2 Ts 3 - Q'eqchi Bible

¹ Sa' roso'jik, ex qas qiitz'in, chextijoq chiqix re naq li Raatin li Qaawa' chipuktesiiq chi junpaat ut chik'ehe'q xloq'al jo' xk'ulmank sa' eeyanq.

² Chetz'aama ajwi' naq chookole'q chiruheb' li winq yib'eb' ru xna'leb' ut maa'useb', xb'aan naq moko chixjunil ta aj e li paab'ank.

³ Tiik xch'ool li Qaawa'; ut a'an tixk'e xkawub' eech'ool ut texxkol chiru li maa'us.

⁴ K'ojk'o li qaanm cherix sa' xk'ab'a' li Qaawa' naq jo'nimal xexqachaq'rab'i wi' yookex chi xpaab'ankil, ut teepaab' ajwi' chi junelik.

⁵ A' taxaq li Qaawa' chib'eresinq leech'ool sa' li xrahom li Yos ut sa' li royb'eninkil li Kriist rik'in xnimal eekuyum.

Tento took'anjelaq

⁶ Ex qas qiitz'in, sa' xk'ab'a' li Qaawa' Jesukriist nekexqachaq'rab'i naq cherisi eerib' sa' xyanqeb' chixjunil li qas qiitz'in li wankeb' chi sachsookeb' xch'ool ut ink'a' neke'xb'aanu jo' chanru leetijb'al eek'ulum qik'in.

⁷ Laa'ex nekenaw chi us chanru teek'am eere qik'in, xb'aan naq moko xoowank ta chaq sa' eeyanq chi sachso qana'leb',

⁸ chi moko xoowa'ak chi maatan rik'in anihaq, xqatawasi b'an qib' chi k'anjelak chi q'eq ut chi kutan, a' xqaj naq maa'ani xqach'i'ch'i'i sa' eeyanq.

⁹ Moko xb'aan ta naq ink'a' ta raj qak'ulub', yal xqaj b'an xk'utb'al cheru chanru li k'anjelak, re naq teek'am eere qik'in.

¹⁰ Ut naq toj wanko chaq eerik'in, xexqachaq'rab'i chi jo'kan: wi wank junaq ink'a' naraj k'anjelak, ink'a' ajwi' taatzekanq.

¹¹ Xb'aan naq xqab'i resil naq wank wankeb' sa' eeyanq li sachsookeb' xna'leb': maak'a' neke'xb'aanu, ab'anan neke'xch'ik rib' yalaq b'ar.

¹² Eb' a'an naqachaq'rab'i ut naqajultika reheb' sa' xk'ab'a' li Qaawa' Jesukriist naq che'k'anjelaq sa' xyaalalil re naq te'xtaw xwaheb'.

¹³ Ut laa'ex, ex qas qiitz'in, mextitz' chi xb'aanunkil li us.

¹⁴ Wi wank junaq ink'a' naxpaab' li xqaye sa' li hu a'in, k'ehomaq reetal ut meejunaji eerib' rik'in re naq chixutaanaq.

¹⁵ Ab'anan moko xik' ta teeril, cheq'usaq b'an jo' eeras eeriitz'in.

Xraqik li hu

¹⁶ A' taxaq li xQaawa' li tuqtuukil usilal chik'ehoq eere li tuqtuukilal chi junelik ut sa' chixjunil. Chiwanq taxaq li Qaawa' eerik'in chejunilex.

¹⁷ Laa'in laj Pablo nintz'iib'a li xsahil eech'ool a'in rik'in wuq'. A'in weetalil sa' chixjunil linhu intz'iib'ahom. Jo'ka'in naq nintz'iib'ak.

¹⁸ Li rusilal li Qaawa' Jesukriist chiwanq taxaq eerik'in chejunilex.