Cantares 7 - Q'eqchi Bible

Li winq

¹ K'ajo' xch'ina'usal eb' laawoq sa'eb' laaxaab', at xrab'in xnimal ru winq! Eb' li xq'oot laayiitoq chanchaneb' li q'ol yiib'anb'ileb' xb'aan xseeb'al jun li winq tzolb'il chi us.

² Chanchan li kuk laach'up, b'arwi' ink'a' nalajk li sununkil b'iin. Laasa' kama' wi' jun tuub' chi triiw li sutsu chi uutz'u'uj.

³ Eb' laatu' chanchaneb' wi' wiib' ral li kej kok' luteb';

⁴ laakux kama' wi' jun najt xteramil kab'l yiib'anb'il rik'in marfil, xsa'eb' laawu jo'keb' li ha' li wank Jesbón, chi xk'atq li Rokeb'aal Bat-Rabín; laawu'uj chanchan li najt xteramil kab'l re Líbano, li wank sa' xka'yab'aal Damaask.

⁵ Chanchan wi' li tzuul Karmeel laajolom, ut eb' laawismal kama'eb' li kaqi noq': li raanm jun awab'ej eechaninb'il xb'aan li xk'oloxil.

⁶ K'ajo' laach'ina'usal, k'ajo' xchaq'alil aawu, at inrahom, at insahilal!

⁷ Laajunxaqalil chanchan wi' xteram jun toon chi kala' ut eb' laatu' kama' jun kuut chi ruheb'.

⁸ Xinye sa' inch'ool: Tintaqe'q sa' ru'uj li kala' ut tinxok chaq li ru. Eb' laatu' jo'kaqeb' taxaq li junq chiil chi uub', ut laasununkil jo' taxaq xsununkil li mansaan.

⁹ Sa' laawe chanchan li b'iin jwal chaab'il li tiik naxik wan wi' linrahom, ut naxt'aqresi li xtz'uumal qe li nokooxiiqank chi wark.

Sa' li awimq uub' ut sa' rochoch linna' Li ixq

¹⁰ Laa'in rehin linrahom, ut chiwix laa'in naxik li xch'ool.

¹¹ Kim, at inrahom, yo'o sa' k'aleb'aal; tqanumsi li q'oqyink rub'el xche'el li asaprán.

¹² Toj eq'la tooxik sa'eb' li awimq uub' ut tqil chaq ma yo chi atz'umak li xtoonal li uub', ma ak x'ok chi tuxmek, ma yookeb' chi atz'umak li granaad. Aran tinq'axtesi wib' ut tatinra!

¹³ Sununk li xb'ook eb' li winqil q'een; chire li qochoch wank k'iila paay chi sahil ki'q'een: eb' li ru li toje' xinxok jo'wi' eb' li ak chaqi, ut xink'uula cho'q aawe, at inrahom!