2 Ts 1 - Q'eqchi Bible

Xk'eeb'al sahil ch'oolej

¹ Laa'in laj Pablo, wochb'een laj Silvano ut laj Timoteo, nintz'iib'ak rik'in li x'Iklees eb' laj Tesalónika li wank rik'in li Yos li qaYuwa' ut rik'in li Qaawa' Jesukriist.

² Eerik'inaq taxaq li usilal ut li tuqtuukilal nachalk rik'in li Yos Yuwa'b'ej ut li Qaawa' Jesukriist.

Choob'anyoxinq re li Yos

³ Ex qas qiitz'in, junelik teneb'anb'il sa' qab'een naq toob'anyoxinq re li Yos cherix laa'ex, jo' xk'ulub', xb'aan naq q'axal yo chi k'iik leepaab'aal ut numtajenaq chik nekera eerib' rik'ineb' chixjunil ut chejunjunqal.

⁴ A'an nanimob'resink qaloq'al naq nokoo'aatinak cherix sa'eb' li x'Iklees li Yos, xb'aan naq nim leekuyum ut kaw leech'ool sa' leepaab'aal sa' chixjunil li raaxiik' ut li rahilal yookex chi xk'ulb'al.

Li raqb'a aatin

⁵ A'in reetalil li raqb'a aatin naxb'aanu li Yos sa' tiikilal; reetalil ajwi' naq eek'ulub' ok sa' li xnimajwal awab'ejihom li Yos: sa' xk'ab'a' ajwi' a'an yookex chi xk'ulb'al li rahilal.

⁶ Relik chi yaal naq tiik xch'ool li Yos, ut tixq'ajkamu rik'in rahilal eb' li neke'rahob'tesink eere;

⁷ ab'an laa'ex li rahob'tesinb'ilex texk'ehe'q chi hilank qochb'een naq li Qaawa' Jesus tixk'ut rib'. A'an taak'ulunq sa' choxa rochb'eenaqeb' li x'ánjel li wankeb' xwankil,

⁸ rik'in raq'xam, ut taa'eeqajunq sa' xb'eeneb' li ink'a' neke'xnaw ru li Yos, eb' li ink'a' neke'xpaab' li xChaab'il Esil li Qaawa' Jesus.

⁹ Li xtojb'al rix li xmaakeb' a'an li sachk chi junajwa, ut najt te'wanq rik'in li Qaawa' jo'wi' rik'in li xnimal xloq'al li xwankilal.

¹⁰ Sa' li Kutan a'an tol'elq li Qaawa' re naq taanimaaq xloq'al sa' xyanqeb' li xsant ut taaloq'oniiq xb'aaneb' chixjunileb' laj paab'anel. Ut laa'ex xepaab' li xqach'olob' xyaalal cheru.

¹¹ Jo'kan naq juneliko chi tijok cherix: li qaYos chik'ehoq taxaq eere wank jo' xk'ulub' leemaatan b'oqb'ilex wi', ut texxtenq'a taxaq rik'in li xwankilal re naq chitz'aqloq ru chixjunil li us nekerahi xb'aanunkil jo'wi' li xk'anjel leepaab'aal.

¹² Chi jo'kan taanimaaq xloq'al li Qaawa' Jesus eerik'in, ut laa'ex rik'in, jo' chanru li rusilal li qaYos ut li Qaawa' Jesukriist.