Daniel 10 - Q'eqchi Bible

Li xnimal ru moy u: li winq tiqto rik'in liin

¹ Naq ak oxib' chihab' rokik chi awab'ejink laj Siro sa' xb'eeneb' laj Persia, laj Daniel, Beltsasar xkab' xk'ab'a', kiril jun moy u li q'axal yaal, ab'anan jwal ch'a'aj xtawb'al ru. Laj Daniel kixk'e xch'ool chi xtawb'al ru li xk'utb'esihom li Yos, ut koxnaw xyaalal li xmatk'.

² “Chiruheb' li kutan a'an, laa'in laj Daniel kinkawresi wib' chiru oxib' xamaan chi ra sa' inch'ool:

³ ink'a' kintzeka li sahil tzekemq, ink'a' kintiwok tib' chi moko kin'uk'ak b'iin, ink'a' kinyul wib' sa' sununkil b'an toj reetal kiraqe'k li oxib' xamaan.

⁴ Sa' li kaahib' xka'k'aal xb'e li xb'een po, naq wankin chire li nimla nima' Tigris xk'ab'a',

⁵ kintaqsi li wilob'aal ut kiwil jun li winq tiqto rik'in liin ut b'ak'b'o li xsa' chi k'aamalsa' oor.

⁶ Li xjunxaqalil nalemtz'unk jo' jun tertookil pek; li xnaq' ru kama' wi' li raq'kaaq; li xsa' eb' li ru kama'eb' wi' li raq'xam; eb' li roq ut eb' li ruq' chanchaneb' li q'anch'iich' ut li xyaab' xkux kama' wi' rab'inkileb' li k'iila poyanam.

⁷ “Ka'ajwi' laa'in laj Daniel kiwil li moy u a'an; eb' li wochb'een ink'a' ke'ril, ab'anan ke'chalk xxiw ut ke'xchap raanileb' re xmuqb'aleb' rib'.

⁸ Injunes kinkanaak chi rilb'al li moy u; kinlub'k naq kiweek'a, kinsaqkirino'k ut kinkanaak chi maak'a' chik inmetz'ew.

⁹ Naq kiwab'i li xyaab' xkux, kint'ane'k chi hupu chiru ch'och' chi sachso inna'leb'.

¹⁰ Ab'anan tikto jun uq'mej kiwaklesink we ut kinxxaqab' chi neke'siksotk eb' li woq jo'wi' eb' li wuq' xb'aan inxiw.

¹¹ Ut li winq kixye we: «At Daniel, laa'at jun li winq jwal raarookat xb'aan li Yos, k'e aach'ool chi rab'inkil li aatin tinye aawe ut xaqlin, xb'aan naq taqlanb'ilin chaq anaqwan aawik'in». “Naq kiraqe'k chi xyeeb'al eb' li aatin a'in, laa'in kinxaqliik chi ninsiksotk.

¹² Toja' naq li winq kixye we: «Matxiwak, a Daniel. Chalen chaq sa' xtiklajik xayal aaq'e chi xtawb'al ru li moy u a'in ut xakub'si aawib' chiru laaYos. Jo'kan naq x'ab'iik laatij ut xinchalk laa'in chi xyeeb'al aawe li xsumehom li Qaawa'.

¹³ Li ánjel li nataqlank sa' xb'eeneb' laj Persia xramok chiwu li chalk aawik'in chiru jun xka'k'aal kutan; ab'anan li ánjel Miguel, jun reheb' li jwal ninqeb' xwankil, xchalk chintenq'ankil, xb'aan naq injunes wankin aran sa' xyanqeb' li awab'ej re Persia.

¹⁴ Ut anaqwan xinchalk re xch'olob'ankil xyaalal li k'aru tixk'ul laatenamit chiruheb' li kutan chaalel, xb'aan naq toj wank chik jun moy u chirixeb' li kutan a'an».

¹⁵ “Naq kixye we eb' li aatin a'in, kinxulub' li wilob'aal sa' ch'och' ut mem kinkanaak.

¹⁶ Ab'anan k'utaamil chiwu jun li mu chanchan winq, ut kixtoch' li xtz'uumal we. Toja' naq kin'ok chi raatinankil li xaqxo chiwu: «Wa'chin, q'axal namayok linch'ool chi rilb'al li moy u a'in ut xinkanaak chi sachso inna'leb'.

¹⁷ Chanru naq tin'aatinaq aawik'in, at inqaawa'? Laa'in maak'a' chik inmetz'ew ut inmusiq'».

¹⁸ “Li winq xaqxo chiwu kinxtoch' wi' chik ut ke'kawuuk eb' li woq wuq'.

¹⁹ Chirix chik a'an kixye we: «Matxiwak ut matk'oxlak. Saho'qat ut kawaq taxaq laach'ool: li Yos jwal nakatxra». “Ut naq toj yo chi aatinak wik'in, kikawuuk wi' chik linch'ool ut kinye re: «Aatinan, at inqaawa', xb'aan naq xak'e xkawub' linch'ool», chankin re.

²⁰ Toja' naq kixye we: «Ma nakanaw k'aru xyaalal naq xinchalk aawik'in? Anaqwan ok wi' chik we chi yalok rik'in li ánjel li nataqlank sa' xb'eeneb' laj Persia. Ut naq akaq xinraqe'k chi yalok rik'in a'an, a' chik li ánjel li nataqlank sa' xb'een Grecia taachalq.

²¹ Anaqwan tink'ut chawu li k'aru tz'iib'anb'il sa' xHuhul li yaal. Maajun natenq'ank we, ka'ajwi' li ánjel Miguel, li na'ilok reheb' laj Israel.