Apocalipsis 6 - Q'eqchi Bible

Li Karneer kixte li wuqub' chi tz'apleb'

¹ Naq li Karneer kixte jun reheb' li wuqub' chi tz'apleb', kiwil ut kiwab'i li xb'een reheb' li kaahib' chi yo'yookeb', jo' xyaab' li kaaq naq kixye: “Kim”.

² Kiwil, ut wank aran jun li saqi kawaay; ut li k'ojk'o chi xb'een wan chaq jun xsimaj. Kik'ehe'k jun xkoroon ut koho chi ak xq'axok u ut toj taaq'axoq wi' chik u.

³ Naq kixte li xkab' tz'apleb', kiwab'i li xkab' yo'yo, yo chi xyeeb'al: “Kim”.

⁴ Toja' naq ki'elk jun chik kawaay, kaq rix, ut li k'ojk'o chi xb'een kik'ehe'k xwankil re risinkil li tuqtuukilal sa' ruuchich'och', re naq te'xkamsi rib' chirib'ileb' rib' eb' li winq; ut kiq'axtesiik re jun li nimla jutz' ch'iich'.

⁵ Naq kixte li rox tz'apleb', kiwab'i li rox yo'yo, yo chi xyeeb'al: “Kim”. Kiwil, ut aran wank jun li q'eqi kawaay, ut li k'ojk'o chi xb'een wan chaq jun li b'isleb' sa' ruq'.

⁶ Ut kiwab'i jo' jun xyaab' kuxej sa' xyiheb' li kaahib' chi yo'yookeb', yo chi xyeeb'al: “Jun b'iis chi triiw chiru lajeeb' xka'k'aal chi tumin, oxib' b'iis chi sebada chiru lajeeb' xka'k'aal chi tumin; ab'an mik'a' aab'aanu re li aseeyt ut li b'iin”.

⁷ Naq kixte li xka tz'apleb', kiwab'i li xyaab' xkux li xka yo'yo, yo chi xyeeb'al: “Kim”.

⁸ Toja' naq kiwil, ut aran wank jun li kawaay, chaacha rix. Li k'ojk'o chi xb'een, a'an Kamk xk'ab'a', ut li xb'alb'a yo chi taaqenk re. Ut ke'k'ehe'k xwankil sa' xb'een li xka jachal li ruuchich'och', re kamsink rik'in ch'iich', rik'in we'ej, rax kamk ut rik'ineb' li josq' aj xul wankeb' sa' ruuchich'och'.

⁹ Naq kixte li ro' tz'apleb', kiwil rub'el li artal wankeb' aran li raanmeb' li ke'kamsiik sa' xk'ab'a' li Raatin li Yos ut li yaal ke'xk'e wi' xch'ooleb'.

¹⁰ Ut ke'ok chi xjapb'aleb' re chi kaw xyaab'eb' xkux, ut ke'xye: “At santil Eechalinel, laa'at paab'ajelat, toj jo'q'e tatkanaaq chi ink'a' tatraqoq aatin sa' xb'eeneb' li wankeb' sa' ruuchich'och' ut ink'a' taweeqajuniheb' li ke'kamsink qe?”.

¹¹ Toja' naq kik'ehe'k jun li saqi aq' re li junjunq ut kiyeemank reheb' naq che'oyb'eninq wan chik kach'inaq toj taatz'aqloq li xk'ihaleb' li rech aj k'anjelil jo'wi' li xk'ihaleb' li riitz'in li tento te'kamsiiq jo'eb' a'an.

¹² Naq li Karneer kixte li xwaq tz'apleb', kiwil, ut kiwank jun nimla hiik; li saq'e kiq'eqo'k jo' jun li t'ikr mutzuk ru, li po kikanaak chixjunil chanchan kik'

¹³ ut eb' li xchahimal li choxa ke't'anje'k sa' xb'een li ruuchich'och', jo' li xche'el li iig narach'ab'eb' li ru naq nachilchiliik xb'aan li kawil iq'.

¹⁴ Li choxa ki'isiik kama' nab'ote'k junaq hu, ut chixjunileb' li tzuul ut li na'ajej sutsuukeb' xb'aan li palaw kilaje'eek'asiik sa' xna'ajeb'.

¹⁵ Toja' naq eb' li awab'ej re li ruuchich'och', li ninqeb' xwankil, eb' li xjolomileb' laj puub', eb' li b'ihom, eb' li kaweb' rib' ut chixjunileb' laj loq'b'il k'anjel ut li wankeb' chi ach'ab'anb'il, koxe'xmuqatq rib' sa'eb' li ochoch pek ut sa'atqeb' li saqoonak sa'eb' li tzuul;

¹⁶ ut ke'xye reheb' li tzuul ut reheb' li saqoonak: “T'anenqex chaq sa' qab'een ut muqumaqo chiru li k'ojk'o sa' li xnimajwal k'ojarib'aal ut chiru li xjosq'il li Karneer!

¹⁷ Xb'aan naq xtaw xq'ehil li xnimal xkutankil li tojb'amaak, ut ani taaruhanq chi xkuyb'al a'an?”.