Amós 2 - Q'eqchi Bible

Mohab

¹ Jo'ka'in kixye li Qaawa': “Ak k'iila sut xinkuy xmaakeb' laj Mohab ut anaqwan maak'a' chik xkuyb'al, xb'aan naq xe'xk'at li xb'aqel li awab'ej re Edom toj reetal naq cha xchahirk.

² Jo'kan naq tink'e xxamlel chixjunil li xteepal Mohab ut te'k'ate'q eb' li xchaq'alil ru ochoch re Keryot. Sa' li nimla mululij ib' te'kamq eb' laj Mohab, naq yooq chi yaab'asiik li pur sa' xhonalil li yalok.

³ Ut twisi xyu'am laj k'amol b'e: tinkamsi rochb'eeneb' li xninqaleb' ru winq”, chan li Qaawa'.

Laj Judá

⁴ Jo'ka'in kixye li Qaawa': “Ak k'iila sut xinkuy xmaakeb' laj Judá ut anaqwan maak'a' chik xkuyb'al, xb'aan naq xe'xtz'eqtaana li xchaq'rab' li Qaawa' ut ink'a' xe'xpaab' li raatin. Xe'xk'e rib' chi b'alaq'iik xb'aaneb' li yal k'oxlanb'il yos, jo' ke'xb'aanu eb' li xmama' rixa'aneb'.

⁵ Jo'kan naq tink'e xxamlel chixjunil li xteepal Judá ut te'k'ate'q eb' li xchaq'alil ru ochoch re Jerusalén”.

Laj Israel

⁶ Jo'ka'in kixye li Qaawa': “Ak k'iila sut xinkuy xmaakeb' laj Israel ut anaqwan maak'a' chik xkuyb'al, xb'aan naq neke'xk'ayi chi tuminal li tiik xch'ool ut yal rik'in jun sumal chi perxaab' neke'xk'ayi li neb'a'.

⁷ Neke'xyeq'i chiru ch'och' eb' li neb'a' ut neke'xsachb'esi xna'leb'eb' li kub'enaqeb' xwankil. Li alalb'ej ut li yuwa'b'ej neke'wank rik'in jun chi ixq, ut chi jo'kan neke'xmux linsantil k'ab'a'.

⁸ Sa'eb' ajwi' li tijob'aal neke'xsotob' rib'eb' chiruheb' li t'ikr li xe'xpatz' cho'q ruuchil li to' tumin, ut neke'uk'ak b'iin chiru xtuminal li toj sa' li wochoch.

^9-10 Ex aj Israel, laa'in kexwisi chaq sa' li tenamit Ejiipt, ut ka'k'aal chihab' kexinb'eresi sa' li chaqich'och'. Cheru laa'ex kinsach ruheb' laj Amor, li jwal najteb' xteram jo'eb' li yaw ut q'axal kaweb' rib' jo'eb' li ji; keb'insach ruheb' chi junajwa ut kinq'axtesi eere li xch'och'eb'.

¹¹ Ut sa' xyanqeb' leeralal eek'ajol kinxaqab'eb' propeet; ut wan ajwi' naq kinsik'eb' ru li saaj winq re te'xmayeja rib' chiwu jo' aj nasireo. Ma ink'a' jo'kan, ex aj Israel?”, chan li Qaawa'.

¹² “A'ut laa'ex xekaltesiheb' laj nasireo ut xeq'useb' li propeet naq ink'a' te'aatinaq sa' ink'ab'a'.

¹³ Jo'kan naq texinteni chi us jo' naxb'aanu li b'eleb'aal ch'iich' jwal aal li riiq.

¹⁴ Toja' naq li kaw na'aanilak ink'a' tixkuy elelik; li kaw xmetz'ew maak'a' chik taa'ok wi' chi moko li kaw rib' tixkol li xyu'am.

¹⁵ Ink'a' chik tixkuy yalok li nakutuk chi simaj; li seeb' chi aanilak ink'a' truuq tixkol li xyu'am chi moko tixkol rib' li naxik chirix kawaay.

¹⁶ Sa' li kutan a'an, li q'axal kaw rib' sa' xyanqeb' laj puub' taa'eleliq chi t'ust'u!”, chan li Qaawa'.