2 Samuel 18 - Q'eqchi Bible

Laj Absalón kiq'axe'k ru ut kikamsiik

¹ Laj David kirajlaheb' laj puub' li wankeb' rochb'een, ut kixxaqab'eb' li xjolomileb' laj lajeetqk'aal rox o'q'ob' (1,000) ut eb' laj o'taqk'aal (100) aj puub'.

² Chirix chik a'an kixjek'eb' laj puub' sa' oxib' ch'uut: li xb'een ch'uut kixk'eheb' chi jolomiik xb'aan laj Johab, li xkab' ch'uut xb'aan laj Abisay, xyum lix Sarbia, riitz'in laj Johab, ut li jun chik ch'uut xb'aan laj Itay aj Gat. Ut kixye reheb' chixjunileb' laj puub': “Tinxik ajwi' laa'in cherix”.

³ Ab'anan eb' a'an ke'xye re: “Ink'a' tatxik laa'at, xb'aan naq wi laa'o too'eleliq, eb' li xik' neke'ilok qe maak'a' neke'raj wi'. Us ta te'kamq jun yiijachaq qe laa'o, eb' a'an maak'a' neke'raj re. Laa'at jo'kat lajeeb' mil qe laa'o. Jo'kan naq q'axal us naq tatkanaaq sa' li tenamit re naq toj aran toohaatenq'a chaq”.

⁴ Kichaq'ok li awab'ej: “Li k'aru us cho'q eere, a'an tinb'aanu”, chan. Ut kikanaak chi xk'atq li rokeb'aal li tenamit naq chixjunileb' laj puub' ke'elk chi o'taqk'aal ut chi lajeetqk'aal rox o'q'ob' (1,000).

⁵ Toja' naq li awab'ej kixchaq'rab'i laj Johab, laj Abisay ut laj Itay chi kama'in: “Sa' ink'ab'a' laa'in meeb'aanu rahilal re laj Absalón li saaj winq”, chan. Ut chixjunileb' laj puub' ke'rab'i li k'aru kixye li awab'ej chirix laj Absalón reheb' laj k'amol b'e,

⁶ ut koheb' chi yalok rik'ineb' laj Israel. Kiwank yalok sa' li k'iche' re laj Efraín,

⁷ ut eb' laj Israel ke'q'axe'k ru xb'aaneb' laj puub' re laj David. K'ajo'eb' ke'kamsiik sa' li kutan a'an: ke'kamk junmay mil chi winq!

⁸ Li yalok kinumtaak yalaq b'ar sa' li na'ajej a'an, ut q'axal naab'aleb' chik li ke'kamk sa' li k'iche' chiruheb' li ke'kamsiik chi ch'iich'.

⁹ Laj Absalón yo chi xik sa' xb'een jun li muul naq xaqaamileb' chiru eb' laj puub' re laj David. Ab'an li muul kixch'ik rib' sa' xyanqeb' li ruq' jun nimla ji, ut li xjolom laj Absalón kit'ilk sa' xyanqeb' li ruq' li che'. Li muul ki'elelik ut laj Absalón kikanaak chi t'uyt'u.

¹⁰ Jun li winq ki'ilok re ut koxye re laj Johab: “Xwil laj Absalón t'uyt'u chiru ji”, chan.

¹¹ Ut laj Johab kixsume: “Wi xawil, k'a'ut naq ink'a' xakamsi chi junwaakaj ut xat'an chi ch'och'? Laa'in xink'e raj lajeeb'aq aatumin plaat ut jun xb'ak'b'al aasa'”, chan.

¹² Ab'an li winq kixye re laj Johab: “Us ta taayeechi'i we lajeek'aal rox o'q'ob' (1,000) intumin plaat, maajaruj tintaqsi wuq' sa' xb'een li ralal li awab'ej, xb'aan naq xqab'i li awab'ej xyeeb'al aawe, re laj Abisay ut laj Itay naq ink'a' teech'e' laj Absalón li saaj winq.

¹³ Wi ta laa'in xinkamsi li ralal laj David, maak'a' rajb'al chixjunil a'an, xb'aan naq maak'a' naru xmuqb'al chiru li awab'ej, ut laa'at maak'a' xab'aanu raj re inkolb'al”.

¹⁴ Kichaq'ok laj Johab: “Ink'a' tinsub'uq kutan chi aatinak aawik'in”, chan. Ut tikto kixchap oxib' chi simaj ut kixkuteb' chire xch'ool laj Absalón li toj yo'yo sa' xyanqeb' li ruq' li ji.

¹⁵ Chirix chik a'an ke'jilok chaq lajeeb' chi saaj winq, a'eb' li neke'k'aak'alenk re laj Johab, ke'xtiq' laj Absalón ut ke'xkamsi chi junajwa.

¹⁶ Tikto laj Johab kixye naq chiyaab'asiiq li xukub', ut eb' laj puub' re laj David ke'xkanab' raanilasinkil eb' laj Israel, xb'aan naq jo'kan kixye laj Johab.

¹⁷ Toja' naq ke'xchap laj Absalón, ke'xkut sa' jun nimla jul li wank sa' li k'iche' ut ke'xtuub' naab'aleb' li pek sa' xb'een. Ut chixjunileb' laj Israel ke'elelik sa' rochocheb'.

¹⁸ Naq toj yo'yo laj Absalón, kixtaqla xxaqab'ankil jun nimla pek najt xteram, li wank sa' xTaq'ahil li Awab'ej, ut a' ajwi' li xk'ab'a' kixk'e chi tz'iib'aak chiru a'an, xb'aan naq maak'a'eb' ralal re naq junelik taajultikaaq li xk'ab'a'. Ut chalen anaqwan “Li tusb'il Pek re laj Absalón” nayeemank re.

¹⁹ Toja' naq laj Ajimás, ralal laj Sadok, kixye: “Xik we sa' aanil chi xyeeb'al re li awab'ej naq li Qaawa' xkolok re sa' ruq'eb' li xik' neke'ilok re”.

²⁰ Ab'an laj Johab kixye re: “Ink'a' tatxik anaqwan, tatxik b'an sa' jalan chik kutan. Anaqwan moko xq'ehil ta xyeeb'al chaab'il esilal, xb'aan naq xkamk li ralal li awab'ej”.

²¹ Ut kixye re jun li winq aj Kus: “Ayu ut taaye re li awab'ej li k'aru xawil”. Laj Kus kixxulub' rib' chiru laj Johab ut koho sa' aanil.

²² Toja' naq laj Ajimás, ralal laj Sadok, kixye wi' chik re laj Johab: “Maak'a' nawaj re k'aru tink'ul. Laa'in ajwi' twaj tinxik sa' aanil, chirix li winq aj Kus”. Kichaq'ok laj Johab: “K'a' aj e naq tatxik laa'at, at walal? Ink'a' taak'eemanq aaq'ajkamunkil cho'q reeqaj li esil a'an”, chan.

²³ Kixye laj Ajimás: “A' yaal k'aru taak'ulmanq, xik we sa' aanil”. “Ayu, aanilan”, chan laj Johab. Tikto laj Ajimás kixchap xb'e, koho sa' aanil sa' xb'ehil junqre li nima' Jordán ut kixq'ax laj Kus.

²⁴ Sa' li honal a'an k'ojk'o laj David sa' xyanq li wiib' chi okeb'aal re li tenamit. Laj k'aak'alenel koho sa' xb'een li suttz'ak, sa' xtaqeq'il li okeb'aal, kixtaqsi li rilob'aal ut kiril jun li winq yo chi chalk sa' aanil ut xjunes.

²⁵ Kixjap re chi xyeeb'al resil re li awab'ej, ut li awab'ej kixye: “Wi xjunes chaq, chaab'il esil li tixye”. Naq laj esil yo chi nach'ok,

²⁶ laj k'aak'alenel kiril jun chik winq yo chi chalk sa' aanil ut kixye re laj ilol re li okeb'aal: “We' chaq jun chik winq sa' aanil, xjunes”, chan. Li awab'ej kixye: “A'an ajwi' chaab'il esil yo chaq chi xk'amb'al”.

²⁷ Laj k'aak'alenel kixye wi' chik: “Li yo chaq chi chalk sa' aanil, a'an chanchan laj Ajimás li ralal laj Sadok”. Kixye li awab'ej: “Chaab'il winq a'an. Yo chaq chi xk'amb'al chaab'il esilal”, chan.

²⁸ Naq laj Ajimás kinach'ok chaq, kiwiq'laak, kixhupub' rib' chiru ch'och' ut kixk'e xsahil xch'ool li awab'ej: “At awab'ej, usilaatinanb'il taxaq li Qaawa' laaYos li xq'axtesink reheb' sa' laawuq' li xe'raj raj numtaak sa' aab'een”, chan.

²⁹ Kipatz'ok li awab'ej: “Ma maak'a' reek' li saaj al laj Absalón?”. Kichaq'ok laj Ajimás: “Xwil jun nimla mululij ib' naq laj Johab, laj k'anjel chawu, xinxtaqla chaq arin. Ab'anan ink'a' ninnaw k'aru xk'ulmank”, chan.

³⁰ Toja' naq kixye li awab'ej: “Numen chaq ut kanaaqat arin”. Ut a'an kinume'k ut kikanaak.

³¹ Sa' ajwi' li honal a'an kiwulak laj Kus ut kixye: “At awab'ej, aj eechal we, chak'ul li chaab'il esil, xb'aan naq sa' li kutan a'in li Qaawa' xatxkol sa' ruq'eb' chixjunileb' li xe'wakliik sa' aab'een”.

³² Kixye li awab'ej re laj Kus: “Ma maak'a' reek' li saaj al laj Absalón?”. Kichaq'ok laj Kus: “At awab'ej, chixjunileb' li xik' neke'ilok aawe ut jo'k'ihaleb' neke'wakliik chaq sa' aab'een te'xk'ul taxaq kama' kixk'ul li saaj al a'an”, chan.

³³ K'ajo' naq kiraho'k xch'ool li awab'ej. Koho xjunes sa' li na'ajej wank sa' xb'een li rokeb'aal li tenamit ut ki'ok chi yaab'ak: “At Absalón, at walal! Absalón, at walal, at walal! -chan naq yo chi xik-. Us raj naq laa'in xinkamk ut laa'at toj yo'yooqat, Absalón, at walal, at walal”.