Colosenses 3 - Q'eqchi Bible

Li ak' yu'am

¹ Jo'kan utan, wi waklijenaqex chi yo'yo eerochb'een li Kriist, sik'omaq li k'a' re ru wank taqe'q, b'arwi' k'ojk'o li Kriist sa' xnim uq' li Yos.

² Xikaq eech'ool chirix li k'a' re ru wank taqe'q ut ink'a' chirix li k'a' re ru wank taq'a.

³ Xb'aan naq ak kamenaqex ut muqmu leeyu'am rochb'een li Kriist rik'in li Yos.

⁴ Naq tixk'ut rib' li Kriist qayu'am, toja' naq laa'ex ajwi' eerochb'een a'an texk'utunq chaq sa' li xloq'al.

⁵ Jo'kan b'i', k'ehomaq chi kamk li ruuchich'och'il na'leb' wank eerik'in: li ko'b'eetak yumb'eetak, li muxuk ib', li xk'oxlankil li maa'usilal, li xrahinkil ru li ink'a' us ut li ratawankil ru li b'ihomal, a'an juntaq'eet rik'in li jalanil loq'onink.

⁶ Chixjunil a'in nak'amok chaq xjosq'il li Yos sa' xb'eeneb' laj q'etol aatin.

⁷ Jo'ka'in ajwi' keb'aanu laa'ex junxil, naq toj wankex chaq sa'eb' li maak a'in.

⁸ A'ut anaqwan kanab'omaq chirix leech'ool chixjunil a'in: li josq'il, li k'ahij ib', li maa'usilal, li majewank ut li yib' aj aatin!

⁹ Meetik'ti'i eerib' cherib'il eerib', xb'aan naq xerisi chik sa' leech'ool leenajteril yu'am jo'wi' li xk'anjel,

¹⁰ ut xetiqib' eerib' rik'in li ak' yu'am: ak' winqex chik, ut li Yos junelik na'ak'ob'resink eere toj reetal toxeetaw eena'leb' chi tz'aqal re ru, jo' xjalam u Li kiyoob'tesink eere.

¹¹ Arin maak'a' chik aj griego ut aj Judiiy, maak'a' chik li xk'ulum li sirkunsisyon ut li ink'a', maak'a' chik li jalan xtenamit, li ch'ol winq, laj loq'b'il k'anjel ut li ach'ab'anb'il, a' b'an li Kriist a'an chixjunil ut wank sa' chixjunileb'.

¹² Li Yos q'axal nekexra ut kixsik' eeru re naq santaqex. Tiqib'omaq b'i' eerib' rik'in xnimal uxtaanal, rik'in li usilal, li tuulanil, kub'enaqaq eewankil ut nimaq eekuyum.

¹³ Chekuyaq eerib' cherib'il eerib' ut, wi junaq wank k'aru tixjit wi' li jun chik, chek'am eerib' sa' usilal. Jo' naq kixkuy eemaak li Kriist, jo'kan ajwi' cheb'aanu laa'ex.

¹⁴ Ut sa' xb'een chixjunil a'in, tiqib'omaq eerib' rik'in li rahok, a'an li naxk'ul wi' rib' li tz'aqalil e u.

¹⁵ Li xtuqtuukil usilal li Kriist li kexb'oqe'k wi' sa' junaj chi tz'ejwalej, chitaqlanq taxaq sa' leech'ool; ut chexyoxinq.

¹⁶ Li Raatin li Kriist chiwanq eerik'in chi numtajenaq. Chetzolaq eerib' ut chek'ehaq eena'leb' cherib'il eerib' rik'in chixjunil li chaab'il k'a'uxl. Chexb'ichanq chi anchal eech'ool re yoxink chiru li Yos, rik'in saalm, himno ut loq'laj b'ich;

¹⁷ ut jo'ch'inal jo'nimal li teeye malaj teeb'aanu, chixjunil chi'uxmanq sa' xk'ab'a' li Qaawa' Jesus, yooqex chi yoxink chiru li Yos Yuwa'b'ej sa' xk'ab'a' A'an.

Chepaab'aq eerib' cherib'il eerib' sa' leejunkab'al

¹⁸ Ex ixaqilb'ej, chepaab' leeb'eelom jo' xk'ulub' sa' xk'ab'a' li Qaawa'.

¹⁹ Ex b'eelomej, chera leerixaqil ut meeyoob' xk'aheb'.

²⁰ Ex alalb'ej, chex'ab'inq chiru leena' leeyuwa' rik'in chixjunil, xb'aan naq a'an li nawulak chiru li Qaawa'.

²¹ Ex yuwa'b'ej, meeyoob' xjosq'il eb' leeralal eek'ajol re naq me'xch'ina xch'ooleb'.

²² Ex aj loq'b'il k'anjel, chepaab' eb' laj eechal eere sa' ruuchich'och' rik'in chixjunil li k'anjel, moko ka'aj ta wi' naq eb' a'an yookeb' cherilb'al re naq sahaqeb' xch'ool eerik'in, cheb'aanu b'an chi yaal, chi anchal eech'ool, yooqex chi roxloq'inkil li Qaawa'.

²³ Jo'ch'inal jo'nimal li teeb'aanu, b'aanuhomaq chi anchal eech'ool, cho'q re li Qaawa' ut maawa' cho'q reheb' li winq:

²⁴ nekenaw naq li Qaawa' tixk'e eere li choxahil maatan cho'q eeq'ajkamunkil. Laj eechal eere li nekek'anjela ru, a'an li Kriist.

²⁵ Chek'e reetal, li nab'aanunk re li ink'a' us, taaq'ajkamuuq jo' chanru xb'aanu, xb'aan naq li Yos juntaq'eet narileb' chixjunil.