Apocalipsis 21 - Q'eqchi Bible

Li ak' choxa ut li ak' ruuchich'och'

¹ Toja' naq kiwil jun ak' choxa ut jun ak' ruuchich'och', xb'aan naq li xb'een choxa ut li xb'een ruuchich'och' ak ke'nume'k ut li palaw moko wank ta chik.

² Ut kiwil li santil tenamit, a' li ak' Jerusalén, yo chaq chi kub'eek sa' choxa rik'in li Yos, jo' jun li ixq ok re chi sumlaak, tiqib'anb'il chi us cho'q re li xb'eelom.

³ Ut kiwab'i jun xyaab' kuxej ki'elk chaq sa' li nimajwal k'ojarib'aal, yo chi xyeeb'al chi kaw: “A'an a'in li xmuheb'aal li Yos rik'ineb' li poyanam. Li Yos tixk'ojob' li xmuheb'aal sa' xyanqeb', ut a'anaqeb' li xtenamit ut a'anaq li Yos rik'ineb'.

⁴ Tixchaqihob'resi chixjunil li xya'aleb' ru, ut ink'a' chik taawanq kamk, chi moko yaab'ak, chi moko japok e malaj rahilal, xb'aan naq li najter ruuchich'och' ak xnume'k”.

⁵ Toja' naq li k'ojk'o sa' xb'een li nimajwal k'ojarib'aal kixye: “K'e reetal, laa'in tin'ak'ob'resi chixjunil”. Kixye ajwi': “Tz'iib'a, xb'aan naq eb' li aatin a'in tz'aqal yaal ut paab'ajel”.

⁶ Ut kixye we: “Ak xyaalo'k. Laa'in li Alfa ut li Omega, li xtiklajik ut li roso'jik. Ani taachaqiq re, tink'e chi uk'ak chi maatan sa' li yo'leb'aal ha' re li yu'am.

⁷ Ani taaq'axoq u, taareechani chixjunil a k'a'aq re ru a'in: laa'inaq li xYos ut a'anaq li walal.

⁸ A'ut eb' laj xiw, li ink'a' neke'paab'ank, eb' li tz'i'b'eetal xna'leb', eb' laj kamsinel ras riitz'in, eb' laj muxuleb' rib', eb' laj tuul, eb' laj loq'oninel li yal k'oxlanb'il yos ut chixjunileb' laj tik'ti', taawanq xna'ajeb' sa' li palaw yo xxamlel ut k'ajo' xtiqwal: a'an a'in li xkab' kamk”.

Li ak' Jerusalén

⁹ Toja' naq kichalk jun reheb' li wuqub' chi ánjel li wankeb' chaq rik'in li wuqub' chi sek' nujenaqeb' rik'in li wuqub' chi rahilal chaalel sa' roso'jik; kinraatina ut kixye: “Kim, ink'utaq chawu li Ixaqilb'ej, li rixaqil li Karneer”.

¹⁰ Ut sa' musiq'ej kinxk'am sa' xb'een jun li nimla tzuul, najt xteram, ut kixk'ut chiwu li santil tenamit Jerusalén, yo chaq chi kub'eek sa' choxa rik'in li Yos,

¹¹ wank li xloq'al li Yos rik'in. Li xlemtz'unkil chanchan li q'axal tertookil pek, kama' li jaspe saqenk ru.

¹² Sutsu chaq rik'in jun li nimla tz'ak najt xteram, wank kab'laju rokeb'aal; ut sa' xb'eeneb' li okeb'aal wankeb' kab'laju chi ánjel ut tz'iib'anb'ileb' kab'laju chi k'ab'a'ej, li xk'ab'a' eb' li kab'laju xteepaleb' li ralal xk'ajol laj Israel.

¹³ Sa' releb'l saq'e wankeb' oxib' chi okeb'aal, sa' releb'l iq' oxib' chi okeb'aal, sa' rokeb'l iq' oxib' chi okeb'aal ut sa' rokeb'l saq'e oxib' chi okeb'aal.

¹⁴ Li tz'ak sutsu wi' li tenamit, a'an k'ojob'anb'il sa' xb'een kab'laju chi rub'elankil, ut chiruheb' a'an tz'iib'anb'il xk'ab'a' eb' li kab'laju chi x'apóstol li Karneer.

¹⁵ Li yo chi aatinank we wank jun xb'aar oor re xb'isb'al li tenamit, jo'wi' re xb'isb'aleb' li rokeb'aal ut li xtz'akul.

¹⁶ Li tenamit kaaxukuut naq wank: li xkelam juntaq'eet rik'in li xq'eham. Li ánjel kixb'is li tenamit chiru li xb'aar: waqlaju roxk'aal xkab' o'q'ob' (456) leew li xkelam, li xq'eham ut li xteram; juntaq'eet li junjunq.

¹⁷ Chirix a'an kixb'is li xtz'akul: ka'k'aal moqoj xteram, jo' chanru neke'b'isok li winq, a'an ajwi' xb'isleb' li ánjel.

¹⁸ Li tz'ak yiib'anb'il rik'in jaspe ut li tenamit rik'in tz'aqal oor, chanchan li saq ru lem.

¹⁹ Chixjunil li rub'elankil li xtz'akul li tenamit wank xsahob' ru rik'in chixjunil xchaq'al ru pek: li xb'een rub'elankil yiib'anb'il rik'in jaspe, li xkab' rik'in safiro, li rox rik'in kalsedonia, li xka rik'in esmeralda,

²⁰ li ro' rik'in sardónika, li xwaq rik'in kornalina, li xwuq rik'in krisólito, li xwaqxaq rik'in berilo, li xb'ele rik'in topasio, li xlaje rik'in krisoprasa, li xjunlaju rik'in jasinto ut li xkab'laju rik'in amatista.

²¹ Li kab'laju chi okeb'aal a'aneb' kab'laju chi lemtz'il q'ol: jun sa' li junjunq chi okeb'aal; ut li xnimb'ehil li tenamit a'an tz'aqal oor, saqen saqenk ru jo' li lem.

²² Ab'anan ink'a' kiwil li rochoch li Yos sa' li tenamit, xb'aan naq li Qaawa', li Nimajwal Yos, jo' ajwi' li Karneer a'aneb' li Santil Ochoch aran.

²³ Li tenamit ink'a' chik naraj ru taakutanob'resiiq xb'aan li saq'e chi moko xb'aan li po, xb'aan naq nakutanob'resiik xb'aan li xnimal xloq'al li Yos, ut li Karneer a'an li xsaqenk.

²⁴ Eb' li xninqal ru tenamit te'b'eeq sa' li xkutan saqenk, ut eb' li awab'ej re li ruuchich'och' te'xk'am chaq aran li xb'ihomaleb'.

²⁵ Eb' li rokeb'aal ink'a' te'tz'apmanq chi kutan, xb'aan naq maak'a'aq q'oqyink aran.

²⁶ Aran taaq'axtesiiq li xloq'al ut li xb'ihomal eb' li xninqal ru tenamit.

²⁷ Maak'a' k'aru muxb'il taa'ok chisa', chi moko eb' li neke'b'aanunk re li tz'i'b'eetalil na'leb' malaj eb' laj tik'ti', ka'ajeb' b'an wi' li tz'iib'anb'il xk'ab'a'eb' sa' li xhuhil li yu'am re li Karneer.