Amós 1 - Q'eqchi Bible

Li xjosq'il li Yos

¹ A'an a'in li raatin laj Amós, jun reheb' laj ilol ketomq sa' xteepal Tékoha. A'in li kiril sa' moy u chirix li tixk'ul li tenamit Israel, naq wan chaq chi awab'ejink laj Osías aran Judá, ut naq laj Jerobohán, ralal laj Johás, yo chi awab'ejink aran Israel, wiib' chihab' rub'elaj li nimla hiik kiwank.

² Kixye chi jo'ka'in: “Toj Sión naxjap chaq re li Qaawa'; toj Jerusalén na'ab'iik li xyaab' xkux. Eb' li xna'ajeb' li ketomq xe'chaqikje'k, ut xjoxk'o'k ru li tzuul Karmeel”.

I. RA CHAALEL SA' XB'EENEB' LI TENAMIT (1,3—2,16) Damaask

³ Jo'ka'in kixye li Qaawa': “Ak k'iila sut xinkuy xmaakeb' laj Damaask ut anaqwan maak'a' chik xkuyb'al, xb'aan naq k'ajo' naq xe'xrahob'tesi eb' laj Galahad.

⁴ Jo'kan naq tink'e xxamlel li rochoch laj Jasahel, ut tinjuk'eb' ajwi' li xmuheb'aal laj Ben-Adad.

⁵ Tinjuk' li rokeb'aal Damaask; tinsach ruheb' laj Bikat-Abén jo' ajwi' li na'awab'ejink re Bet-Edén; ut eb' laj Aram te'k'ame'q chi preexil toj Kir”, chan li Qaawa'.

Gasa ut Filistea

⁶ Jo'ka'in kixye li Qaawa': “Ak k'iila sut xinkuy xmaakeb' laj Gasa ut anaqwan maak'a' chik xkuyb'al, xb'aan naq xe'xchap junq teep chi tenamit re xk'ayinkil reheb' laj Edom.

⁷ Jo'kan naq tink'e xxamlel li xsuttz'akil li tenamit Gasa ut te'k'ate'q eb' li xchaq'alil ru ochoch.

⁸ Tinsach ruheb' laj Asdod jo' ajwi' li na'awab'ejink re Askalón; tinrahob'tesiheb' laj Ekrón ut tinsach ruheb' laj Filistea chi junajwa”, chan li Qaawa'.

Tiro ut Fenicia

⁹ Jo'ka'in kixye li Qaawa': “Ak k'iila sut xinkuy xmaakeb' laj Tiro ut anaqwan maak'a' chik xkuyb'al, xb'aan naq xe'xchap junq teep chi tenamit re xk'ayinkil reheb' laj Edom, ut ink'a' xe'xk'e sa' xch'ool li sumwank rik'ineb'.

¹⁰ Jo'kan naq tink'e xxamlel li xsuttz'akil li tenamit Tiro ut te'k'ate'q eb' li xchaq'alil ru ochoch”.

Edom

¹¹ Jo'ka'in kixye li Qaawa': “Ak k'iila sut xinkuy xmaakeb' laj Edom ut anaqwan maak'a' chik xkuyb'al, xb'aan naq rik'in ch'iich' xe'raanilasiheb' laj Israel li riitz'ineb' ut xe'xsach xwankil li uxtaanank u. Xe'xtz'eqtaanaheb' chi junwaakaj ut junelik xe'xk'uula sa' xch'ooleb' li josq'ink.

¹² Jo'kan naq tink'e xxamlel li tenamit Temán ut te'k'ate'q eb' li xchaq'alil ru ochoch re Bosrá”.

Amón

¹³ Jo'ka'in kixye li Qaawa': “Ak k'iila sut xinkuy xmaakeb' laj Amón ut anaqwan maak'a' chik xkuyb'al, xb'aan naq jachb'il xe'xb'aanu reheb' li yaj aj ixq aj Galahad naq xe'xkamsiheb', yal re xmaq'b'al li xch'och'eb'.

¹⁴ Jo'kan naq tink'e xxamlel li xsuttz'akil li tenamit Rabá ut te'k'ate'q eb' li xchaq'alil ru ochoch. Tinb'aanu chi jo'kan sa' xkutankil li yalok, sa' li nimla mululij ib', jo' xyaab' li kawil kaqsut-iq'.

¹⁵ Ut li x'awab'ej taak'ame'q sa' najtil tenamit, rochb'eeneb' li xninqaleb' ru winq”, chan li Qaawa'.