Cantares 5 - Q'eqchi Bible

Li winq

¹ Ak xin'ok sa' xna'aj li wawimq, at wanab', at xsumwaanm. Ak xinxok linmiir ut linsununkil b'an, xintzeka li xya'al kab' sa' li xsok, ut xwuk' linb'iin ut li xya'al xtu' wakax. Ex was wiitz'in, tzekanqex ut uk'anqex, toj taak'ojlaaq eech'ool, ex wamiiw!

Maa'ani li winq Li ixq

² Ak yookin chi wark, ab'an linch'ool aj'ook. Xwab'i xyaab' xkux linrahom yo chi xtoch'b'al li okeb'aal: “Te li okeb'aal chiwu, at inrahom, at xsumwaanm, at inmukuy li maak'a' aamuxul. Xt'aqaak linjolom xb'aan li sujew, yo chi t'uluk li xchu'ke sa' li wismal”.

Li winq Li ixq

³ “Ak xwisi li waq' chiwix. Ma tink'e wi' chik? Ak xinch'ajeb' li woq. Ma tintz'ajniheb' wi' chik?”.

⁴ Linrahom xch'ik li ruq' sa' xhopolal li okeb'aal, ut k'ajo' naq naxamnak li waanm!

⁵ Xinwakliik re xteeb'al li kab'l chiru linrahom, ut sa'eb' li wuq' natz'iltz'otk li miir, ha'lesinb'il miir x'elk sa'eb' li ru'uj wuq' li xhoye'k sa' xb'een li xteeleb'aal li okeb'aal.

⁶ Xinte li kab'l chiru linrahom, ab'an ak xkoho chik linrahom, maa'ani chik. Xinkanaak chi sachso linch'ool naq xwab'i chi aatinak. Xinsik', ab'an ink'a' xintaw; xinb'oq, ab'an ink'a' xinxsume.

⁷ Xine'xtaw eb' laj k'aak'alenel li neke'xb'eeni li tenamit chiru q'oqyink. Xine'xteni, xine'xtiq'; eb' laj k'aak'alenel li wankeb' sa' xb'een li suttz'ak xe'risi lint'ikr li tz'aptz'o wi' li xnaq' wu.

⁸ Nintz'aama cheru, ex rixqilal Jerusalén, wi teetaw linrahom, k'aru teeye re? Yehomaq re naq kamk we chi rahok.

Eb' laj b'ichanel

⁹ K'aru nawno wi' ru laarahom sa' xyanqeb' li junch'ol chik, laa'at li ch'ina'usat sa' xb'een xteepal chixjunileb' li ixq? K'aru nawno wi' ru laarahom sa' xyanqeb' li junch'ol chik naq nakaye qe xb'aanunkil a'in?

Li ixq

¹⁰ Linrahom nalemtz'unk xtib'el ut kaqmoyink, nawno ru chi tz'aqal sa' xyanqeb' k'iila o'q'ob' chi winq.

¹¹ Li xjolom a'an tz'aqal chaab'il oor; li xchamal rismal a'an kama' xxaq li kala', q'eq q'eq jo' rix li tuntz'oq.

¹² Li xsa' eb' li ru chanchaneb' mukuy li neke'atink sa' xya'al xtu' wakax ut yookeb' chi hilank chire roqha'.

¹³ Li xnaq' ru a'an chanchan li xna'aj awimq awb'il wi' junes sununkil b'an; li xtz'uumal re chanchaneb' li uutz'u'uj, li najolk'ok wi' ha'lesinb'il miir.

¹⁴ Eb' li ruq' kama' li matq'ab' oor, uutz'u'ujinb'il rik'in chaab'il pek re Tarsis; li re xch'ool chanchan marfil ji'b'il ru chi us, uutz'u'ujinb'il rik'in raxjohinkil pek.

¹⁵ Eb' li ra' chanchaneb' li oqech yiib'anb'ileb' rik'in saqalpek, xaqab'anb'ileb' sa' xb'een li chaab'il oor. Linrahom na'ilok kama' li tzuul Líbano, k'ajo' xch'ina'usal kama'eb' li yaw.

¹⁶ Sa' li re wank li q'unil ut li ki'il, ut a'an q'axal ch'ina'us rilb'al. Jo' a'an linrahom, jo' a'an li xsumwaanm, ex rixqilal Jerusalén!