Apocalipsis 16 - Q'eqchi Bible

¹ Chirix chik a'an kiwab'i jun xyaab' kuxej q'axal kaw sa' rochoch li Yos, yo chi xyeeb'al reheb' li wuqub' chi ánjel: “Ayuqex ut hoyomaq sa' xb'een li ruuchich'och' li wuqub' chi sek', li wank xjosq'il li Yos chisa'”.

Eb' li wuqub' chi sek'

² Toja' naq koho li xb'een ánjel ut kixhoy li xsek' sa' xb'een li ruuchich'och'; ut kichalk jun yiib' aj xox, q'axal ra, sa' xb'eeneb' li winq li wankeb' reetalil li josq' aj xul rik'in ut neke'xloq'oni li xjalam u.

³ Li xkab' li ánjel kixhoy li xsek' sa' xb'een li palaw, ut a'an kisutq'iik jo' xkik'el kamenaq, ut chixjunil li k'a'aq re ru yo'yo sa' li palaw kilaje'kamk.

⁴ Li rox kixhoy li xsek' sa' xb'eeneb' li nima' ut sa' xb'eeneb' li yo'leb'aal ha', ut ke'sutq'iik cho'q kik'.

⁵ Toja' naq kiwab'i li ánjel li wank xwankil sa' xb'eeneb' li ha', kixye: “At qasantil Qaawa', li wankat anaqwan ut li ak wankat chaq, xatraqok aatin sa' tiikilal,

⁶ xb'aan naq eb' a'an xe'xhoy xkik'eleb' li sant jo'wi' li xkik'eleb' li propeet, ut laa'at xak'e li kik' chi ruk'eb': jo'kan naq xe'xk'ul tz'aqal xq'ajkamunkileb'”.

⁷ Ut kiwab'i jun xyaab' kuxej sa' li artal yo chi xyeeb'al: “Relik chi yaal, at Qaawa', at Nimajwal Yos, xatraqok aatin sa' tiikilal ut rik'in yaal”.

⁸ Li xka li ánjel kixhoy li xsek' sa' xb'een li saq'e, ut kik'ehe'k xwankil chi xk'atb'aleb' li winq rik'in xam.

⁹ Ut eb' li winq ke'k'ate'k xb'aan xnimal tiqwal, ut ke'xmajewa li Yos li wank xwankil sa' xb'eeneb' li rahilal a'an: ink'a' ke'xjal xk'a'uxl, ink'a' ke'xk'e xloq'al li Yos.

¹⁰ Toja' naq li ro' ánjel kixhoy li xsek' sa' xb'een li xk'ojarib'aal li josq' aj xul. Ut li x'awab'ejihom kikanaak sa' aak'ab'. Li tenamit ke'ok chi xtiwb'al li ru'uj raq'eb' xb'aan li ra,

¹¹ ke'xmajewa li xYos li choxa xb'aan li rahilal ut eb' li xox, ab'an ink'a' ke'xjal xk'a'uxeb' chirix li xb'aanuhomeb'.

¹² Li xwaq li ánjel kixhoy li xsek' sa' xb'een li nima' Éwfrates, ut kichaqik li ha' re naq kawresinb'ilaq xb'eheb' li awab'ej te'chalq chaq sa' releb'l saq'e.

¹³ Ut kiwil chi elk sa' re li nimla k'anti', sa' re li josq' aj xul ut sa' re li propeet aj b'alaq' oxib' tz'ajn aj musiq'ej kama'eb' li amoch.

¹⁴ A'aneb' xmusiq'eb' laj tza, li neke'b'aanunk sachb'ach'oolej ut neke'xik wankeb' wi' li awab'ej re chixjunil li ruuchich'och' re xch'utub'ankileb' chi yalok sa' li xnimal xkutankil li Nimajwal Yos.

¹⁵ “K'ehomaq reetal, laa'in tinchalq jo' junaq aj elq'. Us xaq re li yooq chi yo'lek ut tixk'uula li raq', re naq ink'a' taab'eeq chi t'ust'u ut ink'a' taa'ile'q li xxutaan”.

¹⁶ Toja' naq eb' li oxib' chi tz'ajn aj musiq'ej ke'xch'utub' li awab'ej sa' jun li na'ajej, Armakedón xk'ab'a', sa' aatinob'aal hebreo.

¹⁷ Li xwuq li ánjel kixhoy li xsek' sa' iq', ut ki'elk chaq jun xyaab' kuxej sa' rochoch li Yos, wan wi' li k'ojarib'aal, ut kixye chi kaw: “Yaalo'jenaq chik a'an!”.

¹⁸ Ut ke'chalje'k raq'kaaq, xyaab' kuxej, kaaq ut jun li nimla hiik: maajun sut wanjenaq hiik jo'kan xkawil, chalen chaq sa' rokikeb' li winq sa' ruuchich'och'.

¹⁹ Li Nimla Tenamit oxib' jachal ki'elk, ut li xtenamiteb' li ruuchich'och' kilaje't'ane'k; ut kinaqk chaq sa' xch'ool li Yos li nimla Babilonia re xk'eeb'al chi ruk'eb' li jun sek' chi b'iin wan wi' li xnimal xjosq'il.

²⁰ Toja' naq chixjunileb' li na'ajej sutsuukeb' xb'aan li palaw ke'elelik ut eb' li tzuul ke'sachk.

²¹ Ut kit'ane'k chaq ninqi saqb'ach sa' choxa sa' xb'eeneb' li tenamit, o'taqk'aal liib'r raalal li junjunq; ut eb' li tenamit ke'xmajewa li Yos xb'aan xrahil li saqb'ach, xb'aan naq relik chi yaal naq a'an jun nimla rahilal.