Amós 8 - Q'eqchi Bible

Li xka moy u: li xchakachil li chaq'al ki'q'een

¹ A'an a'in kixk'utb'esi chiwu li Qaawa' Yos. Kiwil jun li chakach nujenaq chi chaq'al ki'q'een:

² “K'aru nakawil, a Amós?”, chan we li Qaawa'. “Jun chakach li chaq'al ki'q'een”, chankin re. Ut li Qaawa' kixye we: “Ak xwulak xkutankil li raqok aatin sa' xb'een lintenamit Israel ut ink'a' chik tinkuy li xmaakeb'.

³ Sa' li kutan a'an, eb' li ixq li neke'b'ichank sa' rochoch li awab'ej te'xb'icha rahil b'ich -chan li Qaawa' Yos-. Naab'aleb' li poyanam te'kamq ut maak'a'aq aatinak naq toxe'kutiiq yalaq b'ar”.

Chalk re li raqb'a aatin

⁴ Ab'ihomaq a'in laa'ex li nekexrahob'tesink reheb' li neb'a' ut nekeraj xsachb'aleb' ru li kub'enaqeb' xwankil sa' li tenamit.

⁵ Laa'ex nekeye: “Jo'q'e taaraqe'q xninq'ehinkil li ak' po re tooruuq xk'ayinkil li triiw? Jo'q'e taanume'q li hilaal kutan re xk'ayinkil li ixim chi terto xtz'aq, ut tqak'os xb'isul li b'isleb'?

⁶ Aran tooruuq xloq'b'aleb' chi tuminal li maak'a'eb' xwankil, ut eb' li neb'a' tqaloq'eb' yal rik'in jun sumal chi perxaab'. A' ajwi' li xmulel li triiw tqak'ayi!”.

⁷ Li Qaawa', li naxnimob'resi wi' rib' laj Israel, kixye sa' jurament: “Maajoq'e taasachq sa' inch'ool chixjunil leeb'aanuhom”.

⁸ Ma ink'a' tab'i' taa'eek'anq li ruuchich'och' xb'aan a'an? Ma ink'a' tab'i' te'yaab'aq chixjunileb' li poyanam? Li ch'och' taataqe'q ut taasob'e'q jo' naq nab'ut'irk ut nakub'eek li nima' Nilo!

⁹ “Sa' li kutan a'an -chan li Qaawa' Yos- tink'e chi aak'ab'o'k ru li kutan ut taachalq li q'oqyink sa' wa'leb'.

¹⁰ Tink'e naq leeninq'e taakanaaq cho'q rahil ch'oolej ut chixjunil leeb'ich cho'q tz'uyink. Tink'e naq chejunilex teeb'at eerib' sa' q'es ruhil t'ikr ut teejo leejolom xb'aan xrahil eech'ool. Texyaab'aq jo' tawi' xkamk leeralal jun chirib'il, ut chixjunil junes rahilal toxraqe'q wi'.

¹¹ Relik chi yaal naq taawulaq xkutankil naq tintaqla chaq li tz'okaak sa' li ruuchich'och', ab'anan maawa' chirix leewa leeruk'a', textz'okaaq b'an chirix rab'inkil raatin li Qaawa'.

¹² Toja' naq eb' li poyanam te'xb'eeni rib' chi xsik'b'al li raatin li Qaawa' chalen chire li palaw jun toj chire li jun chik; te'elq sa' xjayal releb'l iq' toj sa' li na'elk wi' chaq li saq'e, ab'an ink'a' te'ruhanq chi xtawb'al.

¹³ Sa' li kutan a'an, eb' li xchaq'alil ru tuq'ixq ut eb' li saaj winq jwal kaweb' rib' te'lub'je'q xb'aan li chaqi'eel.

¹⁴ Eb' li neke'xye xjurament sa' xk'ab'a' li xyoseb' laj Samaria, eb' li neke'yehok: «Sa' xk'ab'a' laayos, a Dan», malaj: «Sa' xk'ab'a' laayos, a Berseba», te'oso'q ut maajun wa chik te'wakliiq chaq”.