Apocalipsis 7 - Q'eqchi Bible

Te'kole'q eb' laj k'anjel chiru li Yos

¹ Chirix chik a'an kiwil kaahib' chi ánjel xaqxookeb' sa' xkaaxukuutil li ruuchich'och', yookeb' chi xramb'al li kaahib' chi riq'ul li ruuchich'och' re naq ink'a' taa'apunq li iq' sa' xb'een li ruuchich'och', chi moko sa' xb'een li palaw malaj sa' xb'een junq toonaq chi che'.

² Moqon kiwil jun chik li ánjel, yo chaq chi taqe'k sa' releb'l saq'e, wan chaq li xtz'apleb' li yo'yookil Yos rik'in. Ut kaw xyaab' xkux naq kixjap re chi xyeeb'al reheb' li kaahib' chi ánjel li ke'k'ehe'k xwankil chi xrahob'tesinkil li ruuchich'och' ut li palaw:

³ “Meerahob'tesi li ruuchich'och' chi moko li palaw malaj eb' li che', toj qak'ehaqeb' wan reetalileb' rik'in kaaxt chi xpeekemeb' laj k'anjel chiru li qaYos”, chan.

⁴ Ut kiwab'i li xk'ihaleb' li k'eeb'ileb' reetalil: kaahib' xwaqxaqk'aal mil (144,000) ke'xk'ul reetalil sa' xyanqeb' chixjunil li xteepaleb' li ralal xk'ajol laj Israel.

⁵ Sa' xyanqeb' xteepal laj Judá kab'laju mil k'eeb'ileb' reetalil; sa' xyanqeb' xteepal laj Rubén kab'laju mil; sa' xyanqeb' xteepal laj Gad kab'laju mil;

⁶ sa' xyanqeb' xteepal laj Aser kab'laju mil; sa' xyanqeb' xteepal laj Neftalí kab'laju mil; sa' xyanqeb' xteepal laj Manasés kab'laju mil;

⁷ sa' xyanqeb' xteepal laj Simehón kab'laju mil; sa' xyanqeb' xteepal laj Leví kab'laju mil; sa' xyanqeb' xteepal laj Isakar kab'laju mil;

⁸ sa' xyanqeb' xteepal laj Sabulón kab'laju mil; sa' xyanqeb' xteepal laj José kab'laju mil; sa' xyanqeb' xteepal laj Benjamín kab'laju mil k'eeb'ileb' reetalil.

Li xnimal xk'ihaleb' li sik'b'ileb' ru sa' choxa

⁹ Chirix chik a'an kin'ilok, ut kink'e reetal naq k'ajo' xk'ihaleb' li tenamit! Maa'ani naruhank chi rajlankileb': chalenaqeb' chaq sa' chixjunileb' xteepal li xtenamit sa' ruuchich'och', yalaq chanru neke'ilok ut neke'aatinak, xaqxookeb' chiru li nimajwal k'ojarib'aal ut chiru li Karneer, tiqtookeb' rik'in saqi aq' ut wank xxaq mokooch sa' ruq'eb'.

¹⁰ Ut eb' a'an ke'xjap re chi kaw xyaab'eb' xkux: “Li kolb'a ib' nachalk rik'in li qaYos k'ojk'o sa' li xnimajwal k'ojarib'aal, ut rik'in li Karneer”, chankeb'.

¹¹ Ut chixjunileb' li ánjel li xaqxookeb' chire li k'ojarib'aal, chi xsutam eb' li cheekel winq ut li kaahib' chi yo'yookeb', ke'xhupub' rib' chiru li nimajwal k'ojarib'aal ut ke'xloq'oni li Yos,

¹² yookeb' chi xyeeb'al: “Jo'kan taxaq! A' taxaq li qaYos chiterq'usiiq xk'ab'a'. Rehaq taxaq li loq'al, li xnimal na'leb', li yoxink, li loq'onink, li wankilal ut li kawilal chi junelik q'e kutan. Jo'kan taxaq!”.

¹³ Toja' naq jun reheb' li cheekel winq ki'ok chi aatinak ut kixye we: “Eb' li tiqtookeb' rik'in saqi aq', aniheb' ut b'ar xlaje'chalk chaq?”

¹⁴ Kinchaq'ok chiru: “Wa', laa'at nakatnawok re”, chankin re. Ut a'an kixye: “A'aneb' a'in li xe'chalk chaq sa' li xnimal rahilal; xe'xpuch' li raq'eb' ut xe'xsaqob'resi sa' li xkik'el li Karneer.

¹⁵ “Jo'kan naq wankeb' chiru li xnimajwal k'ojarib'aal li Yos ut neke'k'anjelak chiru chi q'eq ut chi kutan sa' li rochoch; ut li k'ojk'o sa' li nimajwal k'ojarib'aal taamuheelanq reheb'.

¹⁶ Ink'a' chik te'tz'okaaq chi moko te'chaqiq chik reheb'; ink'a' chik te'kete'q xb'aan li saq'e chi moko xb'aan xtiqwal chixjunil k'a'aq re ru.

¹⁷ Xb'aan naq li Karneer li wank sa' xyi li nimajwal k'ojarib'aal tixb'eresiheb' ut tixk'am xb'eheb' toj sa'eb' xyo'leb'aal li yu'amha'. Ut li Yos taachaqihob'resinq re chixjunil li xya'aleb' ru”.