Apocalipsis 19 - Q'eqchi Bible

Sahil ch'oolej sa' choxa xb'aan li xt'anik Babilonia

¹ Chirix chik a'an kiwab'i sa' choxa jo' xyaab' xkux xiikileb' li poyanam, yookeb' chi xyeeb'al chi kaw: “Aleluya! Li kolb'a ib', li loq'al ut li wankilal ka'ajwi' rik'in li qaYos nachalk,

² xb'aan naq naraqok aatin sa' tiikilal ut rik'in yaal: xteneb' tojb'amaak sa' xb'een li xnimal ru aj yumb'eet, a' li xpo'ok ru li ruuchich'och' rik'in li xmuxb'al rib'; ut xk'e reeqaj li xkik'eleb' laj k'anjel li ke'kamsiik xb'aan li ixq”.

³ Ut ke'xye jun sut chik: “Aleluya! Li xsib'el laj yumb'eet nataqe'k chi junelik q'e kutan”.

⁴ Toja' naq li kaahib' xka'k'aal chi cheekel winq ut li kaahib' chi yo'yookeb' ke'xhupub' rib' ut ke'xloq'oni li Yos, li k'ojk'o sa' li xnimajwal k'ojarib'aal, naq yookeb' chi xyeeb'al: “Amén, aleluya!”.

⁵ Ut ki'elk jun xyaab' kuxej sa' li nimajwal k'ojarib'aal, kixye: “Chenima ru li qaYos chejunilex laj k'anjel chiru, jo'k'ihal li nekexpaab'ank re, jo' kok' jo' ninq”.

⁶ Ut kiwab'i jo' xyaab' xkux xiikileb' li poyanam, chanchan xyaab' k'iila ha' ut xyaab' kawil kaaq, yookeb' chi xyeeb'al: “Aleluya! Li Qaawa', li qaNimajwal Yos x'ok chi awab'ejink.

⁷ Choosaho'q, chik'utunq xsahil qach'ool ut chiqak'e xnimal xloq'al, xb'aan naq xtaw xq'ehil xsumlajik li Karneer. Li rixaqil ak xkawresi rib'

⁸ ut xk'ehe'k re li xtiqib'ankil rib' rik'in chaab'il liino saqpotz'in”. Li liino a'an li xchaab'il b'aanuhomeb' li sant.

⁹ Chirix chik a'an li ánjel kixye we: “Tz'iib'a: «Us xaq reheb' li b'oqb'ileb' chi wa'ak sa' xninq'ehinkil xsumlajik li Karneer»”. Kixye ajwi' we: “Chixjunil a'in a'an raatin li Yos ut tz'aqal yaal”.

¹⁰ Toja' naq kint'ane'k rub'el roq li ánjel chi xloq'oninkil ru, ut a'an kixye we: “Maab'aanu a'in! Laa'in aawech moosil; wech moosileb' ajwi' eb' laawas aawiitz'in li neke'xk'uula sa' xch'ooleb' li xch'olob'ahom li Jesus. A' li Yos tento taaloq'on ru”, chan we. Xb'aan naq eb' li propeet a'aneb' li neke'xk'uula sa' xch'ooleb' li xch'olob'ahom li Jesus.

Li xb'een nimla yalok sa' choxa

¹¹ Toja' naq kiwil li choxa teeto ut aran wank jun kawaay saq rix; ut li k'ojk'o sa' xb'een, “Tiik xch'ool” ut “Paab'ajel” naxk'ab'a'in: naraqok aatin ut nayalok sa' tiikilal.

¹² Li xsa' ru chanchan raq'xam; wank naab'al li koroon neke'lemtz'unk ru sa' xjolom ut tz'iib'anb'il jun li k'ab'a'ej chiru, ka'ajwi' a'an natawok ru.

¹³ Li raq' wank chirix tz'ab'il sa' kik' ut li xk'ab'a' a'an: “Raatin li Yos”.

¹⁴ Ut eb' li k'iila teep chi choxahil aj puub' tiqtookeb' rik'in chaab'il liino saqsaq ru, yookeb' chi xtaaqenkil ut k'ojk'ookeb' chaq chirix saqi kawaay.

¹⁵ Sa' re na'elk chaq jun li q'esnal ch'iich' re xyok'b'aleb' li tenamit. Tixb'eresiheb' rik'in b'aar ch'iich', ut a'an ajwi' taayatz'oq uub' re risinkil li b'iin, reetalil li xnimal xjosq'il li Nimajwal Yos.

¹⁶ Chiru li raq' ut chiru li ra' tz'iib'anb'il jun li k'ab'a'ej: “Awab'ej sa' xb'eeneb' li awab'ej ut Qaawa' sa' xb'eeneb' li qaawa'”.

¹⁷ Chirix chik a'an kiwil jun li ánjel xaqxo sa' xb'een li saq'e, japjo re chi xyeeb'al chi kaw xyaab' xkux reheb' chixjunil li xul neke'xik'ank chiru choxa: “Kimqex, ch'utub'omaq eerib' re li nimla wa'ak kawresinb'il xb'aan li Yos,

¹⁸ re naq teetiw xtib'eleb' li awab'ej, xtib'eleb' li xjolomileb' laj puub' ut eb' li kaweb' rib', li xtib'eleb' li kawaay ut li k'ojk'ookeb' sa' xb'eeneb', xtib'eleb' chixjunileb' li winq jo' li wankeb' chi ach'ab'anb'il jo'eb' laj loq'b'il k'anjel, jo' kok' jo' ninq”.

¹⁹ Toja' naq kiwil li josq' aj xul ut eb' li awab'ej re li ruuchich'och' rochb'eeneb' li xk'iila teep chi aj puub', ch'utch'uukeb' re te'yaloq rik'in li k'ojk'o chaq sa' xb'een li kawaay jo'wi' rik'ineb' li xk'iila teep chi aj puub'.

²⁰ Ab'an li josq' aj xul kichape'k rochb'een li propeet aj b'alaq', a' li kib'aanunk chaq re sachb'ach'oolej chiru li josq' aj xul, ut sa' xk'ab'a' a'an kixb'alaq'iheb' li xk'ulumeb' reetalil li josq' aj xul ut ke'xloq'oni li xjalam u. Eb' li wiib' a'in ke'kute'k chi xkab'ichaleb' chi yo'yo sa' xxamlel li palaw li yo chi k'atk rik'in asuupr.

²¹ Eb' li xkomon kilaje'kamsiik xb'aan li ch'iich' na'elk chaq sa' re li k'ojk'o sa' xb'een li kawaay; ut rik'in li xtib'eleb' ke'nujak xsa'eb' chixjunileb' li xik'anel xul.