Apocalipsis 14 - Q'eqchi Bible

Li Karneer ut eb' li sik'b'ileb' ru xb'aan li Yos

¹ Kin'ilok wi' chik, ut wank aran li Karneer xaqxo sa' xb'een li tzuul Sión, rochb'eeneb' kaahib' xwaqxaqk'aal mil (144,000) chi poyanam, wank li xk'ab'a' li Karneer ut li xk'ab'a' li xYuwa'eb' tz'iib'anb'il chi xpeekemeb'.

² Ut kiwab'i jun xyaab' kuxej sa' choxa, jo' xyaab' k'iila ha', jo' naq namoqk jun li kawil kaaq; li xyaab' kuxej kiwab'i chanchan xyaab' xkuxeb' laj aarp naq yo li aarpik.

³ Yookeb' chaq chi xb'ichankil jun li ak' b'ich chiru li nimajwal k'ojarib'aal jo'wi' chiruheb' li kaahib' chi yo'yookeb' ut eb' li cheekel winq. Ut maa'ani kiruhank chi xtzolb'al li b'ich a'an, ka'ajwi' li kaahib' xwaqxaqk'aal mil, a'aneb' li ke'kole'k sa' xyanqeb' li wankeb' sa' ruuchich'och'.

⁴ A'aneb' a'in li ink'a' ke'xmux rib'eb' rik'in ixq xb'aan naq wankeb' chi xjunxaqalil: neke'xtaaqe li Karneer yalaq b'ar. Eb' a'in kolb'ileb' sa' xyanqeb' li winq jo'keb' xb'een u cho'q re li Yos ut li Karneer.

⁵ Ink'a' ke'tik'ti'ik, xb'aan naq maak'a' xmaakeb'.

Li oxib' chi ánjel

⁶ Chirix chik a'an kiwil jun chik li ánjel yo chi xik'ank sa' xyi li choxa, wan chaq rik'in jun li chaab'il esilal li maak'a' roso'jik: a'an tento xpuktesinkil rik'ineb' li wankeb' sa' ruuchich'och' jo' ajwi' rik'ineb' chixjunil li amaq' ut tenamit, yalaq chan re ru neke'ilok ut neke'aatinak.

⁷ Ut a'an kixye chi kaw xyaab' xkux: “Chexiwa ru li Yos ut chek'e xloq'al xb'aan naq xtaw xq'ehil naq taaraqoq aatin; cheloq'oni li kib'aanunk re li choxach'och', li palaw ut eb' li yo'leb'aal ha'”.

⁸ Ut jun chik li ánjel kitaaqenk re, kixye: “Xt'ane'k, ak xt'ane'k li nimla tenamit Babilonia, a' li kik'ehok chi maakob'k chixjunileb' li tenamit sa' ruuchich'och' rik'in li xmaa'usilal. Chanchan naq kixkaltesiheb' rik'in b'iin. Ut a'an k'ajo' naq kixchiq' xjosq'il li Yos!”.

⁹ Moqon jun chik li ánjel, a' li rox, kitaaqenk reheb' ut kixye chi kaw xyaab' xkux: “Wi junaq tixloq'oni li josq' aj xul jo'wi' li xjalam u, ut tixk'ul li reetalil chi xpeekem malaj chi ruq',

¹⁰ taachalq tojb'amaak sa' xb'een. Tento taaruk' xb'iinul xjosq'il li Yos, li ak k'eeb'il, chi maak'a' xyu, sa' li xsek'ul li xjosq'il. Ut taarahob'tesiiq rik'in xam ut asuupr, chiruheb' li santil ánjel ut chiru li Karneer.

¹¹ Li xsib'el li xrahilaleb' taataqe'q chi junelik q'e kutan ut maak'a'aq hilank chi q'eq chi kutan cho'q reheb' li te'loq'oninq re li josq' aj xul ut li xjalam u jo'wi' cho'q reheb' li te'xk'ul li reetalil li xk'ab'a'”.

¹² Arin na'ajmank ru li xkuyumeb' li sant, a'aneb' li neke'xk'e xch'ool chirix li xchaq'rab' li Yos ut chi xpaab'aankil li Jesus.

¹³ Chirix chik a'an kiwab'i jun xyaab' kuxej yo chi xyeeb'al sa' choxa: “Tz'iib'a: «Chalen anaqwan us xaq reheb' li kamenaq neke'kamk rik'in li Qaawa'»”. “Yaal -chan li Musiq'ej-, hilaanqeb' rik'in li xk'anjeleb', xb'aan naq li xb'aanuhomeb' neke'ochb'eenink reheb'”.

Li q'olom sa' ruuchich'och'

¹⁴ Kin'ilok wi' chik, ut aran wank jun li saqi choql, ut sa' xb'een li choql k'ojk'o jun kama' rilob'aal li K'ajolb'ej: sa' xjolom wank jun li koroon oor ut sa' ruq' jun q'esnal ch'iich'.

¹⁵ Moqon ki'elk jun chik li ánjel sa' rochoch li Yos, japjo re chi xyeeb'al chi kaw xyaab' xkux re li k'ojk'o sa' xb'een li choql: “Tikib' li setok rik'in laach'iich', xb'aan naq xwulak xq'ehil li q'olok: ak xq'ano'k li awimq sa' ruuchich'och'”.

¹⁶ Ut li k'ojk'o sa' xb'een li choql kixch'ik li xch'iich' sa' li ruuchich'och', ut li ruuchich'och' kiq'ole'k.

¹⁷ Toja' naq jun chik li ánjel ki'elk sa' rochoch li Yos li wank sa' choxa, wank ajwi' jun q'esnal ch'iich' rik'in.

¹⁸ Ut jun chik li ánjel ki'elk chaq sa' li artal, a' li wank xwankil sa' xb'een li xam, ut kaw kixjap re chi xyeeb'al re li wank xq'esnal ch'iich': “Isi laaq'esnal ch'iich' ut set chi kuut li uub' wankeb' sa' ruuchich'och', xb'aan naq ak cheekeb' chik li ru”.

¹⁹ Toja' naq li ánjel kixch'ik li xch'iich' sa' li ruuchich'och', kixxok li uub' sa' li ruuchich'och' ut kixkuteb' sa' li nimla yatz'leb'aal wan wi' li xjosq'il li Yos.

²⁰ Ke'xyatz' li uub' chirix li tenamit, ut ki'elk kik' sa' li yatz'leb'aal; a'an kiwulak toj sa' xteramil xch'iich'ul xsa' reheb' li kawaay, wiib' xkaak'aal leew xnajtil ru xjek'i wi' rib'.