2 Samuel 14 - Q'eqchi Bible

Laj Absalón kisutq'iik wi' chik Jerusalén

¹ Laj Johab, xyum lix Sarbia, kixk'e reetal naq q'axal raaro laj Absalón xb'aan li awab'ej.

² Jo'kan naq kixtaqla chaq xk'amb'al aran Tékoha jun li ixq seeb' xch'ool ut kixye re: “B'aanu aawib' jo' naq ra sa' aach'ool, tiqib' aawib' jo' na'uxk naq nakamk anihaq ut maak'e aasununkil b'an. B'aanu aawib' jo' junaq ixq li ak junxil x'ok xrahil li xch'ool.

³ Chirix chik a'an ayu rik'in li awab'ej ut ye re li k'aru tinye aawe”, chan laj Johab, ut kixye re li k'aru tento tixye.

⁴ Li ixq aj Tékoha koxk'ut rib' chiru li awab'ej, kiwiq'laak ut kixhupub' rib' chiru ch'och': “At awab'ej, chinaatenq'a!”, chan.

⁵ Li awab'ej kixpatz' re: “K'aru xak'ul?”, chan. Kichaq'ok li ixq: “Toq'ob' wu, laa'in xmalka'an. Kamenaq linb'eelom.

⁶ Wankeb' wiib' inyum, ab'anan xe'xch'e' rib' sa' k'aleb'aal ut li jun xkamsi li jun chik xb'aan naq maajun xjek'ok reheb'.

⁷ Anaqwan chixjunileb' li wech'alal xe'wakliik chaq sa' inb'een ut xe'xye: «Q'axtesi qe li xkamsink re li riitz'in. Tqakamsi re reeqajunkil li kamsink xb'aanu, jo' ajwi' re xsachb'al li xk'ab'a' li taak'uluq ereens», chankeb'. Chi jo'kan maak'a'aq chik woyb'enihom sa' ruuchich'och' ut maak'a'aqeb' chik ralal xk'ajol linb'eelom moqon: taasache'q li xk'ab'a' chi junwaakaj”.

⁸ Toja' naq li awab'ej kixsume: “Matk'oxlak, ayu sa' laawochoch. Laa'in tinnawoq re li k'aru yookat chi xk'ulb'al”, chan.

⁹ Ab'an li ixq aj Tékoha kixye re li awab'ej: “At awab'ej, at aj eechal we, chikanaaq li maak a'in sa' inb'een ut sa' xb'een li xjunkab'al linyuwa', ab'anan ink'a' chikanaaq sa' aab'een laa'at chi moko sa' xb'een laa'awab'ejihom”.

¹⁰ Kichaq'ok li awab'ej: “Wi ani taach'i'ch'i'inq aawe, taqla chaq wik'in ut ink'a' chik tatxch'i'ch'i'i”, chan.

¹¹ Kixye wi' chik li ixq: “At awab'ej, nintz'aama chawu, tijon chiru li Qaawa' laaYos re naq laj eeqajunel kik' ink'a' chixyu' li rahilal a'in rik'in xkamsinkil linyum”. Kichaq'ok li awab'ej: “Sa' xk'ab'a' li Qaawa' ninye aawe naq maajun rismal laayum taat'ane'q sa' ch'och'”, chan.

¹² Kixye li ixq: “Nintz'aama chawu naq laamoos truuq taxaq xyeeb'al jun t'orolaq chik li raatin”. “Aatinan”, chan li awab'ej.

¹³ Toja' naq li ixq kixye: “At awab'ej, k'a'ut naq jo'kan laak'a'uxl chirix li xtenamit li Yos? Rik'in li k'aru xaye, laa'at nakaxooto laamaak, xb'aan naq ink'a' chik nakak'e chi sutq'iik chaq laj Absalón.

¹⁴ Chiqajunilo tento tookamq. Jo'ko li ha' hoyb'il sa' ch'och': ink'a' chik naru xxokb'al. Li Yos maa'ani narisi li xyu'am, naxsik' b'an xyaalal re naq taasutq'iiq wi' chik li ani najt wank rik'in.

¹⁵ Wi laa'in xink'ulunk chi xyeeb'al chixjunil a'in re laj eechal we, a'an xk'ulmank xb'aan naq xinxiwak xb'aan li k'aru xe'xye we li tenamit. Jo'kan naq xink'oxla aatinak rik'in li awab'ej. Mare chan naq tixpaab' li waatin.

¹⁶ Wi laa'at taapaab' li waatin, tatruuq inkolb'al sa' ruq' li winq li naraj insachb'al laa'in ut linyum sa' xyanqeb' laj Israel.

¹⁷ Laa'in aj k'anjel chawu, ut yookin chi royb'eninkil naq laawaatin tixk'ojob' linch'ool, xb'aan naq laa'at, awab'ej, chanchanat jun x'ánjel li Yos: nakanaw xk'eeb'al reetal li us ut li ink'a' us. A' taxaq li Qaawa' Yos chiwanq aawik'in”.

¹⁸ Kichaq'ok li awab'ej ut kixye re li ixq: “Mik'a' aamuq chiwu chirix li k'aru tinpatz' aawe”. “Aatinan, at awab'ej, aj eechal we”, chan li ixq.

¹⁹ Toja' naq li awab'ej kixpatz': “Ma maawa' laj Johab xk'uub'ank re chixjunil a'in?”. Kichaq'ok li ixq: “At awab'ej, sa' aak'ab'a' laa'at ninye li waatin naq tz'aqal yaal li k'aru xaye. Laj Johab aj k'anjel chawu xtaqlank chaq we, ut a'an ajwi' xyehok we li k'aru xinnumsi chawu.

²⁰ Re roksinkil li na'leb' a'in chi muqmu naq xb'aanu chi jo'kan. Ab'anan laj eechal we wank xna'leb' jo' jun x'ánjel li Yos ut naxnaw chixjunil li nak'ulmank sa' ruuchich'och'”.

²¹ Chirix chik a'an li awab'ej kixye re laj Johab: “K'e reetal, tinb'aanu jo' xak'oxla laa'at: ayu ut k'am chaq laj Absalón li saaj al”.

²² Tikto laj Johab kiwiq'laak, kixhupub' rib' chiru ch'och' ut kiyoxink chiru li awab'ej: “At awab'ej, aj eechal we, anaqwan ninnaw naq xintaw usilal chawu, xb'aan naq xab'aanu li k'aru xintz'aama aawe”.

²³ Toja' naq laj Johab kixaqliik, koho Jesur ut kixk'am chaq laj Absalón sa' li tenamit Jerusalén.

²⁴ Ab'anan li awab'ej kixye: “Xikaq sa' rochoch; ink'a' nawaj rilb'al ru”. Ut laj Absalón koho sa' rochoch chi ink'a' kixk'ut rib' chiru li awab'ej.

²⁵ Aran Israel maajun winq chaq'al ru jo' laj Absalón; chixjunileb' neke'xk'e xloq'al xb'aan naq maak'a' reek' chalen chi roq toj sa' xsuutut.

²⁶ Rajlal chihab' naxb'es li rismal li xjolom xb'aan naq jwal aal li rismal, ut li rismal b'esb'il a'an numenaq oob' liib'r li raalal jo' neke'b'isok wi' li awab'ej.

²⁷ Laj Absalón kiwank oxib' ralal ut jun xrab'in q'axal ch'ina'us, xTamar xk'ab'a'.

²⁸ Laj Absalón kiwank Jerusalén wiib' chihab' chi ink'a' kiril ru li awab'ej.

²⁹ Sa' jun kutan kixb'oq laj Johab re xtaqlankil rik'in li awab'ej, ab'an a'an ink'a' kiraj xik. Kixb'oq wi' chik xka sut, ab'an ink'a' wi' chik kiraj.

³⁰ Toja' naq laj Absalón kixye reheb' laj k'anjel chiru: “Chek'e reetal, li xna'aj li xseb'aad laj Johab wank chi xk'atq li we. Ayuqex ut k'ehomaq chi xam”. Eb' laj k'anjel chiru laj Absalón koheb' ut ke'xk'at li na'ajej.

³¹ Tikto laj Johab koho sa' rochoch laj Absalón ut kixye re: “K'a'ut naq eb' laamoos xe'xk'e xxamlel linna'aj?”.

³² Laj Absalón kixsume laj Johab: “Xintaqla aab'oqb'al re xyeeb'al aawe: B'aanu usilal, kim; twaj aataqlankil rik'in li awab'ej re naq taaye naq maak'a' aj e naq xinsutq'iik chaq Jesur. Q'axal us raj cho'q we wi ta xinkanaak aran Jesur. Anaqwan twaj rilb'al ru li awab'ej, ut wi wank junaq inmaak, chixteneb'aaq kamk sa' inb'een”.

³³ Toja' naq laj Johab koho rik'in li awab'ej ut kixye re li k'aru kiyehe'k xb'aan laj Absalón. Li awab'ej kixtaqla xb'oqb'al laj Absalón, ut a'in koho rik'in ut kixb'uchub' rib' chiru. Chirix chik a'an li awab'ej kirutz' ru laj Absalón.