Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Cantares 4 - Q'eqchi Bible


Li xb'ich li xjunxaqalil li ixq Li winq

1 K'ajo' laach'ina'usal, at inrahomat, k'ajo' laach'ina'usal! Xsa' laawu, chanchaneb' li mukuy naq nak'utunk chaq chirix laat'ikr. Laawismal chanchaneb' jun ch'uutal chi chib'aat li yookeb' chi kub'eek sa' li tzuul Galahad.

2 Eb' li ruuch aawe chanchaneb' jun ch'uutal chi karneer li toj xe'raqe'k chi atink, re te'b'ese'q li rix; tz'aqaleb' re ru li ruuch aawe, ut maajun wank ta xjunes.

3 Li xtz'uumal aawe a'an kaq, kama' jun keel chi kaqi noq', ut laawe k'ajo' xch'ina'usal. Chanchaneb' granaad li xnaq' aawu, naq nak'utunk chaq chirix laat'ikr.

4 Laakux chanchan wi' li xnajt teramil ochoch laj David, kab'lanb'il rik'in tuqub'anb'il ru pek, b'arwi' t'uyt'uukeb' jun mil chi koleb' ch'iich', a'aneb' xkoleb' eb' li jwal kaweb' rib'.

5 Eb' laatu' chanchaneb' wi' wiib' ral li kej, kok' luteb', li yookeb' chi ichajib'k sa' xyanqeb' li saqihix.

6 Naq toj maji' nachalk chaq xmaayus li kutan ut taanajto'q li aak'ab', tinxik sa' xk'iche'il li miir ut sa' xb'oolil li k'ajpom.

7 Jwal ch'ina'usat chajunxaqalil, at inrahomat, tz'aqal aawe aawu!

8 Kim wik'in, at wixaqil; elqo Líbano! Kim wik'in, elqo Líbano! Kim, kub'en chaq sa' li tzuul Amaná, sa' li tzuul Senir ut Hermón, sa' xsokeb' li kaqkoj, sa' xna'ajeb' li hix.

9 Xawelq'a linch'ool, at wanab', at xsumwaanm; ka'ajwi' xinaawil ut xawelq'a linch'ool, rik'in jun ajwi' chi q'ol li wank chakux.

10 K'ajo' nasaho'k sa' inch'ool naq nikinaaq'alu, at wanab', at xsumwaanm! K'ajo' xchaq'alil ru laarahom: q'axal sa wi' chik chiru li b'iin; ut li xb'ook laasununkil jwal sununk wi' chik chiru chixjunileb' li sununkil b'an.

11 Xya'al kab' na'elk chi xtz'uumal aawe, at xsumwaanm. Xya'al kab' ut leech wank rub'el ru'uj aawaq', ut li xsununkil laawaq' kama' xsununkil li tzuul Líbano.

12 Laa'at li xtz'aptz'ookil na'aj awimq, at wanab', at xsumwaanm; laa'at xtz'aptz'ookil na'aj awimq ut yu'amha' kaaxtinb'il.

13 Laajunxaqalil chanchan jun sahil na'ajej wankeb' wi' ki'il q'een li jwal sa li ru, li xche'el li asaprán ut li naard.

14 li naard ut li asaprán, li kaneel ut sinamoom, ut k'iila paay chi k'ajpom, miir ut álohe, ut chixjunil li sununkil b'an jwal chaab'il.

15 Laa'at xyo'leb'aal ha' li wank sa' li awimq, laa'at li yu'amha' li nab'ulb'utk sa' xtoonal li tzuul Líbano.


Li ixq

16 Ajsi aawu, at iq' li nakatchalk chaq sa' releb'l iq', kim, at iq' li nakatchalk sa' xsak'leb' iq'! Apunqex sa' li xna'aj li wawimq, re naq taa'elq chaq li xsununkil. Chichalq linrahom sa' li xsahil na'aj ut chixtzekaaq ta li jwal sa xlowb'al!

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ