Cantares 1 - Q'eqchi Bible

¹ A'an a'in li xchaq'alil ru b'ich k'uub'anb'il xb'aan laj Salomón.

Li xtz'ub'um li xsum'aatin Li ixq

² Chinaatz'ub' rik'in xsahil li xtz'uumal aawe! K'ajo' xsahil laarahom chiru li chaab'il b'iin,

³ q'axal sa chik chiru rutz'b'al laasununkil b'an! Laa'at jo'kat sununkil b'an li nahoye'k, jo'kan naq nakate'xra eb' li ixqa'al.

⁴ K'amin chawix, aanilaqo! Chinaawoksi sa' laawarib'aal, at in'awab'ej, re toosaho'q ut tooninq'ehiq qakab'ichal, ut q'axal chik tqayal xsahil laarahom chiru li b'iin! Jo'kan pe' naq raarookat!

Xsik'b'al li sum'aatin sa' xtiqwal li kutan Li ixq

⁵ Q'eqmoyink lintib'el, ut ch'ina'usin ajwi', ex rixqilal Jerusalén; q'eqin jo' li xmuheb'aaleb' laj Kedar, jo'eb' li xt'ilkem eb' laj Salmá.

⁶ Meek'e reetal naq q'eqin: a' li saq'e xk'atok re lintib'el. Eb' li ralal xk'ajol linna' xe'josq'o'k wik'in ut xine'xk'e chi xk'aak'alenkil li awimq uub', ab'an li wawimq laa'in, lin'uub', ink'a' xink'aak'ale.

⁷ At inrahom, ye we b'ar yookat chi xb'eresinkil laaketomq, b'ar nakak'eheb' chi hilank wa'leb', re naq ink'a' jo'aqin jun li ixq tz'aptz'o xnaq' ru, li naxik chirixeb' li xketomq eb' laawamiiw.

Eb' laj b'ichanel

⁸ Wi ink'a' nakanaw, at xchaq'alilat ru sa' xyanqeb' li ixq, taaqe li xnums eb' li ketomq ut chab'eresiheb' laachib'aat chi xk'atq li xmuheb'aaleb' laj k'aak'alehom ketomq.

B'ichank naq xe'xtaw rib'eb' Li winq

⁹ Chanchanat li ixqikawaay li naxik chiruheb' li xkaar laj Parahón, at xsumwaanm!

¹⁰ K'ajo' xch'ina'usal eb' laako sa' xyanqeb' laaka'xik, jwal ch'ina'us laakux sa' xyanqeb' li q'ol!

¹¹ Tqayiib' ka'xik oor cho'q aawe, wanq xsahob' ru yiib'anb'il rik'in plaat.

Li ixq

¹² Naq sotso li awab'ej chiru li xwarib'aal, linsununkil b'an naxpuka li xb'ook.

¹³ Linrahom chanchan jun q'aal chi miir, li nahilank chire linch'ool.

¹⁴ Linrahom chanchan sununkil b'an li nachalk sa' li awimq re En-gadi.

Li winq

¹⁵ K'ajo' aach'ina'usal, at xsumwaanm, k'ajo' xchaq'al aawu! Chanchaneb' mukuy xsa'eb' laawu.

Li ixq

¹⁶ Q'axal ch'ina'usat, at inrahom, sachb'ach'oolej aawilb'al! Li qahilob'aal a'an li pach'aya';

¹⁷ eb' li yaw a'aneb' xtz'amb'ahil li qochoch, ut eb' li saqichaj a'aneb' li qamuhel re xraab'al qib' chiqib'il qib'.