Amós 3 - Q'eqchi Bible

II. XQ'USB'ALEB' LAJ ISRAEL (3,1—6,14) Li xk'anjel li propeet

¹ Ab'ihomaq li naxye li Qaawa' cherix laa'ex aj Israel, jo'k'ihalex li kexwisi chaq sa' li tenamit Ejiipt:

² “Ka'ajwi' laa'ex xinsik' eeru sa' xyanqeb' chixjunileb' li tenamit sa' ruuchich'och'. Jo'kan naq texink'e chi xtojb'al rix leek'iila maak”.

³ Ma na'uxk tab'i' b'eek sa' wiib'al wi ink'a' wankeb' sa' aatin?

⁴ Ma naxjap re li kaqkoj sa' li k'iche' wi toj maji' naxtaw li xtzak? Ma nayaab'ak tab'i' li ral kaqkoj sa' li xsok wi toj maak'a' naxtaw?

⁵ Ma nachape'k tab'i' junaq xik'anel xul wi maak'a' li ra'al? Ma nawakliik tab'i' li ra'al chiru ch'och' wi maak'a' naxchap?

⁶ Ut naq na'eek'ank li pur sa' li tenamit, ma ink'a' tab'i' neke'xiwak eb' li poyanam? Ma taachalq junaq rahilal sa' xb'een li tenamit wi ink'a' taqlanb'il chaq xb'aan li Yos?

⁷ Jo'kan ajwi', li Qaawa' maak'a' tixb'aanu wi ink'a' xye xb'enwa reheb' laj k'anjel chiru, a'eb' li propeet.

⁸ Ani ink'a' naxiwak naq naxjap chaq re li kaqkoj? Ani ink'a' taa'aatinaq jo' propeet wi li Qaawa' nayehok re?

Xsachik Samaria

⁹ Yehomaq a'in sa'eb' li xchaq'alil ru rochocheb' laj Asdod; puktesihomaq resil sa'atqeb' li xch'ina'usal ochoch re Ejiipt: “Ch'utub'omaq eerib' sa'eb' li xtzuulul Samaria re teeril li k'iila rahilal nawank sa' li tenamit a'an ut k'ajo' li maa'usilal neke'xb'aanu aran”.

¹⁰ Li Qaawa' kixye chi jo'ka'in: “Eb' a'an ink'a' neke'xb'aanu li tiikilal, ut neke'xnujob'resi li rochocheb' rik'in li k'aru xe'relq'a naq xe'xrahob'tesi eb' li ras riitz'in”.

¹¹ Jo'kan naq li Qaawa' kixye chi jo'ka'in: “Li xik' na'ilok re Samaria tixsut rix li tenamit, tixjuk' li xkawub'resinb'il ochoch ut te'yamtesiiq xsa' eb' li xchaq'alil ru ochoch”.

¹² Jo'ka'in kixye li Qaawa': “Jo' naq laj ilol ketomq naxmaq' wiib'aq ra' malaj junaq xxik li karneer sa' re li kaqkoj, jo'kan ajwi' naq te'kole'q eb' laj Israel li wankeb' Samaria; ab'anan ka'ajwi' li roq xch'aateb' te'xk'am malaj junaq chaab'il isb'”.

¹³ Li Qaawa', li Nimajwal Yos, kixye chi jo'ka'in: “Ab'ihomaq a'in ut jitomaqeb' li ralal xk'ajol laj Jakob.

¹⁴ Sa' li kutan naq teb'ink'e laj Israel chi xtojb'al rix li xmaakeb', tinsacheb' li artal re Betel; tinjor eb' li xxukub' li artal ut teb'inkut chi ch'och'el.

¹⁵ Tinjuk'i eb' li ochoch neke'xnumsi wi' li hab'alq'e ut li saq'ehil; tinsach ruheb' li ochoch yiib'anb'il rik'in marfil, ut naab'al li muheb'aal te'oso'q”, chan li Qaawa'.