Cantares 6 - Q'eqchi Bible

Eb' laj b'ichanel

¹ B'ar xkoho laarahom, at jwal ch'ina'usat sa' xyanqeb' li ixq? B'ar xk'am laarahom re naq tqasik' chaq qochb'eenat?

Li ixq

² Linrahom xkoho sa' xna'aj li rawimq, b'arwi' awb'il li sununkil q'een; xkoho chi rilb'al li xketomq sa'eb' li xna'aj awimq ut chi xxokb'aleb' li saqihix.

³ Laa'in rehin linrahom ut linrahom a'an we laa'in, li nak'aak'alenk sa' xyanqeb' li saqihix.

Jun chik li b'ich cho'q re li ixq Li winq

⁴ Xchaq'al aawu, at xsumwaanm, kama'at li tenamit Tirsá, ch'ina'usat jo' Jerusalén; xaweechani li waanm jo'eb' li jun teep chi aj puub'.

⁵ Isi laawilob'aal sa' inb'een, xb'aan naq li xsa'eb' laawu xe'xq'ax wu. Laawismal chanchaneb' jun ch'uutal chi chib'aat li yookeb' chi kub'eek sa' li tzuul Galahad.

⁶ Eb' li ruuch aawe chanchaneb' jun ch'uutal chi karneer li toj xe'raqe'k chi atink, re te'b'ese'q li rix; tz'aqaleb' re ru li ruuch aawe, ut maajun wank ta xjunes.

⁷ Chanchaneb' granaad li xnaq' aawu, naq nak'utunk chaq chirix laat'ikr.

⁸ Oxk'aaleb' li xna' li tenamit, kaak'aaleb' li xkab' ixaqileb', ut k'ajo'eb' li tuq'ixq.

⁹ ab'anan jun ajwi' linmukuy li tz'aqal re ru, jun ajwi' chiru li xna', a'an li jwal raaro xb'aan li x'alank re. Naq na'ile'k ru xb'aaneb' li ixqa'al, nak'eemank xloq'al, ut eb' li xna' li tenamit jo'wi' eb' li xkab' ixaqilb'ej neke'xterq'usi li xk'ab'a':

¹⁰ “Ani a'an li nachalk chaq jo' li hik'e'k, ch'ina'us jo' li po, nalemtz'unk jo' li saq'e, ut jwal kaw rib' jo'eb' li jun teep chi aj puub'?”.

¹¹ Xinkub'eek sa' li xk'iche'il li nogal, re xka'yankil li xraxraxil ru li taq'a, re rilb'al li xtuxm li xtoonal li uub' ut wi yookeb' chi atz'umak eb' li granaad.

¹² Ab'anan chi maak'a' sa' inch'ool xkohin sa' li xb'eleb'aal ch'iich' laj eechal we!

Eb' laj b'ichanel

¹³ Sutq'in, sutq'in chaq, at Sulam; sutq'in, sutq'in chaq: tqaj rilb'al aawu. K'a'ut naq teeraj rilb'al ru lix Sulam li naxajok sa' xyanqeb' li wiib' ch'uut?