2 Timoteo 3 - Q'eqchi Bible

Sa' roso'jikeb' li kutan

¹ Chanawaq naq sa' roso'jikeb' li kutan wank honal q'axal ch'a'ajkaq xnumsinkil.

² Eb' li winq junes reheb' te'raj, te'xrahi ru li tumin, te'xnimob'resihatq xwankileb', te'xq'etq'eti rib'eb', aj majewanelaqeb', aj q'etolaqeb' raatin xna' xyuwa', maak'a' chik te'xnaw xyoxinkil ut te'xtz'eqtaana li paab'ank.

³ Ink'a' chik te'xrahatq rib', maak'a'aq chik usilal rik'ineb', aj yoob'anelaqeb' aatin, ink'a' te'xkuy rib', q'axal josq'aqeb', xik' te'ril li chaab'ilal,

⁴ aj b'alaq'aqeb' ut kawaqeb' rib' chi xb'aanunkil li ink'a' us. Taanumtaaq li xq'etq'etileb', a' chik li xsahilal li ruuchich'och' te'rataw chiru li xraab'al li Yos,

⁵ aj paab'aneleb' naq te'xb'aanu rib', a'ut te'xtz'eqtaana li us. Maajunaji aawib' rik'ineb' a'an.

⁶ Sa' xyanqeb' a'an wankeb' li neke'xch'ik rib' chire kab'lal ut neke'xchap eb' li mem aj ixq q'axaleb' aj maak, nachiq'chotk li xch'ooleb' xb'aan xrahinkil ru chixjunil li k'a'aq chi maa'usilal.

⁷ Junelik yookeb' chi tzolok, ab'an ink'a' neke'ruhank xtawb'al ru li yaal.

⁸ Jo' naq laj Jannés ut laj Jambrés ke'raj raj numtaak sa' xb'een laj Moisés, jo'kaneb' ajwi' a'an ink'a' neke'xk'ulub'an li yaal, q'aajenaqeb' li xk'a'uxl, ut li xpaab'aaleb' maak'a' na'ok wi'.

⁹ Ab'an ink'a' ajwi' us taa'elq chiruheb' xb'aan naq ch'olch'ooq chiruheb' chixjunil li tenamit li xmaak'a'ileb' xna'leb', kama' ke'xk'ul li wiib'eb' a'an.

¹⁰ Laa'at junelik kak'e reetal chanru nink'utuk, jo'wi' chanru linyu'am, link'a'uxl, linpaab'aal, linkuyum, linrahom ut li xkawilal linch'ool,

¹¹ sa' li raaxiik' ut li rahilal kama' li kink'ul aran Antiokía, Ikonio ut Listra. K'ajo' li raaxiik' xlajinkuy! Ut rik'in chixjunil a'an xinxkol chaq li Qaawa'.

¹² Jo'kan ajwi' chixjunileb' li te'raj paab'ank chi chaab'il sa' xk'ab'a' li Kristo Jesus, te'rahob'tesiiq.

¹³ A'ut eb' laj maak ut eb' laj b'alaq' taanumtaaq li xmaa'usilaleb', yooqeb' chi b'alaq'ink ut yooqeb' ajwi' chi b'alaq'iik.

¹⁴ Laa'at kawaq aach'ool rik'in li xatzol ut xapaab'. Wanq sa' aach'ool aniheb' aj ik'in xatzol aawib'.

¹⁵ Jo'kan ajwi' jultikaq aawe naq chalen chaq sa' laakach'inal nakanaw xsa' li Santil Hu. A'an wank xwankil re xk'eeb'al aana'leb' li nak'amok sa' li kolb'a ib' sa' xk'ab'a' xpaab'ankil li Kristo Jesus.

¹⁶ Chixjunil li Santil Hu a'an musiq'anb'il xb'aan li Yos ut nak'anjelak re k'utuk, re q'usuk, re k'ehok na'leb' jo'wi' re xtzolb'aleb' li kristiyan sa' li tiikilal.

¹⁷ Chi jo'kan laj k'anjel chiru li Yos tz'aqalaq re ru ut kawresinb'ilaq re xb'aanunkil chixjunil li chaab'il k'anjel.