Daniel 9 - Q'eqchi Bible

Laj Daniel kitijok chiru li Yos

¹ “Sa' li xb'een xchihab' chi awab'ejink laj Darío, ralal laj Asuero, aj Media, sa' xb'eeneb' laj Kaldeha,

² laa'in laj Daniel kin'ok chi xtz'ilinkil rix li lajeeb' xkaak'aal chihab' taawanq wi' chi juk'b'il ru li tenamit Jerusalén, jo' kiyehe'k re laj Jeremías xb'aan li Yos.

³ Kintijok chiru li Qaawa', kintz'aamank ut kin'elajink rik'in ayuunik ut xb'atb'al wib' sa' q'es ruhil t'ikr, ut kink'ojob' wib' sa' cha.

⁴ Kinxooto li qamaak chiru li Qaawa' linYos ut kinye re: «At Qaawa', at Nimajwal Yos nim aawankil, laa'at junelik nakapaab' laaSumwank ut nakak'ut naq xaqxo laarahom rik'ineb' li neke'rahok aawe ut neke'xpaab' laachaq'rab'.

⁵ Xoomaakob'k, ink'a' us xoowank ut xqab'aanu li maa'usilal. Xqaq'etq'eti qib' chawu naq xqatz'eq chirix li qach'ool laachaq'rab' ut laataqlahom.

⁶ Ink'a' xoo'ab'ink chiruheb' li propeet, laj k'anjeleb' chawu, li xe'aatinank sa' laak'ab'a' eb' li awab'ej, eb' laj k'amol qab'e, eb' li qaxe' qatoon jo'wi' chixjunil li tenamit.

⁷ «At Qaawa', aawe li tiikilal ut qe laa'o li xutaan anaqwan ut junelik. Xutaanal wanko laa'o laj Judá: eb' li wankeb' Jerusalén ut chixjunileb' laj Israel, eb' li wankeb' chi nach' ut eb' li wankatqeb' chi najt sa'eb' li tenamit xacha'cha'iheb' wi' xb'aan naq xe'q'etq'eto'k chawu.

⁸ At Qaawa', xnumtaak li xutaan sa' qab'een, sa' xb'eeneb' li awab'ej, eb' laj k'amol qab'e jo' ajwi' sa' xb'eeneb' li qaxe' qatoon xb'aan naq xqaq'et laachaq'rab'.

⁹ At Qaawa', at qaYos, laa'at aj uxtaanat ut nakatoq'ob'a qu, us ta xqaq'etq'eti qib' chawu

¹⁰ ut ink'a' xqaj rab'inkil laawaatin chi moko xqapaab' li chaq'rab' yeeb'il chaq qe xb'aaneb' li propeet, laj k'anjeleb' chawu.

¹¹ Chixjunileb' laj Israel xe'xq'et laachaq'rab' ut ink'a' xe'raj xpaab'ankil laawaatin. Jo'kan naq xchalk sa' qab'een li majewank ut li raaxiik' tz'iib'anb'il sa' li xChaq'rab' laj Moisés laamoos, xb'aan naq xoomaakob'k chawu.

¹² «Li Qaawa' xb'aanu li yeeb'il chaq chiqix ut chirixeb' laj jolominel qe: xtaqla chaq jun nimla rahilal sa' qab'een ut sa' xb'een Jerusalén, li maajun wa k'ulb'il junsutaq sa' ruuchich'och'.

¹³ Chixjunil li rahilal a'in xchalk sa' qab'een jo' tz'aqal tz'iib'anb'il sa' li xChaq'rab' laj Moisés; ab'an laa'o ink'a' xqayal xtuulanob'resinkil li Qaawa' li qaYos: ink'a' xqakanab' xb'aanunkil li maa'usilal chi moko naqaj xpaab'ankil li yaal.

¹⁴ Jo'kan naq li Qaawa' kixk'uub' chi junxilaj li rahilal a'in ut anaqwan xtaqla chaq sa' qab'een, xb'aan naq tiik xch'ool li Qaawa' li qaYos ut laa'o ink'a' xqaj rab'inkil li xyaab' xkux.

¹⁵ «At Qaawa', at qaYos, laa'at kak'ut li xnimal aawankil naq kawisiheb' chaq laatenamit aran Ejiipt. Sa' xk'ab'a' a'an q'axal nawno aawu chalen toj anaqwan, ab'an laa'o xoomaakob'k ut xqab'aanu li ink'a' us.

¹⁶ At Qaawa', laa'o naqanaw naq aj uxtaanat. Chakuy qamaak, najtob'resi laajosq'il rik'in Jerusalén: a'an laasantil tenamit ut laaloq'laj na'aj. Qamaak laa'o ut xb'aan li xmaa'usilaleb' li qana' qayuwa' se'enb'il chik Jerusalén jo'wi' eb' laawalal aak'ajol xb'aaneb' chixjunil li tenamit wankeb' chi qasutam.

¹⁷ Ab'i taxaq lintij anaqwan, at qaYos; ab'i li xtz'aamahom laj k'anjel chawu, ut sa' xk'ab'a' laarahom chawil xtoq'ob'aal ru laasantil Muheb'aal li nakirnak.

¹⁸ K'e chaq laaxik chi ab'ink, at inYos. Chak'e reetal li qarahilal ut chawil taxaq chanru wank laatenamit Jerusalén: nakirirnak aj chik li na'ajej nayaab'asimank wi' laak'ab'a'. Moko kaw ta qach'ool xb'aan xtiikilal li qab'aanuhom, rik'in b'an li xnimal aawuxtaan. Jo'kan naq chawab'i taxaq li qatij.

¹⁹ At Qaawa', choohaawab'i taxaq! At qaYos, chakuy qamaak ut chawil xtoq'ob'aal qu! At inYos, chak'e reetal ut matb'ayk chaq chi qatenq'ankil sa' xk'ab'a' laaloq'al, xb'aan naq q'axtesinb'ileb' aawe Jerusalén ut laatenamit».

Laj Gabriel kixch'olob' xyaalal li moy u

²⁰ “Toj yookin ajwi' chi tijok ut chi xxootoninkil linmaak jo'wi' li xmaakeb' laj Israel lintenamit, yookin chi elajink chiru li Qaawa' linYos chirix li xsantil na'aj,

²¹ naq laj Gabriel, li kiwil ru sa' moy u xb'enwa, narupupnak naq kichalk chink'atq sa' xhonalil li ewuukil mayejak.

²² Ut naq kiwulak wankin wi', kixye we: «At Daniel, xinchalk aawik'in anaqwan re naq taataw xyaalal.

²³ Chalen naq xatikib' tijok, li Qaawa' xrab'i laatz'aamahom, ut laa'in xinchalk chi xyeeb'al aawe li xsumehom, xb'aan naq q'axal raarookat xb'aan li Yos. K'e b'i' aach'ool chi xtawb'al ru li tinye ut chatawaq xyaalal li moy u:

²⁴ «Ak xaqxo lajeeb' xkaak'aal xamaan sa' xb'een laatenamit ut sa' xb'een Jerusalén b'arwi' wankat. Aajel ru a'an, re naq taaraqe'q li maa'usilal ut li q'etb'a aatin, jo'wi' re naq te'tojmanq rix chixjunileb' li maak, re xxaqab'ankil xwankil li tiikilal chi junajwa ut xsantob'resinkil wi' chik li Rochoch li Yos re naq taatz'aqloq ru li moy u xawil ut li xyehom li propeet.

²⁵ Ab'i li yookin xyeeb'al aawe ut chatawaq ru: Chalen naq x'elk li chaq'rab' re xwaklesinkil wi' chik Jerusalén toj taawulaq xkutankil li xk'ulunik laj jolominel sik'b'il ru, tento taanume'q wuqub' xamaan. Chirix chik a'an te'yiib'amanq wi' chik eb' li b'e jo'wi' eb' li tz'ak chiru wiib' xkaak'aal xamaan; ab'anan q'axal rahaq xnumsinkileb' li kutan a'an.

²⁶ Naq akaq xnume'k eb' li kab'laju xkaak'aal xamaan a'an, taakamsiiq laj jolominel sik'b'il ru, us ta maak'a' xmaak; ut jun xnimal ru winq taachalq rochb'eeneb' laj puub' ut tolxjuk' Jerusalén jo'wi' li santil Muheb'aal. Li roso'jik taachalq sa' junpaat, kama' li b'ut', ut li yalok jo'wi' eb' li rahilal ak yeeb'il te'wanq toj sa' xraqik.

²⁷ Li xnimal ru winq a'an tixk'ojob' jun sumwank rik'in naab'aleb' li poyanam yal chiru jun xamaan; ab'anan sa' xyi li xamaan tixsach xwankil li k'atok mayej jo'wi' li mayejak, ut a' chik li xnimal tz'i'b'eetal taak'ehe'q sa' xb'een xtaqeq'il li rochoch li Yos, toj reetal naq li tojb'amaak ak yeeb'il xb'aan li Yos taachalq sa' xb'een laj sachonel»”.