Abdías 1 - Q'eqchi Bible

Ra chalk re sa' xb'een laj Edom

¹ A'an a'in li kiril sa' moy u laj Abdías. A'in li raatin li Qaawa' kixye chirix laj Edom: Xqab'i jun esilal xchalk chaq rik'in li Qaawa'; jun aj yehol esil xtaqlaak sa' chixjunileb' li tenamit re xyeeb'al reheb': “Wakliiqo ut yo'qeb' chi yalok rik'ineb' laj Edom”. Li Qaawa' kixye re laj Edom:

² “Ch'ina tenamit xatinkanab' wi' sa' xyanqeb' li jalanil tenamit, ut q'axal tz'eqtaananb'ilat.

³ Li xq'etq'etil laach'ool xatxb'alaq'i. Wankat sa' xyanqeb' li saqoonak ut chiru tzuul nakayiib' laamuheb'aal; jo'kan naq xaye sa' laach'ool: «Ani tkutuq we chi ch'och'?», chankat.

⁴ Ab'anan, us ta jwal najt tattaqe'q jo' li t'iw ut taayiib' ta laasuk sa' xyanqeb' li chahim, toj aran tatinkub'si chaq”, chan li Qaawa'. Li Qaawa' kixye chi jo'ka'in:

⁵ “Wi ta te'wulaq eb' laj elq' sa' laawochoch chiru q'oqyink, ink'a' raj te'xk'am chixjunil. Ut wi ta te'chalq eb' laj q'olonel, ma ink'a' raj te'xkanab' kach'inaq cho'q aawe?

⁶ Ab'anan k'ajo' naq xe'xpoqle xsa' laawochoch, a Esaú! Xe'relq'a ut xe'xk'am chixjunil laab'ihomal!

⁷ Chixjunileb' li neke'okenk chawix xate'xb'alaq'i ut xate'risi sa' laana'aj. Eb' li nakawotz wi' laatzekemq, xik' aj chik nakate'ril ut xe'xk'e aara'lenkil: «Laj Edom maak'a' chik xna'leb'!», chankeb'”.

⁸ Li Qaawa' kixye ajwi': “Sa' li kutan naq tink'e sa' tojb'amaak laj Edom, tinsach ruheb' li wankeb' xna'leb' aran: maajun li wank xseeb'al xk'a'uxl tkanaaq, sa' xteepal Esaú.

⁹ K'ajo' xxiweb' li kaweb' rib' chi yalok sa' li tenamit Temán, ut maajun junaq tkanaaq chi yo'yo sa'atqeb' li k'iche' sa' xteepal Esaú.

Eb' li xmaak laj Edom

¹⁰ “Sa' xk'ab'a' xrahob'tesinkil ut xkamsinkil laawiitz'in laj Jakob, tatkanaaq sa' xutaan ut tat-oso'q chi junwaakaj.

¹¹ Sa' li kutan naq eb' li xik' neke'ilok re li tenamit xe'xchap chixjunil ut eb' li jalaneb' xtenamit xe'xjuk' li rokeb'aal Jerusalén ut xe'xb'uuli rix, laa'at ajwi' jun sa' xyanqeb': maak'a' xab'aanu re xtenq'ankileb' laakomon.

¹² Ink'a' raj xsaho'k laach'ool chirix li xrahilal laawiitz'in. Ink'a' ajwi' xsaho'k raj laawaanm chirix li roso'jik laj Judá, chi moko xase'e raj sa' xkutankil li raaxiik'.

¹³ Ink'a' raj xat-ok sa' lintenamit sa' xkutankil li xrahilal, chi moko xsaho'k raj laach'ool xb'aan li xrahilal sa' xq'ehil li raaxiik'; ink'a' raj xawelq'a li xb'ihomal naq xk'ul li rahilal.

¹⁴ Ink'a' raj xaxaqab' aawib' sa'atqeb' li xaalib'e re xkamsinkileb' li xe'elelik, chi moko xaq'axtesiheb' raj li xe'kole'k sa' xkutankil li raaxiik'.

¹⁵ Xb'aan naq yo chaq chi nach'ok li xkutankil li Qaawa' cho'q reheb' chixjunil li tenamit. Jo' xab'aanu laa'at reheb' li junch'ol chik, jo'kan ajwi' naq taa'uxmanq aawe: taachalq sa' aab'een laak'ulub' xk'ulb'al.

Li xkutankil li Qaawa'

¹⁶ “Jo' naq xereek'a laa'ex xk'ahil li rahob'tesiik sa' linloq'laj tzuul, jo'kan ajwi' eb' li jalanil tenamit te'ruk' xsa' li xsek'ul linjosq'il chi kok'aq xsa' toj reetal te'oso'q chi junajwa.

¹⁷ Ab'anan li tzuul Sión a'anaq li santil na'ajej b'arwi' te'xik chi muqlek eb' li xe'elelik. Eb' li ralal xk'ajol laj Jakob te'reechani wi' chik li xch'och'eb'.

¹⁸ Li xjunkab'al laj Jakob a'anaq li ru xam, li xjunkab'al laj José a'anaq li raq' xam, ut li xjunkab'al laj Esaú taak'atmanq chi junajwa jo' li k'im: maajun taakole'q sa' xyanqeb' li ralal xk'ajol laj Esaú”, chan li Qaawa'.

Li ak' Israel

¹⁹ Eb' laj Israel li wankeb' Nejeb te'reechaniheb' li tzuul sa' xteepal Edom; ut eb' li wankeb' chiru taq'a, te'reechani li xtenamiteb' laj Filistea. Te'reechani ajwi' li xteepaleb' laj Efraín ut aj Samaria; ut eb' laj Benjamín, a'aneb' li te'eechaninq re li na'ajej Galahad.

²⁰ Jo'k'ihaleb' laj Israel li ke'isiik sa' li xtenamiteb' te'kanaaq Kanahán toj Sarepta; ut eb' laj Jerusalén li tz'aptz'ookeb' Sefarad, te'reechaniheb' li tenamit sa' xteepal Nejeb.

²¹ Te'numtaaq sa' xb'eeneb' ut te'taqsinq aran Sión re raqok aatin sa' xb'eeneb' li xtzuululeb' laj Esaú, ut a' chik li Qaawa' taa'awab'ejinq.