2 Samuel 4 - Q'eqchi Bible

Kikamsiik laj Isbahal

¹ Naq laj Isbahal, ralal laj Saúl, kirab'i resil li xkamik laj Abner aran Hebrón, k'ajo' naq kisachk xch'ool, ut chixjunileb' laj Israel ke'ok xxiw.

² Laj Isbahal, ralal laj Saúl, wankeb' wiib' chi winq neke'k'anjelak chiru, xjolomileb' aj elq'. Li jun aj Bahaná xk'ab'a' ut li jun chik aj Rekab, ralaleb' laj Rimón aj Beherot. A'aneb' xkomoneb' li ralal xk'ajoleb' laj Benjamín, xb'aan naq Beherot wank sa' xteepal Benjamín.

³ Eb' laj Beherot junxil ke'elelik ut koheb' Kitáhin, b'arwi' wankeb' chalen toj anaqwan.

⁴ Laj Jonatán, ralal laj Saúl, kiwank jun ralal sik roq, aj Mefibahal xk'ab'a'. Oob' chihab' wank re naq ki'elk chaq Jisrehel resil li xkamik laj Saúl ut laj Jonatán. Toja' naq li ixq aj ilol re kixchap ut ki'elelik, ab'anan naq yo chi aanilak, kit'ane'k li ch'ina'al ut sik kikanaak.

⁵ Ke'xchap xb'eheb' laj Rekab ut laj Bahaná, ralaleb' laj Rimón aj Beherot, ut ke'wulak sa' rochoch laj Isbahal naq a'in yo chi wark, sa' li honal naq q'axal tiq li saq'e.

⁶ Jo'kan ajwi' li ixq li na'ilok re kab'l kikub'eek xwara naq yo chi tz'ilok triiw. Chi jo'kan laj Rekab ut laj Bahaná li riitz'in ke'ok chi maa'ani ki'ilok reheb'.

⁷ Naq ke'ok sa' li kab'l, yokyo laj Isbahal sa' li xch'aat, sa' li xwarib'aal. Toja' naq ke'xtiq' ut ke'xkamsi; chirix a'an ke'xch'ot li xjolom, ke'xchap ut koheb'. Ke'b'eek chixjunil li q'oqyink sa' xb'ehel Arabá.

⁸ Ke'xk'am xjolom laj Isbahal re laj David aran Hebrón, ut ke'xye re li awab'ej: “Waye' xjolom laj Isbahal, ralal laj Saúl, li xik' na'ilok aawe, li kiraj raj aakamsinkil. Sa' li kutan a'in li Qaawa' xk'e li awab'ej chi eeqajunk sa' xb'een laj Saúl ut eb' li ralal xk'ajol”, chankeb'.

⁹ Laj David kichaq'ok ut kixye re laj Rekab ut laj Bahaná li riitz'in, ralaleb' laj Rimón aj Beherot: “Sa' xk'ab'a' li yo'yookil Yos li xkolok we chiru chixjunil li rahilal, ninye eere:

¹⁰ Aran Siklak naq jun li winq xye we resil li xkamik laj Saúl (ut sa' xch'ool a'an naq chaab'il esil tixye we), laa'in xinchap ut xink'e chi kamk jo' reeqaj li esilal xye we.

¹¹ Ma toja' ta chik anaqwan naq maa'us aj winqeb' xe'xkamsi jun li winq tiik xch'ool naq yo chi wark sa' rochoch? Relik chi yaal naq texink'e chi xtojb'al li xkamik ut texinsach sa' ruuchich'och'”.

¹² Tikto laj David kixtaqlaheb' laj k'anjel chiru xkamsinkileb' laj Rekab ut laj Bahaná. Ke'xkamsiheb', ke'xyok' li ruq'eb' li roqeb' ut ke'xt'uyub'eb' wan wi' li kumb'-ha' re Hebrón. Chirix chik a'an ke'xchap xjolom laj Isbahal ut ke'xmuq Hebrón, sa' li na'ajej muqmu wi' laj Abner.