2 Samuel 13 - Q'eqchi Bible

Laj Amnón ut lix Tamar

¹ Laj Absalón, ralal laj David, kiwank jun ranab', xTamar xk'ab'a', k'ajo' xch'ina'usal. Laj Amnón, a'an jun chik ralal laj David, ut xkoho xch'ool chirix lix Tamar.

² K'ajo' naq kixra toj reetal kiyajerk, xb'aan naq toj tuq'ixq lix Tamar ut jwal ch'a'aj cho'q re laj Amnón reechaninkil.

³ Ab'anan kiwank jun ramiiw laj Amnón, aj Jonadab xk'ab'a', ralal laj Simá li ras laj David. Laj Jonadab wank xk'a'uxl,

⁴ ut sa' jun kutan kixye: “K'aru xak'ul, ralalat li awab'ej? K'a'ut naq yookat chi b'aqo'k? Ma ink'a' taaye we?”. Kichaq'ok laj Amnón: “Xikenaq linch'ool chirix lix Tamar, ranab' laj Absalón li was”, chan.

⁵ “Yoklan sa' laach'aat -chan laj Jonadab- ut b'aanu aawib' naq yajat. Naq taa'ok laayuwa' chawilb'al, taaye re: «B'aanu usilal, chalqaq lix Tamar li wanab' chi xk'eeb'al inwa. Twaj naq tixk'uub' lintzekemq chiwu laa'in re naq twil ut tink'ul sa' ruq'», cha'qat re”, chan laj Jonadab.

⁶ Jo'kan naq laj Amnón kiyoklaak ut yaj naq kixb'aanu rib'. Li awab'ej ki'ok chi rilb'al ut laj Amnón kixye re: “Nintz'aama chawu naq taataqla chaq lix Tamar li wanab', re naq tixk'uub' chiwu wiib'aq inkaxlan wa ut tixk'e we”, chan.

⁷ Toja' naq laj David kixtaqla xyeeb'al re lix Tamar sa' rochoch: “Ayu sa' rochoch laj Amón laawas ut k'uub' b'ayaq xtzekemq”.

⁸ Koho lix Tamar sa' rochoch li ras ut kiril naq yokyo. Kixchap li k'aj, kixyoq', kixyiib' kaxlan wa ut kixk'ile chiru laj Amnón.

⁹ Chirix chik a'an kixchap li k'ileel, kixyamtesi xsa' chiru a'an, ab'an laj Amnón ink'a' kiraj tzekank. “Elqeb' chixjunileb' arin”, chan li ras. Ut chixjunileb' ke'elk aran.

¹⁰ Toja' naq laj Amnón kixye re lix Tamar: “K'am chaq li tzekemq sa' linwarib' ut laa'at ajwi' tatk'ehoq we chi tzekank”, chan. Lix Tamar kixchap li tzekemq li kixyiib', kixk'am wan wi' li xch'aat laj Amnón li ras,

¹¹ ab'an naq kixk'ut chiru re naq tixtzeka, kichape'k: “Kim, yoklan wik'in, at wanab'”, chu'uxk re xb'aan li ras.

¹² “Ink'a', at was -chan li ixqa'al-, maamin wu, xb'aan naq ink'a' na'uxk chi jo'kan sa' qayanq laa'o aj Israel. Maab'aanu li maa'usilal a'in.

¹³ B'ar tinxik laa'in chi xmuqb'al li xutaanal xinkanaak wi'? Ut laa'at tatkanaaq jo' jun li winq yib'ru xna'leb' sa' xyanqeb' laj Israel. B'aanu usilal, aatinan rik'in li awab'ej ut a'an tinxq'axtesi cho'q aawixaqil”.

¹⁴ Ab'an laj Amnón ink'a' kiraj rab'inkil, kixchap b'an ut kixmin ru chi wank rik'in.

¹⁵ Moqon chik k'ajo' naq laj Amnón xik' kiril lix Tamar, numtajenaq wi' chik chiru naq kixra xb'enwa. Ut kixye re: “Waklin ut ayu”.

¹⁶ Kichaq'ok lix Tamar: “Ink'a', at was. B'aanu usilal. Wi tinaawaanilasi, li xkab' maa'usilal a'in, q'axal nimaq wi' chik chiru li xab'aanu we xb'enwa”, chan. Ab'an laj Amnón ink'a' kiraj rab'inkil.

¹⁷ Kixb'oq laj k'anjel chiru ut kixye re: “Isi li ixq a'in arin ut tz'ap li okeb'aal chirix”.

¹⁸ Laj k'anjel kirisi lix Tamar chirix kab'l ut kixtz'ap li okeb'aal. Li ixqa'al wank jun xchaab'il jut-aq' chirix, ninqi ruq', xkomon li neke'raq'un li xrab'ineb' li awab'ej junxil, naq toj tuq'ixqeb'.

¹⁹ Ab'anan naq wank chik sa' b'e, kixk'e cha sa' xjolom ut kixq'ich li xchaab'il jut-aq' li wank chirix. Chirix chik a'an kixtikib' yaab'ak, kixk'e li ruq' sa' xjolom ut chajcho re naq koho.

²⁰ Laj Absalón li ras kiril ru ut kixye re: “Ma xwank laj Amnón laawas aawik'in? Maaseeraq'i a'in, at wanab', xb'aan naq a'an aawas. Ut matk'oxlak chirix a'in”. Chalen sa' li kutan a'an lix Tamar kikanaak sa' rochoch laj Absalón chi q'axal ra sa' xch'ool.

²¹ Naq laj David kixnaw chixjunil a'in, k'ajo' naq kichalk xjosq'il; ab'an ink'a' kiraj xrahob'tesinkil xch'ool laj Amnón li ralal, xb'aan naq a'an li xb'een al ut q'axal raaro xb'aan.

²² Laj Absalón maajun aatin kixye re laj Amnón, ab'anan xik' naril xb'aan naq kixsach xtuq'ixqilal lix Tamar li ranab'.

Laj Absalón kixtaqla xkamsinkil laj Amnón, ut ki'elelik

²³ Wiib' chihab'aq chik a'an, eb' laj Absalón yookeb' chi b'esok rix karneer aran Bahal-Jesor, nach' rik'in li tenamit Efraín, ut laj Absalón kixb'oq chixjunileb' li ralal li awab'ej.

²⁴ Koxk'ut rib' chiru li awab'ej ut kixye re: “At awab'ej, yooko chi b'esok karneer. Nintz'aama chawu naq laa'at aawochb'eeneb' laj k'anjel chawu tineerochb'eeni”, chan.

²⁵ Ab'an li awab'ej kixsume laj Absalón: “Ink'a', at walal, ink'a' naru tooxik chiqajunilo. Naab'alo, ut terto taa'elq cho'q aawe”, chan. Us ta laj Absalón kirelaji ru, ab'an li awab'ej ink'a' kiraj xik. Kirosob'tesi,

²⁶ ut chirix chik a'an kixye laj Absalón: “B'aanu usilal, xikaq chiqix laj Amnón li was”. Kichaq'ok li awab'ej: “K'a' aj e naq taaxik chawix?”, chan.

²⁷ Ab'anan laj Absalón kirelaji ru toj reetal laj David kixtaqla laj Amnón jo'wi' chixjunileb' li ralal. Toja' naq laj Absalón kixk'e jun ninq'e,

²⁸ ut kixye reheb' laj k'anjel chiru: “Kawal wanqex. Naq sahaq xch'ool laj Amnón xb'aan li b'iin ut laa'in tinye eere: «Teekamsi», kamsihomaq chi maak'a'aq eexiw, xb'aan naq a'an eetaqlankil inb'aan. Kawaq b'i' eech'ool ut yo'oon wanqex”.

²⁹ Eb' laj k'anjel chiru laj Absalón ke'xpaab' li xtaqlankileb' ut ke'xkamsi laj Amnón. Toja' naq chixjunileb' li ralal li awab'ej ke'xaqliik ut ke'elelik chirixeb' li xmuul.

³⁰ Toj wankeb' a'an chiru xb'eheb', naq kiwulak resil rik'in laj David naq laj Absalón xkamsi chixjunileb' li ralal ut maajun chik reheb' xkanaak chi yo'yo.

³¹ Toja' naq kixaqliik li awab'ej, kixq'ich li raq' ut kixkut rib' chiru ch'och'. Chixjunileb' laj k'anjel li wankeb' rochb'een ke'xq'ich ajwi' li raq'eb',

³² ab'an laj Jonadab, ralal laj Simá li ras laj David, ki'ok chi aatinak ut kixye: “At awab'ej, maak'oxla naq kamenaqeb' chixjunileb' laawalal. Ka'ajwi' laj Amnón xkamk. Ak wank sa' xch'ool laj Absalón xkamsinkil laj Amnón chalen naq a'in kixmux lix Tamar li ranab'.

³³ Jo'kan naq maapaab' li k'aru xe'xye aawe. Moko xe'kamsiik ta chixjunileb' laawalal. Ka'ajwi' laj Amnón xkamsiik”, chan.

³⁴ Naq laj Absalón yo chi elelik, jun li saaj al li yo chi k'aak'alenk kixtaqsi li rilob'aal ut kiril naab'aleb' li poyanam yookeb' chaq chi chalk sa' xb'ehel Joronáhin, sa' li kub'sink. Tikto koho chi xyeeb'al re laj David: “Xe'wil winq li yookeb' chaq chi kub'eek sa' li tzuul, sa' xb'ehel Joronáhin”, chan.

³⁵ Ut laj Jonadab kixye re li awab'ej: “A'aneb' li ralal li awab'ej li yookeb' chi k'ulunk. Xk'ulmank jo' xinye laa'in laamoos”, chan.

³⁶ Toje' ajwi' traqe'q chi aatinak, naq ke'ok chixjunileb' li ralal li awab'ej, japjookeb' re chi yaab'ak. Li awab'ej ajwi' rochb'eeneb' chixjunileb' laj k'anjel k'ajo' naq ke'yaab'ak.

^37-38 Laj Absalón ki'elelik ut koho wan wi' laj Talmay, ralal laj Amiud, awab'ej re Jesur, ut aran kiwank oxib' chihab'. Laj David rajlal kutan naxyaab'a li ralal,

³⁹ ab'an naq ak xch'anaak li xjosq'il chirix xkamik laj Amnón, kiraj wi' chik rilb'al laj Absalón.