Apocalipsis 12 - Q'eqchi Bible

Li ixq ut li nimla k'anti' kaq rix

¹ Jun li nimla eetalil kik'utunk sa' choxa: jun li ixq tiqto rik'in li saq'e, li po wank rub'el roq, ut sa' xjolom wank jun li koroon kab'laju chi chahim wank chiru.

² Ut a'an wank sa' yu'am, japjo re xb'aan xrahilal li ilok kutan ut q'axal ra wank xb'aan li alank.

³ Toja' naq kik'utunk jun chik eetalil sa' choxa: jun li nimla k'anti' kaq rix, wank wuqub' xjolom ut lajeeb' xxukub', ut sa' xb'eeneb' li xjolom wankeb' wuqub' lemtz'il koroon.

⁴ Li xye yo chaq chi xkelonkil li rox jachal xk'ihal li chahim sa' choxa, ut kixkuteb' sa' ruuchich'och'. Toja' naq li nimla k'anti' kixaqliik chiru li ixq ok re chi alank, re naq, jo'q'e taayo'laaq li xk'uula'al, tixnuq' raj.

⁵ Ut li ixq kiwank li xk'uula'al, teelom, li tento tixb'eresiheb' chixjunil li tenamit rik'in b'aar ch'iich'; ut kolsaapuuq li xyum, jun k'oot toj rik'in li Yos, toj chi xk'atq li xnimajwal k'ojarib'aal.

⁶ A'ut li ixq ki'elelik toj sa' li chaqich'och' b'ar wi' wank xna'aj kawresinb'il xb'aan li Yos: aran taach'oolaniiq chiru oxk'aal xka o'q'ob' kutan (1,260).

⁷ Toja' naq kitiklaak jun li nimla yalok u sa' choxa: laj Miguel rochb'eeneb' li x'ánjel ke'xyal xmetz'ew rik'in li nimla k'anti'. Ke'yalok ajwi' eb' li nimla xul rochb'eeneb' li x'ánjel,

⁸ ab'an ink'a' ke'xkuy ut ink'a' chik kiwank na'ajej cho'q reheb' sa' choxa.

⁹ Ut kikute'k chaq taq'a li nimla xul, li najter k'anti', a' li maa'us ut aj tza nayeemank re: a'an nab'alaq'ink re chixjunil li ruuchich'och'; kikute'k chaq sa' ruuchich'och' rochb'een chaq eb' li x'ánjel.

¹⁰ Toja' naq kiwab'i jun xyaab' kuxej sa' choxa, kaw yo chi xyeeb'al: “Anaqwan ak xk'ulunk li kolb'a ib', li xnimal xloq'al ut li x'awab'ejihom li qaYos ut li xwankilal li xKriist, xb'aan naq xkute'k chaq taq'a laj jitol reheb' li qiitz'in, a' li najitok reheb' chiru li qaYos chi q'eq ut chi kutan.

¹¹ Eb' a'an xe'xq'ax ru sa' xk'ab'a' li xkik'el li Karneer jo' ajwi' rik'in li aatin xe'xye chi yaal, xb'aan naq ink'a' xe'xra ru li xyu'ameb' chiru li kamk.

¹² Jo'kan utan, chisaho'q sa' eech'ool, ex choxa ut chejunilex li wankex chisa'. Ab'an ra chaalel sa' eeb'een laa'ex li ruuchich'och' ut palaw, xb'aan naq laj tza xkub'eek eerik'in chi k'ajo' xjosq'il: naxnaw naq ajlanb'il kutan aj chik taawanq”.

¹³ Naq li nimla k'anti' kiril naq kikute'k chaq sa' ruuchich'och', kixkut rib' sa' xb'een li ixq, a' li kiwank xk'uula'al teelom.

¹⁴ Ab'an li ixq kik'ehe'k re xkab'ichaleb' li xxik' li nimla t'iw, re taaxik'anq toj sa' li xna'aj, sa' li chaqich'och', najt rik'in li nimla k'anti'. Ut aran tento taach'oolaniiq chiru wank xka chihab'.

¹⁵ Toja' naq li k'anti' kixxa'wa sa' re kama' jun nima', chirix li ixq, re naq taakelooq raj xb'aan li nima'.

¹⁶ Ab'an li ch'och' kichalk chi xtenq'ankil li ixq: kixte li re ut kixnuq' li nima' li kixxa'wa li nimla k'anti'.

¹⁷ Aran kichalk xjosq'il li nimla xul sa' xb'een li ixq ut koho chi xyalb'al xmetz'ew rik'ineb' li ralal xk'ajol li ixq, li jo'k'ihal chik ke'kanaak, a'aneb' li neke'paab'ank re li xchaq'rab' li Yos ut neke'xk'uula sa' xch'ool li xch'olob'ahom li Jesus.

¹⁸ Ut laa'in xaqxookin chaq sa' xb'een samahib' chire li palaw naq kik'ulmank a'an.