Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Colosenses 1 - Q'eqchi Bible


Xk'eeb'al sahil ch'oolej

1 Laa'in laj Pablo, x'apóstol li Kristo Jesus jo' x'alaak sa' xch'ool li Yos, wochb'een laj Timoteo, li wiitz'in,

2 nintz'iib'ak rik'ineb' laj santil paab'anel aj Kolosas, eb' li was wiitz'in li neke'xk'e xch'ool chi paab'ank sa' xk'ab'a' li Kriist. Chiwanq taxaq eerik'in li usilal ut li tuqtuukilal nachalk rik'in li Yos, li qaYuwa'.


Yoxink ut tz'aamank

3 Junelik nokootijok cherix ut nokooyoxink chiru li Yos, li xYuwa' li Qaawa' Jesukriist,

4 xb'aan naq xqab'i resil naq nekepaab' li Kristo Jesus ut nekera chixjunileb' laj santil paab'anel

5 sa' xk'ab'a' royb'eninkil li sahil ch'oolej k'uulanb'il cho'q eere sa' choxa. Ak tzolb'ilex chaq chirix a'an xb'aan li Aatin re li yaal, a' li Chaab'il Esilal

6 li kiwulak toj eerik'in ut yo chi uuchink ut chi k'ihank sa' eeyanq kama' ajwi' sa' chixjunil li ruuchich'och', chalen naq kerab'i resil li rusilal li Yos ut ketaw ru k'aru tz'aqal a'an.

7 Jo'ka'in naq kextzole'k xb'aan laj Epafras, li qochb'een chi k'anjelak raaro qab'aan ut chaab'il aj k'anjel chiru li Kriist sa' eek'ab'a' laa'ex.

8 A'an ajwi' kich'olob'ank chiqu chanru leerahom sa' li Musiq'ej.

9 Jo'kan utan, chalen naq xqab'i resil chixjunil a'an, ink'a' nokoohilank chi tijok cherix ut junelik yooko chi xtz'aamankil naq toxeetaw xyaalal li rajom li Yos chi tz'aqal re ru, rik'in chixjunil li na'leb' ut k'a'uxl li naxk'e li Musiq'ej,

10 re naq chiwanq taxaq leeyu'am jo' chanru xk'ulub' li Qaawa', tz'aqal jo' nawulak chiru. Cheruuchin chixjunil li chaab'il b'aanuhom ut chexk'iiq chi xnawb'al ru li Yos.

11 Chikawub'resiiq chi tz'aqal leech'ool xb'aan li xwankil li xloq'al li Yos, re naq teekuy chixjunil li ch'a'ajkilal chi ink'a' taach'inanq leech'ool;

12 chexyoxinq rik'in sahil ch'oolej chiru li Yuwa'b'ej li xk'ehok eere chi tz'aqonk sa' li xmaataneb' laj santil paab'anel sa' li saqenk.

13 A'an ki'isink qe sa' xwankil li aak'ab' ut kooroksi sa' li x'awab'ejihom li xraarookil Alal

14 li naqataw wi' qakolb'al rik'in li xkuyb'al xsachb'al li qamaak.


Li xnimal xwankil li Kriist

15 Li Kriist a'an li xjalam u li Yos li ink'a' na'ilmank ru. A'an li yo'lajenaq xb'enwa chiru chixjunil li yoob'tesinb'il,

16 xb'aan naq sa' xk'ab'a' a'an kiyoob'tesiik chixjunil li k'a' re ru li wank sa' choxa jo'wi' sa' ruuchich'och', li na'ilmank ut li ink'a' na'ilmank ru, li wankeb' xnimal xk'anjel ut xwankil, li neke'taqlank ut neke'awab'ejink: chixjunil kiyoob'tesiik sa' xk'ab'a' a'an ut cho'q re a'an.

17 A'an li xb'een chiru chixjunil, ut chixjunil yo'yo ut xchapom rib' sa' xk'ab'a'.

18 A'an ajwi' xjolomil li Iklees, a' li xtz'ejwal. A'an li xtiklajik, li xb'een yo'lajenaq sa' xyanqeb' li kamenaq, re naq nimaq xwankil sa' xb'een chixjunil.

19 Xb'aan naq ki'alaak sa' xch'ool li Yos naq rik'in a'an chiwanq xtz'aqlojik ru chixjunil.

20 Sa' xk'ab'a' li Kriist ut cho'q re A'an, li Yos kiraj xk'amb'al wi' chik sa' rusilal chixjunil li k'a'aq re ru, rik'in xk'eeb'al sa' tuqtuukilal chixjunil li wank sa' ruuchich'och' ut sa' choxa, sa' xk'ab'a' li xkik'el hoyb'il chiru krus.


Laa'ex ajwi' k'amb'ilex wi' chik sa' rusilal li Yos

21 Junxil laa'ex najtex chaq rik'in li Yos ut xik' nekeril A'an, xb'aan leek'a'uxl ut leeyib' aj b'aanuhom.

22 A'ut anaqwan li Yos xexk'am wi' chik sa' rusilal sa' xk'ab'a' li xkamik li xch'och'el sululel li Kriist, re eexaqab'ankil chiru sa' santilal, chi maak'a'aq eemuxul ut eeq'usb'al.

23 Ka'ajwi' naq kawaq eech'ool sa' leepaab'aal; kaw kab'lanb'ilaqex sa' xb'een a'an, jo'wi' kaw xaqxooqex chi oyb'enink sa' xk'ab'a' li Chaab'il Esilal eerab'ihom, a' li xpuktesimank reheb' chixjunil junsut junrub'el choxa ut li xaqab'anb'ilin wi' laa'in laj Pablo chi xk'anjelankil chiruheb' chixjunil.


Li xk'anjel laj Pablo sa' xyanqeb' li maawa'eb' aj Judiiy

24 Anaqwan nasaho'k sa' inch'ool rik'in li nalajinkuy sa' eek'ab'a' laa'ex, ut nintz'aqob'resi sa' linch'och'el sululel li xrahilal li Kriist li toj na'ajmank ru, cho'q re li xtz'ejwal, a'an li Iklees.

25 Laa'in xaqab'inb'ilin cho'q aj k'anjel chiru li Iklees, jo' chanru linmaatan k'eeb'il we xb'aan li Yos sa' eeyanq, re naq taatz'aqloq ru li Raatin li Yos,

26 a' li tz'aptz'ookil na'leb' muqmu chalen chaq q'e kutan, chalen sa' xtiklajik xteepaleb' li qaxe' qatoon, ut anaqwan xk'utb'esimank chik chiruheb' laj santil paab'anel.

27 Li Yos kiraj xk'utb'al chiruheb' a'an li xchamal xsasal li xloq'al li muqmuukil na'leb' a'in sa' xyanqeb' li maawa'eb' aj Judiiy, a' li Kriist li wank eerik'in, li k'ojk'o wi' leech'ool chi royb'eninkil xnimal eeloq'al.

28 A'an tz'aqal li naqapuktesi resil. Naqak'eheb' xna'leb' chixjunileb' ut naqatzoleb' rik'in chixjunil li qak'a'uxl, re naq tqaxaqab'eb' chixjunil chi tz'aqalaq re ruheb' sa' xk'ab'a' li Kriist.

29 A'an aj e naq q'axal ninyal inq'e sa' link'anjel rik'in xnimal xwankil li Kriist, li kaw yo chi k'anjelak wik'in.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ