Daniel 11 - Q'eqchi Bible

¹ «Sa' li xb'een xchihab' chi awab'ejink laj Darío sa' xb'eeneb' laj Media, laa'in xinwank chaq wochb'een a'an re xtenq'ankil ut chi xk'eeb'al xkawub' xch'ool.

² Ut anaqwan tinye aawe li xyaalalil: «Aran Persia toj toxwanq oxib' chik li awab'ej, ut li xka awab'ej q'axal b'ihomaq chiruheb' li oxib'. Ut naq ak xnimank li xwankilal sa' xk'ab'a' li xb'ihomal, tixchiq' xjosq'ileb' chixjunileb' li poyanam re yalok rik'ineb' laj Grecia.

Eb' li awab'ej re Siria ut re Ejiipt

³ Toja' naq aran taawakliiq jun awab'ej q'axal kaw chik rib', tixjolomi jun nimla awab'ejihom ut tixb'aanu li taaraj xb'aanunkil.

⁴ Ab'an naq ak xk'ojlaak li xwankil, tixjach rib' li x'awab'ejihom ut kaahib' jachal taa'isiiq. Maajun li ralal xk'ajol te'eechaninq li awab'ejilal chi moko te'wanq xwankil jo' xwankil a'an, xb'aan naq taajuk'e'q li x'awab'ejihom ut jalaneb' chik te'eechaninq re.

⁵ «Li awab'ej re Ejiipt taanimanq xwankil; ab'an jun reheb' laj tenq' re taaq'apliiq sa' xb'een ut a'in chik li jwal nimaq xwankil chiru a'an.

⁶ Ink'a' chik najtaq chirix a'an, li awab'ej re Ejiipt tixb'aanu jun sumwank rik'in li awab'ej re Siria ut tixk'e li xrab'in cho'q rixaqil re twanq li tuqtuukil usilal. Ab'anan moko najt ta taawanq li sumwank, xb'aan naq li ixq taakamsiiq rochb'eeneb' li xkok'al, li xb'eelom ut eb' li kixk'ameb' chirix.

⁷ Toja' naq jun xkomon li ixq taa'ok chi awab'ejil. Taayaloq rik'ineb' laj puub' re li x'awab'ej Siria, toxreechani li kawub'resinb'il ochoch ut tixq'ax ruheb'.

⁸ Tixk'am Ejiipt eb' li xyos, eb' li xjalam u ut li k'a'aq re ru yiib'anb'il rik'in oor ut plaat, ut ink'a' najt te'wanq sa' tuqtuukil usilal.

⁹ Moqon li awab'ej re Siria tixyal reechaninkil li tenamit Ejiipt, ab'anan sa' junpaat taasutq'isiiq wi' chik sa' li xna'aj.

¹⁰ «Te'xkawresi rib'eb' li ralal xk'ajol li awab'ej re Siria ut te'xch'utub' naab'aleb' laj puub'. Jun reheb' a'an tixkut rib' chi junpaat jo' li b'ut'iha' sa' xb'een Ejiipt; chirix a'an taa'ok wi' chik chi yalok re reechaninkil li kawub'resinb'il ochoch.

¹¹ Toja' naq li awab'ej re Ejiipt k'ajo' naq taajosq'o'q, taaxik chi yalok rik'in li awab'ej re Siria ut chixjunileb' li k'iila o'q'ob' chi aj puub' re Siria te't'ane'q sa' ruq'.

¹² Naq akaq xsacheb' ru li k'iila aj puub', tixnimob'resi rib' ut k'ajo'eb' chik li poyanam tixkamsi, ab'anan moko toxnumtaaq ta chik.

¹³ Li awab'ej re Siria tixch'utub' wi' chik naab'aleb' laj puub' chi q'axal yo'oon wi' chik chiruheb' li xb'enwa, ut sa' wiib' oxib' chihab' chik taaxik chi yalok rochb'een k'iila o'q'ob' chi aj puub' ut jwal kawresinb'ilaqeb' chik.

¹⁴ «Sa' li kutan a'an naab'aleb' te'xq'etq'eti rib' chiru li awab'ej re Ejiipt, ut wanqeb' ajwi' aawech tenamitul te'xq'etq'eti rib' jo' xk'utb'esiik chawu sa' li moy u, ab'anan te'q'axe'q ru.

¹⁵ Moqon li awab'ej re Siria taachalq, tolxtuub' li ch'och' cho'q xtaqleb'aal, toja' naq te'reechani li kawub'resinb'il tenamit. Eb' laj puub' re Ejiipt ink'a' te'xkuy sa' ruq'eb', ut eb' li kaweb' rib' te'eleliq ajwi'.

¹⁶ Li awab'ej re Siria tixb'aanu li k'aru taaraj xb'aanunkil, chi maajun taaruuq chi sumenk re; toxkanaaq sa' li xchaq'alil ru na'ajej ut taanumtaaq sa' xb'een.

¹⁷ Tixk'uub' ajwi' reechaninkil chixjunil Ejiipt; jo'kan naq tixk'ojob' jun sumwank rik'in li awab'ej re Ejiipt ut tixq'axtesi li xrab'in cho'q rixaqil, ab'anan ink'a' taach'olaaq li xk'a'uxl.

¹⁸ Moqon chik taaxik chi yalok rik'ineb' li tenamit wankeb' sa' sutha' ut naab'aleb' li taareechani; ab'anan jun xjolomileb' laj puub' taaq'axoq ru ut tixram li xutaanal b'aanuhem a'in, chi ink'a' chik tixkuy xsumenkil.

¹⁹ Toja' naq li awab'ej re Siria taasutq'iiq sa' li xtenamit, sa'eb' li kawub'resinb'il ochoch; ab'anan taaq'axe'q ru ut taakamq chi maajun chik taatawoq re.

²⁰ «Sa' xna'aj a'an taawanq jun chik awab'ej, li tixtaqla jun aj k'anjel chi titz'ok re naq taab'ihomo'q chi yo'oon li x'awab'ejihom; ab'anan ink'a'aq k'iila kutan, taakamsiiq li awab'ej a'an chi maak'a'aq raaxiik' chi moko yalok.

²¹ «Sa' xna'aj a'an taa'awab'ejinq jun li winq q'axal yib'ru xna'leb' chi moko xkomoneb' li awab'ej; taa'ok chi taqlank chi maak'a'aq sa' xch'ooleb' ut taareechani li awab'ejihom sa' b'alaq'il na'leb'.

²² Eb' laj puub' li xik' neke'ilok re te'eleliq ut te'sache'q ru; jo'kan ajwi' laj jolominel sik'b'il ru taakamsiiq.

²³ Tixb'alaq'iheb' li poyanam rik'in k'ojob'ank sumwank, ut taanimanq xwankil, us ta moko nim ta li xtenamit.

²⁴ Taaxik chi reechaninkileb' li kok' tenamit li sa wankeb' chi maak'a'aq sa' xch'ooleb', ut tixb'aanu reheb' li maajun wa xb'aanuhomeb' li xxe'toonil yuwa': tixjek'i chirixeb' li neke'okenk chirix li b'ihomal ut li k'aru te'reechani, ut tixk'uub' reechaninkil eb' li kawub'resinb'il tenamit, ab'anan yal jun k'amok ajwi'.

²⁵ «Tixkawub'resi xch'ool re xik chi yalok rik'in li awab'ej re Ejiipt rochb'een naab'al teep chi aj puub'. Li awab'ej re Ejiipt taa'elq ajwi' chaq chi yalok rochb'een k'iila o'q'ob' chi aj puub' ut jwal kaweb' rib', ab'anan taab'alaq'iiq ut ink'a' tixkuy xsumenkil;

²⁶ a'aneb' ajwi' li neke'wa'ak rochb'een te'b'alaq'inq re. Eb' laj puub' te'sache'q ru ut naab'aleb' li te'kamsiiq.

²⁷ Toja' naq eb' li wiib' chi awab'ej a'an te'k'ojlaaq chi wa'ak sa' jun chi meex ut te'xb'alaq'i rib' chirib'ileb' rib'; ab'anan yal maak'a'aq rajb'al, xb'aan naq toj maji' xhonalil li roso'jik.

²⁸ Li awab'ej re Siria taasutq'iiq wi' chik sa' li xtenamit chi k'ajo'aq xb'ihomal, yooq xsik'b'al chanru tixsach li santil sumwank xk'ojob'ahom li Qaawa'. Toj tixb'aanu a'an, toja' naq taasutq'iiq sa' li xtenamit.

²⁹ Naq taawulaq xq'ehil, taaxik wi' chik chi yalok rik'ineb' laj Ejiipt, ab'anan moko us ta chik taa'elq.

³⁰ Naab'aleb' laj Kitim te'chalq sa' jukub' chi yalok rik'in, ut k'ajo'aq xxiw naq taa'eleliq. Li awab'ej re Siria q'axal wi' chik kaw tixyal xsachb'al xwankil li xpaab'aal li xtenamit li Yos, rik'in xpaab'ankil raatineb' li neke'tz'eqtaanank re li Sumwank.

³¹ «Tixtaqlaheb' aj puub' chi xmuxb'al li loq'laj Muheb'aal ut li kawub'resinb'il ochoch; te'xsach ajwi' xwankil li mayejak na'uxmank rajlal kutan ut te'xk'ojob' li xnimal tz'i'b'eetal sa' rochoch li Yos.

³² Tixb'alaq'iheb' li xe'tz'eqtaanank re li Sumwank, re naq te'okenq chirix; ab'an li tenamit li tz'aqal neke'xnaw ru li xYos te'xxaqab' rib' chi kaw ut te'xkol rib' chiru li awab'ej.

³³ Eb' laj k'amol b'e li wankeb' xna'leb' te'xtzol naab'aleb' li poyanam, ab'anan ink'a' najtaq chik wankeb' te'kamsiiq, wankeb' te'k'atje'q, wankeb' te'isiiq sa' li xna'ajeb' ut wankeb' chik te'elq'aaq li xjunqkab'al.

³⁴ Naq yooqeb' chi oso'k, moko k'iheb' ta li te'tenq'anq reheb', ut naab'aleb' te'xjunaji rib' rik'ineb', yal re naq us te'elq.

³⁵ Wankeb' aj k'ehol xna'leb' li tenamit te'kamsiiq, ab'an yal re xyalb'aleb' rix li junch'ol chik, re xch'ajob'resinkil xna'leb'eb' ut xsaab'esinkileb' li xkomon, toj sa' roso'jikeb' li kutan li ak xaqxo xb'aan li Qaawa'.

³⁶ «Li awab'ej re Siria tixb'aanu li k'aru taaraj xb'aanunkil; tixnimob'resi rib', tixk'e xwankil sa' xb'een chixjunileb' li yos ut tixmajewa li tz'aqal Yos. Jwal us taa'elq toj reetal li Yos tixk'ut li xnimal xjosq'il, xb'aan naq li ak xyeemank xb'aan li Qaawa', taa'uxq.

³⁷ Ink'a' tixpaab' li xyoseb' li xna' xyuwa', chi moko taaxik xch'ool chirix li yos nawulak chiruheb' li ixq, ut maajun chik yos tixk'ulub'a, xb'aan naq tixk'e xwankil xjunes rib' sa' xb'eeneb' chixjunileb'.

³⁸ Tixloq'oni ru li yos nak'aak'alenk reheb' li kawub'resinb'il ochoch; rik'in oor, plaat, lemtz'il q'ol ut tertookil pek tixterq'usi xloq'al li yos a'an, li maajun wa rilomeb' ru li xna' xyuwa'.

³⁹ Tixkoleb' li kawub'resinb'il ochoch rik'in xtenq'aal jun jalanil yos, ut jo'k'ihaleb' li te'k'ehoq xloq'al li yos a'an, tixk'eheb' xwankil sa' xb'eeneb' li k'iila poyanam ut tixjek'i li ch'och' reheb' cho'q xq'ajkamunkileb'.

⁴⁰ «Sa' roso'jikeb' li kutan li awab'ej re Ejiipt taayaloq rik'in li awab'ej re Siria, ut a'in taaxik chi xsumenkil rik'in k'iila b'eleb'aal ch'iich', k'iila aj puub' ut naab'aleb' li jukub'; te'ok aran Ejiipt ut te'nume'q jo' li b'ut'iha'.

⁴¹ Moqon chik taa'ok sa' li xchaq'alil ru na'ajej, ut naab'aleb' te'kamsiiq aran; ab'anan te'xkol rib'eb' laj Edom, eb' laj Mohab ut li xk'ihaleb' laj Amón.

⁴² Taanumtaaq sa' xb'een naab'aleb' chi tenamit, ut chi moko eb' laj Ejiipt te'kole'q sa' ruq'.

⁴³ Taareechani chixjunil li oor, li plaat ut li k'a'aq re ru jwal loq' chiruheb' laj Ejiipt. Jo'kan ajwi' te'xk'ul eb' laj Libia ut eb' laj Etiopía.

⁴⁴ Ab'an sa' xjayal releb'l iq' ut sa' xjayal releb'l saq'e taachalje'q jun li esil jwal ra rab'inkil; jo'kan naq li awab'ej re Siria k'ajo' naq taachalq xjosq'il ut taaxik chi xsachb'al ut xkamsinkil naab'aleb' li poyanam.

⁴⁵ Tixk'ojob' li xmuheb'aal sa' xyanq li palaw rik'in li xchaq'alil ru tzuul. Ab'anan aran taawulaq xhonalil li xkamik, ut maajun taatenq'anq re.