Amós 7 - Q'eqchi Bible

III. EB' LI MOY U (7,1—9,10) Li xb'een moy u: eb' laj saak'

¹ A'an a'in kixk'utb'esi chiwu li Qaawa' Yos. Sa' xq'ehil relik chaq li raxpim, naq ak xraqe'k xq'olb'al li rawimq li awab'ej, kiwil li Qaawa' yo xyoob'tesinkileb' aj saak'.

² Ut naq eb' laj saak' ak xe'raqe'k chi xsachb'al li raxpim, kinye: “At Qaawa' Yos, b'aanu usilal, chakuy qamaak. Chanru naq tqakuy? Xb'aan naq moko k'iho ta laa'o”.

³ Toja' naq li Qaawa' kixjal xk'a'uxl ut kixye: “Ink'a' taak'ulmanq a'an”, chan.

Li xkab' moy u: li xam

⁴ A'an a'in kixk'utb'esi chiwu li Qaawa' Yos. Kiwil naq li Qaawa' yo xtaqlankil chaq li xam, li kixchaqihob'resi li nimla palaw, ut yo ajwi' chi k'atk li ch'och'.

⁵ Ut laa'in kinye: “At Qaawa', chakuy inmaak, kanab' xb'aanunkil a'an. Chanru naq tixkuy a'an laj Jakob, laatenamit li jwal kach'in?”.

⁶ Toja' naq li Qaawa' kixjal xk'a'uxl ut kixye: “Chi moko a'in taak'ulmanq”, chan.

Li rox moy u: li xploom laj tz'ak

⁷ Li Qaawa' kixk'utb'esi ajwi' li moy u a'in. Kiwil li Qaawa' xaqxo sa' xb'een li tz'ak tz'aqal tuqtu ru, ut wank sa' ruq' jun xploom laj tz'ak.

⁸ Ut kixpatz' we: “K'aru nakawil, a Amós?”, chan. Kinchaq'ok ut kinye: “A'an jun xb'isleb' aj tz'ak”, chankin. Toja' naq kixye we: “Rik'in li b'isleb' a'in tinnaw jo' tiikal li xyu'ameb' lintenamit Israel; ut ink'a' chik tinkuy xmaakeb'.

⁹ Te'juk'manq eb' li xtijob'aal laj Isahak, te'sachmanq li xmuheb'aaleb' laj Israel, ut tinwakliiq chi yalok rik'ineb' li ralal xk'ajol laj Jerobohán”.

Laj Amós ut laj Amasías

¹⁰ Laj Amasías, aj tij aran Betel, kixtaqla xyeeb'al re laj Jerobohán, awab'ej re Israel: “Laj Amós yo xpo'b'al xch'ooleb' li tenamit Israel chawix; ut li tenamit ink'a' chik neke'xkuy rab'inkil li raatin.

¹¹ Xb'aan naq jo'ka'in yo xyeeb'al laj Amós: «Laj Jerobohán taakamsiiq chi q'esnal ch'iich' ut chixjunileb' laj Israel te'isiiq sa' li xna'ajeb'»”.

¹² Toja' naq laj Amasías kixye re laj Amós: “Elen arin, at ilol moy u; ayu wi' chik Judá. K'aachi' aawib' ut ye raatin li Yos aran;

¹³ ab'an mat-aatinak chik jo' propeet arin Betel, xb'aan naq a'in xnimal ru rochoch li Yos, a'in li na'ajej naloq'onink wi' li awab'ej”.

¹⁴ Kichaq'ok laj Amós ut kixye re laj Amasías: “Moko laa'in ta propeet chi moko xkomonin eb' li propeet, laa'in b'an aj ilol ketomq ut aj sik'ol ru iig.

¹⁵ A' li Qaawa' x'isink chaq we chi xk'aak'alenkileb' li ketomq ut xye we: «Ayu ut aatinan sa' ink'ab'a' rik'ineb' laj Israel, lintenamit».

¹⁶ Ut anaqwan ab'i li raatin li Qaawa'. Laa'at nakaye: «Mat-aatinak jo' propeet chirixeb' laj Israel; mik'a' aaye chi kaw chirixeb' li ralal xk'ajol laj Isahak».

¹⁷ A'ut xyehom li Qaawa': «Laawixaqil taayumb'eetaq sa' li tenamit, eb' laawalal aak'ajol te'kamsiiq chi q'esnal ch'iich' ut laach'och' taajachimanq chi b'uulinb'il. Laa'at ajwi' toxatkamq sa' xyanqeb' li ink'a' neke'xpaab' li Qaawa', ut eb' laj Israel te'k'ame'q chi b'ak'b'o, najt rik'in li xna'ajeb'»”.