Amós 6 - Q'eqchi Bible

Li xsachikeb' laj Israel

¹ Ra chaalel sa' xb'eeneb' li sa wankeb' aran Sión ut li k'ojk'ookeb' xch'ool chi wank sa' li xtzuulul Samaria, eb' li ninqeb' xwankil sa' li nimla tenamit li neke'xkawu wi' xch'ooleb' laj Israel.

² Ayuqex ut ilomaq chaq Kalné; chirix chik a'an texxik Jamat, li nimla tenamit, ut texkub'eeq toj Gat sa' xteepal Filistea, ut ilomaq chaq. Ma q'axal chaab'ilex tab'i' laa'ex chiruheb' a'an? Ma q'axal nim tab'i' leetenamit chiru li xtenamiteb' a'an?

³ Laa'ex ink'a' nekeraj xk'oxlankil li xkutankil li rahilal, ab'anan raaxiik' yookex chi xb'oqb'al sa' eeb'een!

⁴ Nekexwark chiru ch'aat yiib'anb'il rik'in marfil, sa nekexhilank sa' leehilob'aal chi ninq'ehik; neketzeka li kok' karneer sik'b'ileb' ru ut eb' li saaj wakax li nekexok chaq sa' xyanqeb' li ketomq.

⁵ Nekexb'ichank naq nekerab'i xyaab' li aarp, ut nekeyiib'atq eewajb' jo' kixb'aanu laj David.

⁶ Nekex'uk'ak b'iin sa'eb' li xninqal sek' ut nekeyul eerib' sa' sununkil b'an jwal chaab'il; ab'an maak'a' nekeraj wi' li xrahilaleb' laj José.

⁷ Jo'kan naq anaqwan texchape'q ut texk'ame'q sa' najtil tenamit, k'amolb'ehaqex chiruheb' li te'xik chi preexil, ut aran taaraqe'q li ninq'ehik, ex aj q'em.

⁸ Li Qaawa' kixye li raatin; li Nimajwal Yos kixye chi jo'ka'in: “Xik' nawil li xq'etq'etileb' li ralal xk'ajol laj Jakob; nintz'eqtaanaheb' li xchaq'alil ru ochoch; ut tinq'axtesi chixjunil li tenamit sa' ruq'eb' li xik' neke'ilok reheb'”.

⁹ Ut wi toj te'kanaaq lajeeb' chi winq sa' junaq chi ochoch, te'kamq ajwi' eb' a'an.

¹⁰ Yal wiib' oxib' ajwi' li te'kole'q re risinkileb' li kamenaq sa' li kab'l; ut wi taapatz'manq re li toj wanq chaq sa' li kab'l: “Ma maajun chik wan chaq aawochb'een?”, a'an tixsume chaq: “Maajun chik”. Ut tixye li xpatz'ok: “Mat-aatinak, mare anchal taapatz' xk'ab'a' li Qaawa'”, cha'aq.

¹¹ Xb'aan naq li Qaawa' xyehok naq taajuk'manq eb' li xninqal ru ochoch ut po'lem te'kanab'aaq wi' eb' li kok' kab'l.

¹² Ma neke'taqe'k eb' li kawaay chiru li saqoonak? Ma naru tab'i' xpikb'al li palaw rik'in li b'ooyx? Ab'an laa'ex xepo' ru li tiikilal ut rahilal chik xekanab' wi' li k'ulub'ej.

¹³ Nasaho'k leech'ool chi maak'a' rajb'al, ut nekeye: “Ma ink'a' tab'i' xqeechani Karnáhin yal qajunes qib'?”, chankex.

¹⁴ “Jo'kan naq, ex aj Israel, tinwaklesi chaq jun li tenamit chi numtaak sa' eeb'een chalen chaq Jamat ut toj chire li nima' Arabá”, chan li Qaawa', li Nimajwal Yos.