaq li xtoon che' neke'xloq'oni ru, putz'ihomaq eb' li xjalam u li xyoseb', ut sachomaq li xk'ab'a'eb' sa'eb' li na'ajej a'an.

⁴ “Meeloq'oni ru li Qaawa' leeYos jo' neke'xb'aanu eb' a'an.

⁵ Laa'ex tento toxeesik' chaq li Qaawa' leeYos ka'ajwi' sa' li na'ajej xaqab'anb'il xb'aan, sa' xyanq chixjunileb' li teep, re naq aran taahilanq li xk'ab'a'.

⁶ Sa' li na'ajej a'an texmayejaq, teekamsi ut teek'at leexul; teek'am li xlajeetqil li k'a'aq re ru eere, leetenq'aal jo'wi' li na'alaak sa' leech'ool, eb' li xb'een ral leeninq ut kok' ketomq.

⁷ Aran textzekanq chiru li Qaawa' leeYos ut taasaho'q leech'ool, eerochb'een leejunkab'al, sa' xk'ab'a' chixjunil li k'anjel xexrosob'tesi wi' li Qaawa' leeYos.

⁸ “Sa' li na'ajej a'an meeb'aanu jo' naqab'aanu laa'o arin anaqwan, b'arwi' li junjunq naxb'aanu jo' chanru nawulak chiru xb'aanunkil,

⁹ xb'aan naq toj maji' nekexwulak sa' li na'ajej b'arwi' texhilanq sa' xyaalal, a' li toxeereechani sa' xk'ab'a' li Qaawa'.

¹⁰ Ab'an naq akaq xexnume'k junpak'al li nima' Jordán ut wanqex sa' li ch'och' xk'ehom chereechani li Qaawa' leeYos, naq akaq kolb'ilex chiruheb' chixjunil li xik' neke'ilok eere li sutsuukex wi' ut naq sa chik wanqex,

¹¹ toja' naq teek'am chixjunil li k'aru nekexintaqla wi' anaqwan, teeroksi sa' li na'ajej xaqab'anb'il xb'aan li Qaawa' leeYos cho'q rochochil li xk'ab'a': teek'am leek'atb'il mayej ut leeyeechi'om, li xlajeetqil li k'a'aq re ru eere, leetenq'aal jo'wi' li na'alaak sa' leech'ool, li q'axal chaab'il mayej eeyeechi'om sa' jurament re li Qaawa'.

¹² Aran taasaho'q eech'ool chiru li Qaawa' eerochb'eeneb' leeralal eek'ajol, eb' laj k'anjel cheru jo' winq ut ixq, jo' ajwi' eb' laj Leví li wankeb' sa' eeyanq, xb'aan naq ink'a' xk'ulumeb' li xna'ajeb'.

¹³ “K'e reetal, maayeechi'i laak'atb'il mayej sa' yalaq k'a' chi na'ajejil taataw:

¹⁴ ka'ajwi' sa' li na'ajej sik'b'il ru xb'aan li Qaawa' sa' xyanqeb' laateep naru taayeechi'i laak'atb'il mayej; ka'ajwi' aran taab'aanu chixjunil li nakatintaqla wi'.

¹⁵ Ab'an, wi taawaj, truuq tatkamsinq ut taatzeka li tib' sa' chixjunileb' li tenamit jo' rosob'tesihom li Qaawa' laaYos li xk'ehom aawe. Naru teetzeka chejunilex, us ta muxb'ilex, kama'aq xtzekankil xtib'el li kej malaj li yuk.

¹⁶ Ka'ajwi' li xkik'el li xul ink'a' naru teetzeka; tento teehoy chiru ch'och' jo' naq nekehoy li ha'.

¹⁷ “Ink'a' naru taatzeka sa' laatenamit li xlajeetqil laatriiw, li uub', li aseeyt, chi moko eb' li xb'een ral laaninq ut kok' ketomq. Maajun reheb' laamayej, laatenq'aal, laayeechi'om malaj li na'alaak sa' laach'ool naru taatzeka yalaq b'ar sa' laatenamit.

¹⁸ Taatzeka eb' a'in naq wanqex chiru li Qaawa' laaYos, sa' li na'ajej sik'b'il ru xb'aan li Qaawa' laaYos, ut ka'ajwi' aran tattzekanq aawochb'eeneb' laawalal aak'ajol, eb' laj k'anjel chawu jo'wi' eb' laj Leví li wankeb' sa' eeyanq. Ut sahaq sa' laach'ool chiru li Qaawa' laaYos rik'in chixjunil li k'anjel xab'aanu.

¹⁹ K'e reetal, maatz'eq chirix aach'ool eb' laj Leví jo' najtil wanqat sa' ruuchich'och'.

²⁰ “Naq li Qaawa' laaYos tixyu' ru laana'aj jo' kixye aawe, ut laa'at taawaj tzekank tib', truuq taatzeka, a' yaal jo'q'e taawaj.

²¹ Wi li na'ajej sik'b'il ru xb'aan li Qaawa' laaYos cho'q rochochil li xk'ab'a' jwal najt wank aawik'in, truuq taakamsi junaq re laaninq malaj kok' ketomq li xk'ehom aawe li Qaawa', ut taatzeka jo'nimal taawaj sa' li na'ajej wanqat wi', jo' chanru laa'in xinye aawe.

²² Taatzeka jo' tz'aqal natzekaak li kej malaj li yuk. Truuq teetzeka chejunilex, us ta muxb'ilex.

²³ Ab'anan ink'a' naru teetzeka li xkik'el li xul, xb'aan naq li kik' a'an yu'am, ut ink'a' naru teetzeka li yu'am rochb'een li tib'.

²⁴ Ink'a' taatzeka, taahoy b'an chiru ch'och' kama' nakahoy li ha'.

²⁵ Maatzeka li kik' re naq sa wanqat chiru laayu'am, aawochb'eeneb' laawalal aak'ajol, rik'in xb'aanunkil li q'axal us chiru li Qaawa'.

²⁶ Li k'a'aq re ru ak q'axtesinb'il re li Yos ut ak aayeechi'om sa' jurament, tento taaq'axtesi sa' li na'ajej sik'b'il ru xb'aan li Qaawa'.

²⁷ Aran, sa' xb'een li x'artal li Qaawa' laaYos, taak'at laamayej. Ut li xkik'el laakames taahoy sa' xb'een li x'artal li Qaawa' laaYos; ab'an naru taatzeka li tib'.

²⁸ “Ab'i ut paab' chixjunil li nakatintaqla wi', re naq junelik sa wanqat laa'at jo'wi' eb' laawalal aak'ajol, rik'in xb'aanunkil li q'axal us ut tiik chiru li Qaawa' laaYos.

²⁹ “Naq li Qaawa' laaYos akaq xsacheb' ru li tenamit li teereechani laa'ex, naq akaq xawisiheb' ut wanqat sa' li xch'och'eb',

³⁰ chak'e reetal, maak'e aawib' chi b'alaq'iik: maab'aanu li neke'xb'aanu eb' a'an, maataaqe li xyoseb' chi moko chapatz'eb'. Maaye anchal: «Chan anchal ru neke'xloq'oni li xyoseb' li tenamit a'in? Jo'kan ajwi' tinb'aanu laa'in».

³¹ Maab'aanu chi jo'kan re li Qaawa' laaYos. Xb'aan naq chixjunil li tz'i'b'eetal chiru li Qaawa', chixjunil li tz'eqtaananb'il xb'aan, neke'xb'aanu eb' a'an re xloq'oninkil li xyoseb': a' ajwi' eb' li ralal ut xrab'ineb' neke'xk'at sa' xk'ab'a'eb' li xyos!

³² “Chepaab' ut chek'anjela ru li xexintaqla wi' chi maak'a' teetiq ru chi moko teerisi.