2 Samuel 6 - Q'eqchi Bible

Kikamk laj Usá

¹ Laj David kixch'utub'eb' wi' chik laj puub' sik'b'ileb' ru sa' xyanqeb' laj Israel, a'aneb' lajeeb' xka'k'aal mil chi winq.

² Ut rochb'eeneb' kixchap xb'e, koho Bahalá sa' xteepal Judá re xk'amb'al chaq toj aran li xLoq'laj Kaax li Yos. Chiru a'an nayaab'amank xk'ab'a' li Nimajwal Yos li nahilank sa' xb'eeneb' li kerubín.

³ Ke'risi chaq li xLoq'laj Kaax li Yos sa' rochoch laj Abinadab li wank sa' xb'een b'ool, ut ke'xk'e sa' xb'een jun li kareet toj ak'. Laj Usá ut laj Ajihó, ralaleb' laj Abinadab, yookeb' chi xb'eresinkil li kareet wan wi' li Loq'laj Kaax:

⁴ laj Usá yo chi b'eek chi xk'atq ut laj Ajihó aj k'amol b'e chiru naq yookeb' chi xik.

⁵ Laj David ut chixjunileb' laj Israel yookeb' chi xajok chiru li Qaawa' chi anchaleb' xch'ool. Yookeb' ajwi' chi b'ichank rik'in aarp, tzojtzoj, xolb', tanb'oor ut sursuukil ch'iich'.

⁶ Naq ke'wulak sa' li na'ajej xCh'oxleb'aal laj Nakón xk'ab'a', laj Usá kixye' li ruq' sa' xb'een li xLoq'laj Kaax li Yos ut kixchap, xb'aan naq ka'aj chik maa nat'ane'k xb'aaneb' li b'ooyx.

⁷ Ab'an kichalk xjosq'il li Qaawa' sa' xb'een laj Usá, ut aran ajwi' kitiq'e'k xb'aan li Yos ut kikamk chi xk'atq li Loq'laj Kaax.

⁸ K'ajo' naq kiraho'k xch'ool laj David xb'aan naq li Qaawa' kixk'e chi kamk laj Usá, ut Perés-Usá ke'xk'e cho'q xk'ab'a' li na'ajej a'an chalen toj anaqwan.

⁹ Sa' li kutan a'an ki'ok xxiw laj David chiru li Qaawa' ut kixye: “Maamin truuq tink'am sa' li wochoch li xLoq'laj Kaax li Qaawa'”.

¹⁰ Ut ink'a' kiraj xk'amb'al li Loq'laj Kaax sa' rochoch, sa' xTenamit laj David, kixtaqla b'an xk'amb'al sa' rochoch laj Obededón aj Gat.

¹¹ Oxib' po kiwank li xLoq'laj Kaax li Qaawa' sa' rochoch laj Obededón aj Gat, ut li Qaawa' kirosob'tesi li winq a'an rochb'een chixjunil li xjunkab'al.

Ke'xk'am li Loq'laj Kaax aran Jerusalén

¹² Kiyehe'k resil re li awab'ej David chanru naq li Qaawa' kirosob'tesi li xjunkab'al laj Obededón ut chixjunil li k'aru re sa' xk'ab'a' li Loq'laj Kaax. Tikto laj David koho sa' rochoch laj Obededón re xk'amb'al li xLoq'laj Kaax li Yos aran Jerusalén, chi k'ajo' xsahil li xch'ool.

¹³ Rajlal waqib' yokb' li neke'xk'e eb' laj paqonel, laj David kixmayeja jun b'ooyx rochb'een jun karneer ch'oolaninb'il chi us.

¹⁴ Chirix chik a'an ki'ok chi xajok chi anchal xch'ool sa' xk'ab'a' li Qaawa', chi tiqto yal rik'in jun efod liin.

¹⁵ Laj David ut chixjunileb' laj Israel ke'xk'am li xLoq'laj Kaax li Qaawa' rik'in kawil b'ichank ut xyaab' xukub'.

¹⁶ Naq li xLoq'laj Kaax li Qaawa' ki'ok sa' xTenamit laj David, lix Mikal, xrab'in laj Saúl, yo chi ilok sa' b'entaan, ut naq kiril li awab'ej yo chi pisk'ok ut xajok chiru li Qaawa', kixtz'eqtaana sa' li xch'ool.

¹⁷ Li xLoq'laj Kaax li Qaawa' kik'ame'k ut kixtaw xna'aj sa' xyi li muheb'aal kixyiib' laj David cho'q re a'an. Tikto laj David kixyeechi'i re li Qaawa' k'atb'il xul ut mayej re li k'amok ib' sa' usilal rik'in li Yos.

¹⁸ Chirix chik a'an kirosob'tesi li tenamit sa' xk'ab'a' li Nimajwal Yos,

¹⁹ ut chixjunileb' laj Israel, jo' winq ut ixq, ke'xk'ul chi xjunjunqaleb' xkaxlan waheb' jo'wi' jun k'uluj yiib'anb'il rik'in ru che' ut jun chik yiib'anb'il rik'in chaqi uub'. Moqon chixjunileb' koheb' sa' rochocheb'.

²⁰ Laj David ajwi' koho sa' rochoch chi rosob'tesinkil li xjunkab'al, ab'an lix Mikal, xrab'in laj Saúl, ki'elk chaq chi xk'ulb'al ut kixye re: “K'ajo' naq xnujak chi loq'al li awab'ej re Israel sa' li kutan a'in, rik'in xt'usub'ankil rib' chiruheb' li xmoos ixq eb' laj k'anjel chiru, jo' naxb'aanu junaq li maak'a' xxutaan”.

²¹ Toja' naq laj David kixye re: “Chiru li Qaawa' xinxajok laa'in: chiru li Qaawa' li kisik'ok wu cho'q reeqaj laayuwa' ut chixjunil li xjunkab'al ut kinxxaqab' cho'q aj k'amol xb'e Israel li xtenamit.

²² Ut q'axal wi' chik tinkub'si wib' anaqwan. Sa' aach'ool laa'at naq tinkub'si inwankil, ab'anan tintaw inloq'al chiruheb' li moos ixq nakaye”.

²³ Ut lix Mikal, xrab'in laj Saúl, ink'a' kiwank xk'uula'al chalen naq kikamk.