Cantares 2 - Q'eqchi Bible

Li ixq

¹ Laa'in ruutz'u'ujil li ru taq'a, laa'in chanchanin li saqihix li wank sa'eb' li tzuultaq'a.

Li winq

² Chanchan junaq saqihix sa'eb' li k'ix, jo'kan linrahom sa' xyanqeb' li ixqa'al.

Li ixq

³ Jo' xche'el li mansaan sa' xyanqeb' li che' sa' k'iche'b'aal, jo'kan linrahom sa' xyanqeb' li saaj winq. Ninrahi hilank sa' xmu, ut q'axal sa cho'q we naq ninlow li ru.

Li ixq

⁴ Xinroksi sa' rochochil li ninq'e, ut li reetalil li naheelank sa' inb'een, a'an li rahok!

⁵ K'ehomaq inkawub' rik'in k'uluj yiib'anb'il rik'in chaqi uub', k'ehomaq chaq inmansaan re naq tk'ulunq linch'ool, xb'aan naq kamk we chi rahok.

⁶ Li xtz'e uq' wank rub'el linjolom ut rik'in li xnim uq' ninxmetzo.

⁷ Nintz'aama cheru, ex rixqilal Jerusalén, sa' xk'ab'a'eb' li kej ut li yuk li wankeb' sa' k'iche', meerajsi ut meerisi xwara linrahom, toj a'an yaal re.

Ak xnume'k li hab'alq'e Li ixq

⁸ Jun xyaab' kuxej! A'an li raaro inb'aan! Wanle' chaq, yo chaq chi pisk'ok sa' xb'eeneb' li tzuul, taapisk'okje'q sa' xb'eeneb' li b'ool.

⁹ Linrahom chanchan junaq kej malaj jun ch'ina yuk. Ilomaq, xaqxo anaqwan chirix li tz'ak, yo chaq chi ilok sa' li b'entaan, nach'uukink chaq sa' li reex.

Li winq

¹⁰ Xtikib' aatinak linrahom ut xye we: “Xaqlin, at inrahom, k'ajo' xchaq'al aawu; kim wik'in.

¹¹ “K'e reetal, ak xnume'k li hab'alq'e, xch'anaak li hab' ut xyamaak.

¹² “Ak wankeb' li uutz'u'uj sa'eb' li tzuultaq'a, xwulak xq'ehil li b'ichank ut li xyaab' li mukuy na'ab'imank sa' li qana'aj.

¹³ “Ak xe'ok chi uuchink li xche'el li iig, ut eb' li uub' k'ajo' xsununkil li ratz'umeb'. Xaqlin, at inrahom, k'ajo' xchaq'al aawu; kim wik'in.

¹⁴ “At inmukuy, li nakamuq aawib' sa'eb' li saqoonak, sa'eb' li na'ajej ch'a'aj xtawb'al, k'ut chiwu laawilob'aal, kanab'in rab'inkil xyaab' laakux, xb'aan naq jwal sa rab'inkil xyaab' laakux ut k'ajo' xch'ina'usal laawu.

¹⁵ “Chapomaqeb' li yak, eb' li kok' yak li neke'xsach li awimq uub', a'eb' li qa'uub' li yookeb' chi atz'umak”.

Li ixq

¹⁶ Linrahom a'an we laa'in, ut laa'in rehin a'an li nak'aak'alenk sa' xyanqeb' li saqihix.

¹⁷ Naq toj maji' nachalk xmaayus li kutan ut taanajto'q li aak'ab', sutq'in chaq, at inrahom, jo'qat junaq kej malaj jun ch'ina yuk sa' li tzuul Béter.