Cantares 8 - Q'eqchi Bible

¹ A, wi ta laa'at li wiitz'in tu'resinb'ilat ta xb'aan linna', tinwutz' raj aawu naq tatink'ul sa' b'e chi maajun taase'enq we.

² Tatink'am raj chiwix ut tatwoksi sa' rochoch linna', ut laa'ataq chik aj tzolol we sa' li rahok. Tatink'e raj chi uk'ak chaab'il b'iin ut xya'al granaad.

³ Li xtz'e uq' wank rub'el linjolom ut rik'in li xseeb' uq' nikinxmetzo.

⁴ Nintz'aama cheru, ex rixqilal Jerusalén, meerajsi ru ut meerisi xwara linrahom, toj a'an yaal re.

Jwal kaw rib' li rahok jo' li kamk Eb' laj b'ichanel

⁵ Ani a'an li yo chaq chi taqe'k sa' li chaqich'och', q'alq'o chaq xb'aan li winq narahok re? Rub'el xche'el li mansaan xatwajsi chaq, b'arwi' xatsiyaak xb'aan laana', sa' li na'ajej b'arwi' xatsiyaak ut xat-alaak.

Li ixq

⁶ K'ehin cho'q kaaxt chiru laach'ool, jo' junaq kaaxt chiru laatelb', xb'aan naq jwal kaw rib' li Rahok jo' li Kamk, wank xwankil li Sowenak jo' li Xb'alb'a: li xxamlel li Rahok a'an tiqwal xam, tz'aqal xam li nachalk rik'in li Yos!

⁷ Chixjunil li ha' wank sa' palaw ink'a' naru tixchup li Rahok, chi moko taa'oso'q xb'aaneb' li nima'. Wi ta junaq winq tixyeechi'i chixjunil li xb'ihomal li xjunkab'al sa' xk'ab'a' li Rahok, yal tz'eqtaananb'ilaq raj!

Suttz'ak ut awimq uub' Eb' laj b'ichanel

⁸ Wank jun qanab' toj kach'in, toj maak'a' xtu': k'aru tqab'aanu cho'q re li qanab' a'in sa' xkutankil li tz'aam?

⁹ Wi ta a'an suttz'ak, tqayiib' raj rik'in plaat junaq kab'l najt xteram sa' xb'een; wi ta a'an okeb'aal, tqanat' raj rik'ineb' xtz'alamche'il li yaw.

Li ixq

¹⁰ Laa'in jo'kin jun suttz'ak ut eb' lintu' chanchaneb' najt xteramil kab'l. Jo'kan naq, chiru linrahom, laa'in jo'kin li ak xtaw xtuqtuukilal.

Eb' laj b'ichanel

¹¹ Laj Salomón xwank jun rawimq uub' aran Bahal-Amón. Xq'axtesi li rawimq uub' sa' ruq'eb' laj k'aak'alenel, li tento te'xk'am chaq jun mil chi tumin plaat sa' xq'ehil li xokok uub'.

Li ixq

¹² Li wawimq, a'an we laa'in. Li jun mil chi tumin, a'an aaweheb', at Salomón, ut lajeek'aal cho'q reheb' laj k'aak'alehom re li awimq uub'.

Li winq

¹³ Laa'at li nakathilank sa' xna'ajeb' li awimq, eb' li qamiiw q'es xikeb' chi rab'inkil xyaab' laakux: kanab'in ajwi' laa'in chi rab'inkil.

Li ixq

¹⁴ Elelin, at inrahom, jo'kaqat junaq kej malaj junaq ral li yuk; elelin sa'eb' li tzuul b'arwi' wank sununkil b'an.